ନୂଆଦିଲ୍ଲୀ: ବିଶ୍ୱର ସବୁଠାରୁ ଆଧୁନିକ ସହର ମଧ୍ୟରୁ ଗୋଟିଏ ହେଉଛି ଦୁବାଇ। ଦୁବାଇ ସମେତ ସମଗ୍ର ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ମଶାଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି। ଏହାକୁ ଦୃଷ୍ଟିରେ ରଖି ୟୁଏଇ ସ୍ୱାସ୍ଥ୍ୟ ମନ୍ତ୍ରଣାଳୟ ଆନୁଷ୍ଠାନିକ ଭାବରେ ଏକ ମଶା ସତର୍କତା ଜାରି କରିଛି। ସ୍ଥାନୀୟ ବାସିନ୍ଦାଙ୍କୁ ସତର୍କ ରହିବାକୁ ଅନୁରୋଧ କରିଛି।
ରିପୋର୍ଟ ଅନୁଯାୟୀ, ସ୍ୱାସ୍ଥ୍ୟ ମନ୍ତ୍ରଣାଳୟ ସତର୍କ କରାଇ ଦେଇଛି ଯେ ମଶାଙ୍କ ସଂଖ୍ୟା ବୃଦ୍ଧି ପାଇବା ଦ୍ୱାରା ଡେଙ୍ଗୁ, ଭାଇରାଲ୍ ଜ୍ୱର ଏବଂ ଅନ୍ୟାନ୍ୟ ରୋଗର ବିପଦ ବଢ଼ିପାରେ। ଯଦିଓ ଦୁବାଇକୁ ବିଶ୍ୱର ସବୁଠାରୁ ସ୍ୱଚ୍ଛ ସହର ମଧ୍ୟରୁ ଗୋଟିଏ ଭାବରେ ବିବେଚନା କରାଯାଏ। କିନ୍ତୁ ପରିବର୍ତ୍ତନଶୀଳ ପାଗ ଏବଂ ସ୍ଥିର ପାଣି ମଶା ବଂଶ ବୃଦ୍ଧି ପାଇଁ ସୁଯୋଗ ପ୍ରଦାନ କରିଥାଏ।
ୟୁଏଇ ସ୍ୱାସ୍ଥ୍ୟ ମନ୍ତ୍ରଣାଳୟ ସଚେତନତା ବୃଦ୍ଧି ପାଇଁ ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଏକ ପୋଷ୍ଟ କରିଛି। ମଶା କାମୁଡ଼ାକୁ ହାଲୁକା ଭାବରେ ନ ନେବାକୁ ମନ୍ତ୍ରଣାଳୟ ଲୋକଙ୍କୁ ଅନୁରୋଧ କରିଛି। ଯଦି କେହି ଜ୍ୱର, ଗୁରୁତର ମୁଣ୍ଡବିନ୍ଧା କିମ୍ବା ଶରୀରରେ ଲଗାତାର ଯନ୍ତ୍ରଣା ଭଳି ଲକ୍ଷଣ ଅନୁଭବ କରନ୍ତି ତେବେ ତୁରନ୍ତ ଡାକ୍ତରଙ୍କ ସହିତ ଯୋଗାଯୋଗ କରନ୍ତୁ। ଏଥିସହିତ ଶୀଘ୍ର ଚିକିତ୍ସା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ଅପରପକ୍ଷରେ ସରକାର ସ୍ପଷ୍ଟ ଭାବରେ କହିଛନ୍ତି ଯେ ମଶା ନିବାରଣ ହେଉଛି ସବୁଠାରୁ ପ୍ରଭାବଶାଳୀ ପଦକ୍ଷେପ। ଲୋକମାନଙ୍କୁ ସେମାନଙ୍କ ଘର ଏବଂ ଚାରିପାଖରେ ପାଣି ଜମିବାକୁ ନଦେବା, କୁଲର, ପାତ୍ର ଏବଂ ଟାଙ୍କିରେ ନିୟମିତ ଭାବରେ ପାଣି ପରିବର୍ତ୍ତନ କରିବାକୁ ଅନୁରୋଧ କରାଯାଇଛି। ମନ୍ତ୍ରଣାଳୟ ଅନୁଯାୟୀ, ମଶା ବାହିତ ରୋଗକୁ ରୋକିବା ପାଇଁ ଜନସାଧାରଣ ଏବଂ ପ୍ରଶାସନର ସାମୂହିକ ସହଯୋଗ ହିଁ ଏକମାତ୍ର ଦୃଢ଼ ଉପାୟ ବୋଲି କହିଛନ୍ତି।