Chamoli train accident: ଟନେଲରେ ଦୁଇ ଟ୍ରେନ୍ ମଧ୍ୟରେ ଧକ୍କା; ୮୮ ଶ୍ରମିକ ଆହତ, ଓଡ଼ିଆ ଥିବା ସୂଚନା
ଡେରାଡୁନ: ଉତ୍ତରାଖଣ୍ଡର ଚମୋଲି ଜିଲ୍ଲାରେ ମଙ୍ଗଳବାର ଏକ ବଡ଼ ଟ୍ରେନ୍ ଦୁର୍ଘଟଣା ଘଟିଛି। ମଙ୍ଗଳବାର ରାତିରେ ଚମୋଲି ଜିଲ୍ଲାର ପିପଲକୋଟୀ(Pipalkoti tunnel)ରେ ନିର୍ମାଣାଧୀନ THDC ଜଳବିଦ୍ୟୁତ ପ୍ରକଳ୍ପର TBM (ଟନେଲ୍ ବୋରିଂ ମେସିନ୍) ସାଇଟ୍ ରେ ରାତି ସିଫ୍ଟ ପରିବର୍ତ୍ତନ ସମୟରେ ଏକ ଦୁର୍ଘଟଣା ଘଟିଥିଲା। THDCର ପିପଲକୋଟି ପ୍ରକଳ୍ପରେ ନିର୍ମାଣାଧୀନ ଏକ ସୁଡ଼ଙ୍ଗରେ ଶ୍ରମିକମାନେ ସେମାନଙ୍କ କାର୍ଯ୍ୟସ୍ଥଳକୁ ଏକ ଲୋକୋମୋଟିଭ୍ ଟ୍ରେନ୍ ମାଧ୍ୟମରେ ଯାଉଥିବା ସମୟରେ ବିପରୀତ ଦିଗରୁ ଆସୁଥିବା ଏକ ଖାଲି ଟ୍ରେନ୍ ସହିତ ଧକ୍କା ହୋଇଥିଲା। ପ୍ରାରମ୍ଭିକ ରିପୋର୍ଟ ଅନୁଯାୟୀ, ଦୁର୍ଘଟଣାରେ ବହୁ ସଂଖ୍ୟକ ଶ୍ରମିକ ଆହତ ହୋଇଛନ୍ତି। ଦୁର୍ଘଟଣା ସମୟରେ ସୁଡ଼ଙ୍ଗ ସ୍ଥାନରେ ୧୦୯ ଜଣ ଶ୍ରମିକ ଥିଲେ। ସୂଚନା ପାଇବା ମାତ୍ରେ ରିଲିଫ୍ ଏବଂ ଉଦ୍ଧାର ଦଳ ଘଟଣାସ୍ଥଳରେ ପହଞ୍ଚିଥିଲେ। ସୁଡ଼ଙ୍ଗ ଭିତରେ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ତୁରନ୍ତ ପ୍ରୟାସ ଆରମ୍ଭ କରାଯାଇଥିଲା। ପ୍ରଶାସନ ପରିସ୍ଥିତି ଉପରେ ନିରନ୍ତର ନଜର ରଖିଛି। ଦୁର୍ଘଟଣାର କାରଣ ତଦନ୍ତ କରାଯାଉଛି।
ପ୍ରାପ୍ତ ସୂଚନା ଅନୁଯାୟୀ, ୮୮ ଜଣ ଆହତ ହୋଇଥିବା ରିପୋର୍ଟ କରାଯାଇଛି। ଏମାନଙ୍କ ମଧ୍ୟରୁ ୭୦ ଜଣ ଆହତ ଶ୍ରମିକଙ୍କୁ ଗୋପେଶ୍ୱରର ଜିଲ୍ଲା ହସ୍ପିଟାଲରେ ଚିକିତ୍ସା କରାଯାଇଥିଲା। ସେମାନଙ୍କ ମଧ୍ୟରୁ ୬୬ ଜଣଙ୍କୁ ଚିକିତ୍ସା ପରେ ଡିସଚାର୍ଜ କରାଯାଇଛି। ହାଡ଼ଭଙ୍ଗି ଯାଇଥିବା ଚାରି ଜଣ ଶ୍ରମିକଙ୍କୁ ଜିଲ୍ଲା ହସ୍ପିଟାଲରେ ଚିକିତ୍ସା କରାଯାଉଛି। ପିପଲକୋଟିର ବିବେକାନନ୍ଦ ହସ୍ପିଟାଲରେ ଅଠର ଜଣ ଆହତ ଶ୍ରମିକଙ୍କୁ ଚିକିତ୍ସା କରାଯାଇଥିଲା ଏବଂ ସେମାନଙ୍କୁ ଡିସଚାର୍ଜ କରାଯାଇଛି। ସେମାନଙ୍କ ଅବସ୍ଥା ସ୍ଥିର ଅଛି। ୨୧ ଜଣ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି।
ଚମୋଲିର ଏସପି କହିଛନ୍ତି ଯେ, ସିଫ୍ଟ ପରିବର୍ତ୍ତନ ସମୟରେ ଦୁଇଟି ଲୋକୋମୋଟିଭ୍ ଟ୍ରେନ୍ ମଧ୍ୟରେ ଧକ୍କା ହୋଇଥିଲା। ସୁଡ଼ଙ୍ଗ ଭିତରୁ ଆସୁଥିବା ଟ୍ରେନ୍ ଟି ଖାଲି ଥିଲା। ଟ୍ରେନ୍ର ବ୍ରେକିଂ ସିଷ୍ଟମ୍ରେ ତ୍ରୁଟି ଯୋଗୁଁ ଏହି ଧକ୍କା ଘଟିଥିଲା। ଆହତ ଶ୍ରମିକମାନଙ୍କ ମଧ୍ୟରୁ ଅଧିକାଂଶ ବିହାର, ଝାଡ଼ଖଣ୍ଡ ଏବଂ ଓଡ଼ିଶାର। ଆମେ THDC ଅଧିକାରୀଙ୍କଠାରୁ ସମ୍ପୂର୍ଣ୍ଣ ବିବରଣୀ ପ୍ରାପ୍ତ କରୁଛୁ।