ଶ୍ରୀନଗର: ଜମ୍ମୁ-କାଶ୍ମୀରର ପହଲଗାମରେ ୨୨ ଏପ୍ରିଲରେ ହୋଇଥିବା ଆତଙ୍କବାଦୀ ଆକ୍ରମଣ ମାମଲାରେ ଜାତୀୟ ତଦନ୍ତକାରୀ ସଂସ୍ଥା ଏନଆଇଏକୁ ମିଳିଛି ବଡ଼ ସଫଳତା । ଏହି ଆତଙ୍କବାଦୀ ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ଆଶ୍ରୟ ଦେବା ଅଭିଯୋଗରେ ଏନଆଇଏ ୨ ଜଣଙ୍କୁ ଗିରଫ କରିଛି । ଉଭୟ ସନ୍ଦିଗ୍ଧ ବ୍ୟକ୍ତି ପହଲଗାମର ବାସିନ୍ଦା, ଆଉ ହମଲାରେ ସଂପୃକ୍ତ ଥିବା ଆତଙ୍କବାଦୀ, ପାକିସ୍ତାନୀ ଆତଙ୍କବାଦୀ ସଙ୍ଗଠନ ଲସ୍କର-ଏ-ତୈବା ସହ ଜଡିତ ଥିଲେୁ ବୋଲି ସେମାନେ ସତ ଉଗାରିଛନ୍ତି ।
ପହଲଗାମରେ ଆତଙ୍କବାଦୀ ଆକ୍ରମଣ ସମୟରେ ୨୬ ଜଣ ନିର୍ଦ୍ଦୋଷ ପର୍ଯ୍ୟଟକଙ୍କ ମୃତ୍ୟୁ ଏବଂ ୧୬ ଜଣଙ୍କୁ ଗୁରୁତର ଆହତ କରିଥିବା ଭୟଙ୍କର ଆକ୍ରମଣକାରୀ ଆତଙ୍କବାଦୀଙ୍କୁ ଆଶ୍ରୟ ଦେବା ଅଭିଯୋଗରେ ଏନଆଇଏ ଏହି ୨ ଜଣଙ୍କୁ ଗିରଫ କରିଛି । ତଦନ୍ତକାରୀ ସଂସ୍ଥା ଏହାର ବିବୃତ୍ତିରେ କହିଛି ଯେ ପହଲଗାମର ବାଟକୋଟର ପରଭେଜ ଅହମ୍ମଦ ଜୋଥାର ଏବଂ ପହଲଗାମର ହିଲ୍ ପାର୍କର ବଶିର ଅହମ୍ମଦ ଜୋଥାର ଆକ୍ରମଣରେ ସମ୍ପୃକ୍ତ ୩ ଜଣ ସଶସ୍ତ୍ର ଆତଙ୍କବାଦୀଙ୍କ ପରିଚୟ ପ୍ରକାଶ କରିଛନ୍ତି ଏବଂ ସେମାନେ ନିଷିଦ୍ଧ ଆତଙ୍କବାଦୀ ସଂଗଠନ ଲସ୍କର-ଏ-ତୈବା , ଏଲଇଟି ସହିତ ଜଡିତ ପାକିସ୍ତାନୀ ନାଗରିକ ବୋଲି ମଧ୍ୟ ନିଶ୍ଚିତ କରିଛନ୍ତି ।
ଏନଆଇଏର ତଦନ୍ତ ଅନୁଯାୟୀ, ଗିରଫ ପରଭେଜ ଅହମ୍ମଦ ଏବଂ ବଶିର ଅହମ୍ମଦ ଆକ୍ରମଣ ପୂର୍ବରୁ ହିଲ୍ ପାର୍କର ଏକ ଋତୁକାଳୀନ କୁଡ଼ିଆରେ ଜାଣିଶୁଣି ୩ ଜଣ ସଶସ୍ତ୍ର ଆତଙ୍କବାଦୀଙ୍କୁ ଆଶ୍ରୟ ଦେଇଥିଲେ। ସେମାନେ ଉଭୟ ଆତଙ୍କବାଦୀଙ୍କୁ ଖାଦ୍ୟ, ଆଶ୍ରୟ ଏବଂ ଲଜିଷ୍ଟିକ୍ ସମର୍ଥନ ଯୋଗାଇଥିଲେ ଯେଉଁମାନେ ୨୨ ଏପ୍ରିଲ୍ ଅପରାହ୍ନରେ ପହଲଗାମ୍ ପରିଦର୍ଶନ କରୁଥିବା ପର୍ଯ୍ୟଟକମାନଙ୍କୁ ସେମାନଙ୍କ ଧାର୍ମିକ ପରିଚୟ ଆଧାରରେ ବାଛି ହତ୍ୟା କରିଥିଲେ। ଏହି ଆକ୍ରମଣ ଗତ ଦଶନ୍ଧିରେ ସାଧାରଣ ଲୋକଙ୍କ ଉପରେ ସବୁଠାରୁ ବଡ଼ ଆତଙ୍କବାଦୀ ଆକ୍ରମଣ ଥିଲା । ଏନେଇ ଜାତୀୟ ତଦନ୍ତ ସଂସ୍ଥା ଏନଆଇଏ କହିଛି ଯେ ଉଭୟ ସନ୍ଦିଗ୍ଧଙ୍କୁ ବେଆଇନ କାର୍ଯ୍ୟକଳାପ (ନିବାରଣ) ଆଇନ, ୧୯୬୭ ର ଧାରା ୧୯ ଅନୁଯାୟୀ ଗିରଫ କରାଯାଇଛି । ୨୨ ଏପ୍ରିଲ୍ ରେ ଏହି ଭୟଙ୍କର ଆତଙ୍କବାଦୀ ଆକ୍ରମଣ ପରେ ତଦନ୍ତ ସଂସ୍ଥା ଏକ ମାମଲା (RC-02/2025/NIA/JMU) ପଞ୍ଜିକରଣ କରି ମାମଲାର ଅଧିକ ତଦନ୍ତ କରୁଛି ।
ସେପଟେ ପହଲଗାମରେ ଆତଙ୍କବାଦୀ ଆକ୍ରମଣ ପରେ, ତଦନ୍ତକାରୀ ସଂସ୍ଥାଗୁଡ଼ିକ ଆକ୍ରମଣର ଅପରାଧୀଙ୍କୁ ଗିରଫ କରିବା ପାଇଁ ନିରନ୍ତର ଅଭିଯାନ ଚଳାଇଛନ୍ତି, କିନ୍ତୁ ସେମାନେ ଏବେ ବି ଫେରାର ଅଛନ୍ତି। ଏପରି ପରିସ୍ଥିତିରେ, ଆତଙ୍କବାଦୀଙ୍କୁ ଆଶ୍ରୟ ଦେବା ଅଭିଯୋଗରେ ଗିରଫ ହୋଇଥିବା ଦୁଇ ସ୍ଥାନୀୟ ଲୋକଙ୍କ ମାଧ୍ୟମରେ ତଦନ୍ତକାରୀ ସଂସ୍ଥାଗୁଡ଼ିକ ସେମାନଙ୍କ ପାଖରେ ପହଞ୍ଚିପାରିବେ। ଆକ୍ରମଣ ପରେ, ତଦନ୍ତକାରୀ ସଂସ୍ଥାଗୁଡ଼ିକ ସନ୍ଦିଗ୍ଧ ବ୍ୟକ୍ତିଙ୍କ ସ୍କେଚ୍ ମଧ୍ୟ ଜାରି କରିଥିଲେ। ପରେ, ଏହି ଆତଙ୍କବାଦୀମାନଙ୍କ ପାଇଁ ପୁରସ୍କାର ରାଶି ମଧ୍ୟ ଘୋଷଣା କରାଯାଇଥିଲା, କିନ୍ତୁ ସେମାନେ ଏବେ ବି ଫେରାର ଅଛନ୍ତି।
Comments are closed.