ନୂଆଦିଲ୍ଲୀ:ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲ (Piyush Goyal ) ସେପ୍ଟେମ୍ବର ୨୨ ତାରିଖରେ ଆମେରିକା ଗସ୍ତ କରିବେ। ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ସେପ୍ଟେମ୍ବର ୨୨ ରେ ବାଣିଜ୍ୟ ଆଲୋଚନା ପାଇଁ ଆମେରିକା ଗସ୍ତ କରିବେ ବୋଲି ବାଣିଜ୍ୟ ମନ୍ତ୍ରଣାଳୟ ଶନିବାର ଦିନ କହିଛି।
ମନ୍ତ୍ରଣାଳୟର ସ୍ୱତନ୍ତ୍ର ସଚିବ ରାଜେଶ ଅଗ୍ରୱାଲ ଏବଂ ଅନ୍ୟ ଅଧିକାରୀମାନେ ନ୍ୟୁୟର୍କରେ ଅନୁଷ୍ଠିତ ବୈଠକରେ ଯୋଗଦେବେ।
ମନ୍ତ୍ରଣାଳୟ କହିଛି ଯେ ଏହି ଗସ୍ତର ଲକ୍ଷ୍ୟ ହେଉଛି ଦୁଇ ଦେଶ ମଧ୍ୟରେ ଏକ ପାରସ୍ପରିକ ଲାଭଦାୟକ ବାଣିଜ୍ୟ ଚୁକ୍ତିକୁ ଯଥାଶୀଘ୍ର ଚୂଡ଼ାନ୍ତ କରିବା ଦିଗରେ ଆଲୋଚନାକୁ ତ୍ୱରାନ୍ୱିତ କରିବା।
ସୂଚନାଥାଉକି, ଆମେରିକା ବାଣିଜ୍ୟ ପ୍ରତିନିଧି (USTR) କାର୍ଯ୍ୟାଳୟର ଅଧିକାରୀମାନଙ୍କର ଏକ ଦଳ ସେପ୍ଟେମ୍ବର ୧୬ରେ ଭାରତ ଗସ୍ତ କରିଥିଲେ। ସେହି ସମୟରେ, ବିଭିନ୍ନ ପ୍ରସଙ୍ଗ ଉପରେ ସକାରାତ୍ମକ ଆଲୋଚନା କରାଯାଇଥିଲା ଏବଂ ଏ ଦିଗରେ ପ୍ରୟାସକୁ ଆହୁରି ତୀବ୍ର କରିବାକୁ ନିଷ୍ପତ୍ତି ନିଆଯାଇଥିଲା।
ବିବୃତ୍ତିରେ କୁହାଯାଇଛି, “ଏହି ଆଲୋଚନାକୁ ଆଗକୁ ବଢାଇବା ପାଇଁ, ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲ ସେପ୍ଟେମ୍ବର ୨୨ରେ ଆମେରିକା ଗସ୍ତ କରୁଛନ୍ତି, ଯେଉଁଠାରେ ସେ ଆମେରିକୀୟ ପକ୍ଷଙ୍କ ସହିତ ସାକ୍ଷାତ କରିବେ। ପ୍ରତିନିଧିମଣ୍ଡଳ ଆଲୋଚନାକୁ ଆଗକୁ ନେବା ଏବଂ ବାଣିଜ୍ୟ ଚୁକ୍ତିର ଶୀଘ୍ର ନିଷ୍କର୍ଷରେ ପହଞ୍ଚିବା ଲକ୍ଷ୍ୟ ରଖିଛି।”
ପିୟୁଷ ଗୋୟଲଙ୍କ ଏହି ଗସ୍ତ ଏପରି ଏକ ସମୟରେ ଆସିଛି ଯେତେବେଳେ ଆମେରିକା ନିକଟରେ ଭିସା ନିୟମ ଏବଂ ଫିରେ ପରିବର୍ତ୍ତନ ଘୋଷଣା କରିଛି। ତେବେ ବାଣିଜ୍ୟ ଆଲୋଚନା ସମୟରେ ଭାରତୀୟ ପକ୍ଷ ମଧ୍ୟ ଆମେରିକୀୟ ଅଧିକାରୀଙ୍କ ସହିତ ଏହି ପ୍ରସଙ୍ଗ ଉପରେ ଆଲୋଚନା କରିପାରନ୍ତି ।
Comments are closed.