Court Summons Rahul Gandhi: ଅମିତ ଶାହଙ୍କୁ ହତ୍ୟାକାରୀ କହିବା ପ୍ରସଙ୍ଗ, ୧୯ରେ ହାଜର ହେବାକୁ ରାହୁଲ ଗାନ୍ଧୀଙ୍କୁ ସମନ କଲେ କୋର୍ଟ…

ସୁଲତାନପୁର: ଗୃହମନ୍ତ୍ରୀ ଅମିତ ଶାହଙ୍କ ବିରୁଦ୍ଧରେ ଅପମାନଜନକ ମନ୍ତବ୍ୟ ଦେବା ମାମଲାରେ ମଙ୍ଗଳବାର ଦିନ ସୁଲତାନପୁରର ସାଂସଦ/ବିଧାୟକ କୋର୍ଟରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ବିରୁଦ୍ଧରେ ଶୁଣାଣି ହୋଇଥିଲା। ପ୍ରାୟ ୪୦ ମିନିଟ୍ ଧରି ଚାଲିଥିବା ଏହି ଶୁଣାଣି ପରେ, କୋର୍ଟ ରାହୁଲ ଗାନ୍ଧୀଙ୍କୁ ସମନ କରିଥିଲେ ଏବଂ ଜାନୁଆରୀ ୧୯ ତାରିଖରେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ।

ରାହୁଲ ଗାନ୍ଧୀଙ୍କ ଓକିଲ କାଶୀ ଶୁକ୍ଳା ସାକ୍ଷୀ ରାମ ଚନ୍ଦ୍ର ଦୁବେଙ୍କ ଜେରା ସମାପ୍ତ କରିଥିଲେ। ଅଭିଯୋଗକାରୀ ବିଜୟ ମିଶ୍ରଙ୍କ ଓକିଲ ସନ୍ତୋଷ ପାଣ୍ଡେ କହିଛନ୍ତି, “ଆମ ପକ୍ଷରୁ ଏବେ କୌଣସି ସାକ୍ଷୀଙ୍କୁ ଉପସ୍ଥାପନ କରାଯିବ ନାହିଁ।”

ବିଚାରପତି ଶୁଭମ ବର୍ମା ଧାରା ୩୧୩ ଅନୁଯାୟୀ ରାହୁଲ ଗାନ୍ଧୀଙ୍କୁ ସମନ କରିଥିଲେ। ତାଙ୍କୁ ବ୍ୟକ୍ତିଗତ ଭାବରେ କୋର୍ଟରେ ହାଜର ହେବାକୁ ପଡିବ। ଏହାର ଅର୍ଥ କୋର୍ଟ ଚାହାଁନ୍ତି ଯେ ରାହୁଲ ତାଙ୍କ ବିରୁଦ୍ଧରେ ପ୍ରମାଣ ବୁଝାନ୍ତୁ, ଯାହା ଦ୍ଵାରା ଶୁଣାଣି ବିନା କାହାକୁ ଦୋଷୀ ସାବ୍ୟସ୍ତ କରାଯିବ ନାହିଁ।

ରାହୁଲଙ୍କ ବିରୋଧରେ ଏହି ମାମଲା ସାତ ବର୍ଷ ପୂର୍ବେ କର୍ଣ୍ଣାଟକରେ ଅମିତ ଶାହଙ୍କ ବିରୋଧରେ ଦିଆଯାଇଥିବା ଅପମାନଜନକ ମନ୍ତବ୍ୟ ସହିତ ଜଡିତ। ୨୦୧୮ କର୍ଣ୍ଣାଟକ ନିର୍ବାଚନ ସମୟରେ ରାହୁଲ ଗାନ୍ଧୀ କହିଥିଲେ ଯେ ସଚ୍ଚୋଟତାର କଥା କହୁଥିବା ଦଳର ସଭାପତି ହତ୍ୟାର ଅଭିଯୁକ୍ତ। ଏହା ପରେ, ସୁଲତାନପୁରର ବିଜେପି ନେତା ବିଜୟ ମିଶ୍ର ୪ ଅଗଷ୍ଟ ୨୦୧୮ରେ ରାହୁଲଙ୍କ ବିରୋଧରେ ମାନହାନି ମାମଲା ଦାୟର କରିଥିଲେ। ପରେ ୨୦୨୪ରେ କୋର୍ଟ ଜାମିନ ପ୍ରଦାନ କରିଥିଲେ। ୨୦ ଫେବୃଆରୀ, ୨୦୨୪ରେ ମାନହାନି ମାମଲାରେ ଜାମିନ ବିହୀନ ୱାରେଣ୍ଟରେ ରାହୁଲ ଗାନ୍ଧୀ କୋର୍ଟରେ ହାଜର ହୋଇଥିଲେ। ରାହୁଲ ଗାନ୍ଧୀ ବିଚାରପତିଙ୍କୁ କହିଥିଲେ, “ମୁଁ ନିର୍ଦ୍ଦୋଷ। ମୋ ବିରୁଦ୍ଧରେ ଏକ ରାଜନୈତିକ ଷଡ଼ଯନ୍ତ୍ର ହୋଇଛି। ମୁଁ ସମସ୍ତ ଅଭିଯୋଗକୁ ଖଣ୍ଡନ କରୁଛି। ମୋର ଏବଂ ମୋ ଦଳର ଭାବମୂର୍ତ୍ତିକୁ ଖରାପ କରିବା ପାଇଁ ଅଭିଯୋଗ କରାଯାଇଛି।” କୋର୍ଟ ତାଙ୍କୁ ୨୫,୦୦୦ ଟଙ୍କାର ଦୁଇଟି ବଣ୍ଡରେ ଜାମିନ ପ୍ରଦାନ କରିଥିଲେ।

ଶାହଙ୍କ ବିରୁଦ୍ଧରେ ରାହୁଲଙ୍କ ପୂର୍ଣ୍ଣାଙ୍ଗ ବୟାନ, ଯାହା ମାନହାନି ମାମଲାକୁ ଭାବେ ଅଭିଯୋଗ ଦୟାର ହୋଇଥିଲା। ମାମଲା ଦାୟର କରିଥିବା ବିଜେପି ନେତା ବିଜୟ ମିଶ୍ରଙ୍କ ପ୍ରତିନିଧିତ୍ୱ କରୁଥିବା ଓକିଲ ସନ୍ତୋଷ ପାଣ୍ଡେ କହିଛନ୍ତି: “୨୦୧୮ ମଇ ୮ ତାରିଖରେ କର୍ଣ୍ଣାଟକ ନିର୍ବାଚନ ସମୟରେ ରାହୁଲ ଗାନ୍ଧୀ ବେଙ୍ଗାଲୁରୁରେ ଏକ ସାମ୍ବାଦିକ ସମ୍ମିଳନୀ କରିଥିଲେ। ଏଥିରେ ସେ କହିଥିଲେ, ‘ଅମିତ ଶାହ ହତ୍ୟାର ଅଭିଯୁକ୍ତ। ସୁପ୍ରିମକୋର୍ଟ ନିଜେ ଲୋୟା ମାମଲାରେ ଏହା ଉଲ୍ଲେଖ କରିଥିଲେ। ତେଣୁ, ମୁଁ ବିଶ୍ୱାସ କରେ ନାହିଁ ଯେ ଅମିତ ଶାହଙ୍କର କୌଣସି ବିଶ୍ୱସନୀୟତା ଅଛି।’ ସଚ୍ଚୋଟତା ଏବଂ ପବିତ୍ରତାର କଥା କହୁଥିବା ଦଳର ସଭାପତି ହତ୍ୟାର ଅଭିଯୁକ୍ତ।”

ତେବେ କହିରଖୁଛୁ ଯେ ସ୍ୱତନ୍ତ୍ର କୋର୍ଟ ବିଚାରପତି ବ୍ରିଜମୋହନ ହରକିଶନ ଲୋୟା ଡିସେମ୍ବର ୨୦୧୪ରେ ନାଗପୁରରେ ମୃତ୍ୟୁବରଣ କରିଥିଲେ। ସେହି ସମୟରେ, ସେ ଜଣେ ସହକର୍ମୀଙ୍କ ଝିଅର ବିବାହରେ ଯୋଗ ଦେଇଥିଲେ। ବିଚାରପତି ଲୋୟା ଗୁଜରାଟରେ ଅତ୍ୟନ୍ତ ବିବାଦୀୟ ସୋହରାବୁଦ୍ଦିନ ଶେଖ ଏନକାଉଣ୍ଟର ମାମଲାର ଶୁଣାଣି କରୁଥିଲେ, ଯେଉଁଥିରେ ଅମିତ ଶାହ ଜଣେ ଅଭିଯୁକ୍ତ ଥିଲେ। ତଥାପି, ଲୋୟାଙ୍କ ପୁଅ ତାଙ୍କ ପିତାଙ୍କ ମୃତ୍ୟୁକୁ ସ୍ୱାଭାବିକ ବୋଲି ବର୍ଣ୍ଣନା କରିଥିଲେ। ସୁପ୍ରିମକୋର୍ଟ ମଧ୍ୟ ଏହି ମାମଲାର SIT ତଦନ୍ତ ପାଇଁ ଆବେଦନକୁ ଖାରଜ କରିଦେଇଥିଲେ, ଏହାକୁ ଏକ ସ୍ୱାଭାବିକ ମୃତ୍ୟୁ ବୋଲି କହିଥିଲେ।

ମାନହାନି ମାମଲା ଦାୟର କରିଥିବା ଆବେଦନକାରୀ କହିଛନ୍ତି ଯେ ରାହୁଲଙ୍କ ବୟାନ ଦ୍ୱାରା ତାଙ୍କ ଭାବନା ଆଘାତ ପାଇଛି କାରଣ ସେ ନିଜେ ବିଜେପି ସହିତ ଜଡିତ ଥିଲେ। ତାଙ୍କୁ ମଧ୍ୟ ସମାଜରେ ବଦନାମ କରାଯାଇଥିଲା। ତେଣୁ, ସେ ଏହି ମାମଲାରେ କୋର୍ଟରେ ଏକ ମାମଲା ଦାୟର କରିଥିଲେ।

ବିଜୟ ମିଶ୍ର ସାକ୍ଷୀ ଭାବରେ ରାମଚନ୍ଦ୍ର ଏବଂ ଅନିଲ ମିଶ୍ରଙ୍କୁ ହାଜର କରାଯାଇଥିଲା। ବିଜୟ ମିଶ୍ର ୟୁଟ୍ୟୁବ୍ ଏବଂ ଅନ୍ୟାନ୍ୟ ୱେବସାଇଟରେ ପ୍ରସାରିତ ରାହୁଲଙ୍କ ବୟାନକୁ ପ୍ରମାଣ ଭାବରେ ଉପସ୍ଥାପନ କରିଥିଲେ। ସେ କହିଥିଲେ ଯେ ସାକ୍ଷୀଙ୍କ ବୟାନ ଏବଂ ଅନ୍ୟାନ୍ୟ ପ୍ରମାଣ ରାହୁଲଙ୍କୁ କୋର୍ଟକୁ ଡକାଇବା ପାଇଁ ପର୍ଯ୍ୟାପ୍ତ ପ୍ରମାଣ ପ୍ରଦାନ କରିଛି।

ଏହି ମାମଲାରେ ରାହୁଲ ଗାନ୍ଧୀଙ୍କ ବିରୁଦ୍ଧରେ ଦୁଇଟି ଧାରା ଦାୟର କରାଯାଇଛି: ଧାରା ୪୯୯ ଏବଂ ୫୦୦। ଧାରା ୪୯୯ ମିଥ୍ୟା ଗୁଜବ ପ୍ରଚାର କରିବା, ମନ୍ତବ୍ୟ ଦେବା ଏବଂ କାହାକୁ ବଦନାମ କରିବା। ଧାରା ୫୦୦ ମାନହାନି ପାଇଁ ଦଣ୍ଡ ପ୍ରଦାନ କରେ, ଯାହା ଦୁଇ ବର୍ଷ ପର୍ଯ୍ୟନ୍ତ ଜେଲ୍ ହୋଇପାରେ।

ଗତ ବର୍ଷ, ଏକ ମାନହାନି ମାମଲାରେ ରାହୁଲ ଗାନ୍ଧୀଙ୍କ ସଂସଦରେ ସଦସ୍ୟତା ରଦ୍ଦ କରାଯାଇଥିଲା। ୨୪ ମାର୍ଚ୍ଚ, ୨୦୨୩ ରେ, ସୁରଟର ଏକ କୋର୍ଟ ତାଙ୍କୁ ମାନହାନି ପାଇଁ ଦୁଇ ବର୍ଷ ଜେଲ୍ ଦଣ୍ଡାଦେଶ ଦେଇଥିଲେ। ରାହୁଲ ସେତେବେଳେ ୱାୟାନାଡ଼ରୁ ସାଂସଦ ଥିଲେ। କିନ୍ତୁ, ଦଣ୍ଡାଦେଶ ସ୍ଥଗିତ ହେବା ପରେ ପରେ ତାଙ୍କର ସଦସ୍ୟତା ପୁନଃସ୍ଥାପିତ ହୋଇଥିଲା।