ଶାଢୀରେ ଚମକୁଛି ଓଡିଶାର ସଂସ୍କୃତି, ବୋଇତ ବନ୍ଦାଣ ଡିଜାଇନ କରି ଚର୍ଚ୍ଚାରେ ବାନ୍ଧଶିଳ୍ପୀ

ସୋନପୁର: ଯୁଗ ବଦଳିଛି ତା ସହ ବଦଳିଛି ଲୋକଙ୍କ ରୁଚି । ଲୋକଙ୍କ ରୁଚି ଅନୁସାରେ କାରିଗରମାନେ ମଧ୍ୟ  ନିଜର ଯାଦୁକରୀରେ କରିଥାନ୍ତି କଳାର ନିଦର୍ଶନ l ବିଶେଷ ଭାବରେ ସୁବର୍ଣ୍ଣପୁର ଜିଲ୍ଲାରେ ରହିଥିବା ବାନ୍ଧ ଶିଳ୍ପୀମାନେ ସମୟ ସହ ତାଳ ଦେଇ କରିଥାନ୍ତି ନୂତନ ନୂତନ ଡିଜାଇନ l ତେବେ ଏଭଳି ଏକ ଡିଜାଇନ କରି ପୁଣି ଚର୍ଚ୍ଚାରେ ସୁବର୍ଣ୍ଣପୁର ଜିଲ୍ଲାର ଜଣେ ବାନ୍ଧଶିଳ୍ପୀ l

ଐତିହ୍ୟ, କଳା ଓ ସଂସ୍କୃତିର ମାଟି ଓଡ଼ିଶା l ଏଠାକାର ସଂସ୍କୃତି ଓ ପରମ୍ପରା ବିଶ୍ବରେ ଏକ ସ୍ବତନ୍ତ୍ର ସ୍ଥାନ ଅର୍ଜନ କରିଛି  l ସେଥି ମଧ୍ୟରୁ କାର୍ତ୍ତିକ ପୂର୍ଣ୍ଣମୀ ଦିନ ପାଳିତ ହେଉଥିବା ବୋଇତ ବନ୍ଦାଣ ହେଉଛି ଅନ୍ୟତମ  l ତେବେ ଏହି ପ୍ରାଚୀନ ପରମ୍ପରାର ଚିତ୍ର ସବୁକୁ ଶାଢି ଦେହରେ ବୁଣି ଏବେ ଚର୍ଚ୍ଚାରେ ସୁବର୍ଣ୍ଣପୁର ଜିଲ୍ଲା ବିରମହାରାଜପୁର ବ୍ଲକ ଅନ୍ତର୍ଗତ କେନ୍ଦୁପାଲି ଗ୍ରାମର  ବାନ୍ଧଶିଳ୍ପୀ ମଙ୍ଗୁଳୁ ମେହେର l ବାନ୍ଧ ମାଧ୍ୟମରେ ନିଜେ ଡିଜାଇନକୁ ସ୍ଥାନ ଦେଇଥିବାବେଳେ ଅକ୍ଲାନ୍ତ ପରିଶ୍ରମ କରି ବୁଣୁଛନ୍ତି ଏହି ଶାଢୀ  l ଯାହାକୁ ନେଇ ସେ ରାଜ୍ୟ ସରକାରଙ୍କଠାରୁ ପୁରସ୍କାର ମଧ୍ୟ ପାଇଛନ୍ତି l ଯାହାକୁ ନେଇ  ବେସ ଖୁସି ଅନୁଭବ କରିଛନ୍ତି ପରିବାର ଲୋକ ।

ମଙ୍ଗୁଳୁଙ୍କ ଦ୍ୱାରା ପ୍ରସ୍ତୁତ ଏହି ଶାଢୀ ଦେହରେ ରହିଛି ଆ, କା ମା ବୈ ଲେଖା ସହିତ ସାଧବ ପୁଅ ମାନଙ୍କ ଯାତ୍ରା ଓ ସାଧବ ବୋହୁ ମାନଙ୍କ ବନ୍ଦାଣର ପ୍ରତିଛବି l ଯାହାକୁ ଶାଢିରେ ଦେଖିଲେ ପୁରୁଣା ସ୍ମୃତି ସବୁ ମନେ ପଡ଼ିଯାଏ l ତେବେ ଏହି ଡିଜାଇନକୁ ବାନ୍ଧଶିଳ୍ପୀ ପ୍ରଫୁଲ୍ଲ ମେହେର ପ୍ରସ୍ତୁତ କରିଥିଲେ l ପରେ ମଙ୍ଗୁଳୁଙ୍କ ପୁରା ପରିବାର ଏଥିରେ ନିୟୋଜିତ ହେବା ସହ ଅକ୍ଲାନ୍ତ ପରିଶ୍ରମ କରି ଶାଢିବୁଣାକୁ ଶେଷ କରିଛନ୍ତି । ଏବେ ଏହି ଶାଢି ବଜାରରେ ମିଳୁଥିବା ବେଳେ ଏହାର ଦାମ ପ୍ରାୟ ୨୫ ରୁ ୩୦ ହଜାର ଟଙ୍କା ଥିବା ଜଣାପଡିଛି  l ଓଡ଼ିଶା ବାସୀ  ପାଳନ କରୁଥିବା ପରମ୍ପରାକୁ ଶାଢିରେ ସ୍ଥାନ ଦେଇ ନୁଆଁ ପରିଚୟ ସୃଷ୍ଟି କରିଛନ୍ତି ଏହି ବାନ୍ଧଶିଳ୍ପୀ l ଯାହାକୁ ନେଇ ଏବେ ସାରା ଜିଲ୍ଲାରେ ଚର୍ଚ୍ଚା ।