Trump Praises India: ଭାରତର ନିର୍ବାଚନ ବ୍ୟବସ୍ଥାକୁ ଟ୍ରମ୍ପଙ୍କ ପ୍ରଶଂସା, ଆମେରିକାରେ ‘ଭୋଟର ଆଇଡି’ ପାଇଁ ଦେଲେ ଭାରତର ଉଦାହରଣ
ନୂଆଦିଲ୍ଲୀ: ଆମେରିକାରେ ନିର୍ବାଚନ ସମୟରେ ଭୋଟର ଆଇଡି ବାଧ୍ୟତାମୂଳକ କରିବା ପ୍ରସ୍ତାବକୁ ଜୋରଦାର କରିବା ପାଇଁ ଭାରତର ନିର୍ବାଚନ ବ୍ୟବସ୍ଥାକୁ ଉଦାହରଣ ଭାବେ ରଖିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଭାରତରେ ନିର୍ବାଚନ କିପରି ପରିଚୟପତ୍ର ଆଧାରିତ ଭାବେ ପରିଚାଳିତ ହେଉଛି, ତାହା ଦର୍ଶାଇ ଆମେରିକାରେ ମଧ୍ୟ ଭୋଟରଙ୍କ ପାଇଁ ଫଟୋ ଆଇଡି ବାଧ୍ୟତାମୂଳକ କରିବାକୁ ସେ ଦାବି କରିଛନ୍ତି।
ଟ୍ରମ୍ପ ନିଜ ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ’ରେ ଭାରତର ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ଉଲ୍ଲେଖ କରିଛନ୍ତି। ଟ୍ରମ୍ପଙ୍କ ଦାବି ଅନୁସାରେ, ଜ୍ଞାନେଶ କୁମାର ପ୍ରଶ୍ନ କରିଥିଲେ, ଆମେରିକାରେ ଭୋଟରମାନେ ବୈଧ ଫଟୋ ପରିଚୟପତ୍ର ଦେଖାଇବା ବିନା ନିର୍ବାଚନ କିପରି ହୋଇପାରେ?
ଭାରତର ସଦ୍ୟ ସାଧାରଣ ନିର୍ବାଚନକୁ ଉଦାହରଣ ଭାବେ ରଖି ଟ୍ରମ୍ପ କହିଛନ୍ତି ଯେ ଭାରତରେ ପ୍ରାୟ ୬୪.୬ କୋଟି ଭୋଟର ନିର୍ବାଚନରେ ଭାଗ ନେଇଥିଲେ। ସେଥିରୁ ୧ ପ୍ରତିଶତରୁ କମ୍ ଭୋଟର ପୋଷ୍ଟାଲ ବାଲଟ୍ ମାଧ୍ୟମରେ ଭୋଟ ଦେଇଥିଲେ ବୋଲି ସେ ଦାବି କରିଛନ୍ତି। ଟ୍ରମ୍ପ ଆହୁରି କହିଛନ୍ତି ଯେ ଭାରତରେ ପ୍ରତ୍ୟେକ ଭୋଟରଙ୍କ ପାଖରେ ବୈଧ ପରିଚୟପତ୍ର ରହିବା ଆବଶ୍ୟକ। ଏହି ଉଦାହରଣ ଦେଇ ସେ ଆମେରିକାରେ ମଧ୍ୟ ଭୋଟର ପରିଚୟ ଯାଞ୍ଚ ବ୍ୟବସ୍ଥାକୁ କଡ଼ା କରିବା ଦାବି କରିଛନ୍ତି।
ଟ୍ରମ୍ପ ଯେଉଁ SAVE (Safeguard American Voter Eligibility) Actକୁ ସମର୍ଥନ କରୁଛନ୍ତି, ଏଥିରେ ଆମେରିକାର ଫେଡେରାଲ ନିର୍ବାଚନରେ ଭୋଟ ଦେବା ପାଇଁ ନାଗରିକତାର ପ୍ରମାଣ ଦେବା ପ୍ରସ୍ତାବ ରହିଛି। ଏହାସହ ଭୋଟରଙ୍କ ପାଇଁ ଦେଶବ୍ୟାପୀ ପରିଚୟପତ୍ର ବ୍ୟବସ୍ଥା ଲାଗୁ କରିବା ଏବଂ ଡାକ ମାଧ୍ୟମରେ ଭୋଟଦାନ ଉପରେ ଅଧିକ କଟକଣା ଲଗାଇବାର ପ୍ରସ୍ତାବ ମଧ୍ୟ ରହିଛି। ପ୍ରସ୍ତାବ ଅନୁସାରେ, ରାଜ୍ୟଗୁଡ଼ିକୁ ଭୋଟର ତାଲିକାରୁ ଅଣ-ଆମେରିକୀୟ ନାଗରିକଙ୍କ ନାମ ଚିହ୍ନଟ କରି ହଟାଇବାକୁ ମଧ୍ୟ କୁହାଯାଇଛି। ତେବେ ଅସୁସ୍ଥ, ଦିବ୍ୟାଙ୍ଗ, ସେନାରେ କାର୍ଯ୍ୟରତ କିମ୍ବା ଯାତ୍ରାରେ ଥିବା ଲୋକଙ୍କ ପାଇଁ ଡାକ ମାଧ୍ୟମରେ ଭୋଟଦାନରେ କିଛି ବ୍ୟତିକ୍ରମ ରଖାଯିବାର ପ୍ରସ୍ତାବ ଅଛି।
ଟ୍ରମ୍ପଙ୍କ ମତକୁ ଆମେରିକାରେ ଭାରତ ପାଇଁ ନିଯୁକ୍ତ ରାଷ୍ଟ୍ରଦୂତ ସର୍ଜିଓ ଗୋର ମଧ୍ୟ ସମର୍ଥନ କରିଛନ୍ତି। ସେ କହିଛନ୍ତି ଯେ ଭାରତରେ ୬୪.୬ କୋଟି ଭୋଟରଙ୍କ ପାଇଁ ପରିଚୟପତ୍ର ଆବଶ୍ୟକ ଥିଲା। ତେଣୁ ଆମେରିକୀୟ କଂଗ୍ରେସକୁ SAVE ଆମେରିକା ଆକ୍ଟ ପାସ୍ କରିବା ଉଚିତ ବୋଲି ସେ ମତ ଦେଇଛନ୍ତି।
ଟ୍ରମ୍ପ ପ୍ରଶାସନର ଯୁକ୍ତି ହେଉଛି, ଫେଡେରାଲ ନିର୍ବାଚନରେ କେବଳ ଆମେରିକୀୟ ନାଗରିକମାନେ ଭୋଟ ଦେବା ଉଚିତ। ଭୋଟର ପରିଚୟ ଯାଞ୍ଚକୁ କଡ଼ା କରିବା ଦ୍ୱାରା ନିର୍ବାଚନୀ ଜାଲିଆତି ରୋକାଯାଇପାରିବ ବୋଲି ଟ୍ରମ୍ପ ଲଗାତାର ଦାବି କରିଆସୁଛନ୍ତି।
ତେବେ SAVE ଆକ୍ଟକୁ ନେଇ ଆମେରିକାରେ ରାଜନୈତିକ ମତଭେଦ ରହିଛି। ଡେମୋକ୍ରାଟ୍ ଓ ରିପବ୍ଲିକାନ୍ ଦଳ ମଧ୍ୟରେ ଏହାକୁ ନେଇ ମତଭିନ୍ନତା ଦେଖାଦେଇଛି। ଚଳିତ ମାସ ଆରମ୍ଭରେ ଆମେରିକୀୟ ସିନେଟ୍ ପାଞ୍ଚ ସପ୍ତାହର ବିରତିକୁ ଯାଇଥିଲା, କିନ୍ତୁ ବିଲ୍ ପାସ୍ କରିବା ଦିଗରେ କୌଣସି ଠୋସ ପଦକ୍ଷେପ ନିଆଯାଇନଥିଲା।