ଓ୍ବାଶିଂଟନ୍: ଇରାନର ପରମାଣୁ କେନ୍ଦ୍ର ଉପରେ ଆକ୍ରମଣ ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରାଷ୍ଟ୍ର ଉଦ୍ଦେଶ୍ୟରେ ତାଙ୍କ ଅଭିଭାଷଣରେ କହିଛନ୍ତି ଯେ, ଇରାନ ଗତ ୪୦ ବର୍ଷ ଧରି ମିଡଲ ଇଷ୍ଟକୁ ଧମକ ଦେଇ ଆସୁଥିଲା । ଏବେ ଆଶା ଅଛି ଯେ ମିଡଲ ଇଷ୍ଟରେ ଶାନ୍ତି ପ୍ରତିଷ୍ଠା ହେବ । ଇରାନକୁ ଏବେ ଶାନ୍ତି ପଥକୁ ଫେରିବା ଉଚିତ, ନଚେତ୍ ପରବର୍ତ୍ତୀ ପଦକ୍ଷେପ ଅଧିକ ଭୟଙ୍କର ହେବ ବୋଲି କଡା ଚେତେବନୀ ଦେଇଛନ୍ତି ଟ୍ରମ୍ପ ।
ଟ୍ରମ୍ପ ଆହୁରି କହିଛନ୍ତି ଯେ, ଆମେ ସବୁଠାରୁ କଷ୍ଟକର ଲକ୍ଷ୍ୟ ବାଛିଥିଲୁ ଏବଂ ଶନିବାର ରାତିରେ ଏଥିରେ ସଫଳତା ପାଇଲୁ । ଆହୁରି ଅନେକ ଟାର୍ଗେଟ୍ ଅଛି । ଆମେରିକୀୟ ସେନାର ପ୍ରଶଂସା କରି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ଗତକାଲି ରାତିରେ ଆମେରିକୀୟ ସେନା ଯାହା କରିଛି ତାହା ବିଶ୍ୱର କୌଣସି ସେନା କରିପାରିବ ନାହିଁ । ଇରାନ ବିଶ୍ୱରେ ଆତଙ୍କବାଦୀ ସୃଷ୍ଟି କରୁଛି ଏବଂ ଏହାର ପରମାଣୁ ସ୍ଥାନ ବିଶ୍ୱ ପାଇଁ ବିପଦ ପାଲଟିଛି ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, “ଆମର ଉଦ୍ଦେଶ୍ୟ ଥିଲା ଇରାନର ପରମାଣୁ ସମୃଦ୍ଧି କ୍ଷମତାକୁ ନଷ୍ଟ କରିବା ଏବଂ ବିଶ୍ୱର ଏକ ନମ୍ବର ଆତଙ୍କବାଦୀ ପ୍ରାୟୋଜକ ଦ୍ୱାରା ସୃଷ୍ଟି ହୋଇଥିବା ପରମାଣୁ ବିପଦକୁ ରୋକିବା । ମୁଁ ବିଶ୍ୱକୁ କହୁଛି ଯେ ଏହି ଆକ୍ରମଣଗୁଡ଼ିକ ଏକ ଚମତ୍କାର ସାମରିକ ସଫଳତା ଥିଲା । ଇରାନର ପ୍ରମୁଖ ପରମାଣୁ ସମୃଦ୍ଧି ସୁବିଧାଗୁଡ଼ିକୁ ସମ୍ପୂର୍ଣ୍ଣ ଧ୍ୱଂସ କରାଯାଇଛି।”
#WATCH | Amid Iran-Israel conflict, the US strikes Iran's three nuclear facilities | President Trump says, "Iran, bully of the Middle East, must now make peace. If they do not, future attacks would be far greater and easier. For 40 years, Iran has been saying death to Israel,… pic.twitter.com/4udbZqXbW0
— ANI (@ANI) June 22, 2025
ରାଷ୍ଟ୍ରପତି ଟ୍ରମ୍ପ କହିଛନ୍ତି, “ମୁଁ ଇସ୍ରାଏଲର ପ୍ରଧାନମନ୍ତ୍ରୀ ନେତାନ୍ୟାହୁଙ୍କୁ ଧନ୍ୟବାଦ ଏବଂ ଅଭିନନ୍ଦନ ଜଣାଉଛି । ଆମେ ଏପରି ଏକ ଟିମ୍ ଭାବରେ କାମ କରିଥିଲୁ ଯାହା ପୂର୍ବରୁ କୌଣସି ଟିମ୍ କରିନଥିଲା, ଏବଂ ଆମେ ଏହି ଭୟଙ୍କର ବିପଦକୁ ଦୂର କରିବାରେ ବହୁତ ଆଗକୁ ଯାଇଛୁ । ମୁଁ ଇସ୍ରାଏଲ ସେନାକୁ ସେମାନଙ୍କର ଚମତ୍କାର କାର୍ଯ୍ୟ ପାଇଁ ଧନ୍ୟବାଦ ଜଣାଉଛି।”
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ମନେରଖ, ଏବେ ବି ଅନେକ ଟାର୍ଗେଟ ବାକି ଅଛି । ଆମେ ଯେଉଁଗୁଡ଼ିକୁ ଆକ୍ରମଣ କରିଥିଲୁ ତାହା ସବୁଠାରୁ କଠିନ ଏବଂ ସମ୍ଭବତଃ ସବୁଠାରୁ ଘାତକ ଥିଲା । କିନ୍ତୁ ଯଦି ଶାନ୍ତି ଶୀଘ୍ର ନ ଆସେ, ତେବେ ଆମେ ପୂର୍ଣ୍ଣ ଗତିରେ ଆଗକୁ ବଢ଼ି ଅନ୍ୟ ଲକ୍ଷ୍ୟସ୍ଥଳ ଉପରେ ଆକ୍ରମଣ କରିବୁ । ସେମାନଙ୍କ ମଧ୍ୟରୁ ଅଧିକାଂଶକୁ କିଛି ମିନିଟ୍ ମଧ୍ୟରେ ଧ୍ୱଂସ କରାଯାଇପାରିବ ବୋଲି ଇରାନକୁ କଡା ଚେତାବନୀ ଦେଇଛନ୍ତି ଟ୍ରମ୍ପ।
ସୂଚନାଯୋଗ୍ୟ, ଇରାନ ଉପରେ ବଡ଼ ଆକ୍ରମଣ କରିଛି ଆମେରିକା । ଇରାନର ୩ଟି ପରମାଣୁ ଘାଟି ଉପରେ ବୋମାମାଡ଼ କରିଛି ଆମେରିକା । ଫଳରେ ଇରାନର ଫୋର୍ଡୋ, ନାଟାଞ୍ଜ ଓ ଇସଫାହାନ ପରମାଣୁ ଘାଟି ସମ୍ପୂର୍ଣ୍ଣ ଧ୍ବଂସ ହେଇଯାଇଛି । ବଙ୍କର ବଷ୍ଟର ବୋମା ସହ ଗୁପ୍ତ ବୋମାବାହୀ ବିମାନରେ ଆକ୍ରମଣ କରିଛି ଆମେରିକା ।
Comments are closed.