ଭୁବନେଶ୍ୱର: ଭୁବନେଶ୍ୱର ସହରର ବଢୁଥିବା ଭିଡ଼ ଏବଂ ଟ୍ରାଫିକ ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ସରକାର ଏକ ବଡ଼ ଯୋଜନା ପ୍ରସ୍ତୁତ କରିଛନ୍ତି । ଆସନ୍ତା ୫୦ ବର୍ଷର ଆବଶ୍ୟକତାକୁ ଦୃଷ୍ଟିରେ ରଖି ୩୭ଟି ନୂଆ ରାସ୍ତା ପ୍ରକଳ୍ପକୁ ଅନୁମୋଦନ ମିଳିଛି । ଏଥିମଧ୍ୟରେ ନୂଆ ରିଙ୍ଗ୍ ରୋଡ୍ ଏବଂ ଫ୍ଲାଏ ଓଭର ସାମିଲ ଅଛି ।
ପର୍ଯ୍ୟାୟରେ ୨୦ଟି ଗୁରୁତ୍ୱପୂର୍ଣ୍ଣ ରାସ୍ତା କାମକୁ ପ୍ରାଥମିକତା ଦିଆଯିବ । ସାଲିଆସାହିରୁ ଚୁନୋକୋଲି ବସ୍ତିକୁ ସଂଯୋଗ କରୁଥିବା ରାସ୍ତା ଆସନ୍ତା ୧୫ ଦିନ ମଧ୍ୟରେ ଶେଷ ହେବ । ବାରଙ୍ଗରୁ ଜଟଣୀ ପର୍ଯ୍ୟନ୍ତ ୩୮ କିଲୋମିଟର ଲମ୍ବା ରାସ୍ତା ତିଆରି ହେବ। ଏହା ଭୁବନେଶ୍ୱର, କଟକ ଓ ଜଟଣୀ ମଧ୍ୟରେ ଏକ ‘ମିନି ରିଙ୍ଗ୍ ରୋଡ୍’ ଭଳି କାମ କରିବ ।
କଳିଙ୍ଗ ଷ୍ଟୁଡିଓ ଛକରୁ ହସ୍ପିଟାଲ ଏବଂ ଖଣ୍ଡଗିରିରୁ ଗଣ୍ଡମୁଣ୍ଡା ପର୍ଯ୍ୟନ୍ତ ରାସ୍ତାରେ Elevated Corridor ନିର୍ମାଣ ହେବ । ସହର ବାହାରେ ୧୪୦ କିଲୋମିଟର ବିଶିଷ୍ଟ ଏକ ବିରାଟ ରିଙ୍ଗ ରୋଡ୍ ତିଆରି ହେବ । ଯାହାଫଳରେ ଭାରୀ ଗାଡ଼ିଗୁଡ଼ିକ ସହର ଭିତରକୁ ନଆସି ବାହାରେ ବାହାରେ ଯାଇପାରିବେ । ଏଜି ଛକରେ ଅଣ୍ଡରପାସ୍, ଏମ୍ସ ପାଖ ରାସ୍ତାର ପ୍ରଶସ୍ତିକରଣ ଏବଂ ପଟିଆ, ଇନଫୋସିଟି ଓ କିଟ୍ ଅଞ୍ଚଳରେ ଉତ୍ତମ ସଂଯୋଗୀକରଣ କରାଯିବ ବୋଲି ମନ୍ତ୍ରୀ କହିଛନ୍ତି ।
ପୂର୍ବ ଅପେକ୍ଷା ରାଜଧାନୀରେ ବଢିଛି ଲୋକ ସଂଖ୍ୟା । ନୂଆ ନୂଆ ବ୍ୟବସାୟିକ ପ୍ରତିଷ୍ଠାନ, ଶିଳ୍ପ ଏବଂ ଶିକ୍ଷାନୁଷ୍ଠାନ ଯୋଗୁଁ ରାସ୍ତାରେ ଭିଡ଼ ବଢ଼ିଛି । ଅନେକ ସମୟରେ ଟ୍ରାଫିକ ସମସ୍ୟା ଉପୁଜୁଛି । ସହରକୁ ଭିଡ ମୁକ୍ତ କରିବାକୁ ଏହି ଜୋଜନା କରୁଛନ୍ତି ରାଜ୍ୟ ସରକାର ।