ଭାଇରାଲ୍ ପୋଷ୍ଟମୋର୍ଟମ; ଗଣମାଧ୍ୟମ କହୁଛି ସାପ ଖାଉଛ, ମନ୍ତ୍ରୀ କହୁଛନ୍ତି ମିଛ କହୁଛ !
ଅରୁଣାଚଳପ୍ରଦେଶ: ଜୋର ଧରିଛି ଚର୍ଚ୍ଚ । କରୋନା ମହାମାରୀରେ ବଦଳିଛି ଅରୁଣାଚଳପ୍ରଦେଶ ଲୋକଙ୍କ ଖାଦ୍ୟଚକ୍ର । ସରକାରଙ୍କ ଅପାରଗତା ପାଇଁ ଭାତ ବଦଳରେ ସାପ ଖାଉଛନ୍ତି ଗରିବ ମୂଳବାସିନ୍ଦା ।
ତେବେ ଏ କଥା ଆମେ ନୁହେଁ ବରଂ ଏକ ଜାତୀୟ ଗଣମାଧ୍ୟମ ପ୍ରଥମେ ପ୍ରକାଶ କରିଥିଲା । ଏନଡିଟିଭର ଆର୍ଟିକଲ ଅନୁଯାୟୀ କରୋନା ଲକ୍-ଡାଉନ୍ ପାଇଁ ଅରୁଣାଚଳପ୍ରଦେଶର ଜନଜାତିମାନେ ଖାଇବାକୁ ନ ପାଇ ଅହିରାଜ ସାପକୁ ରାନ୍ଧି ଖାଇଥିଲେ । ଏହି ଆର୍ଟିକଲ୍ ସହ କିଛି ଫଟୋ ବି ଲୋକଙ୍କ ସାମ୍ନାକୁ ଆସିଥିଲା ।
ଏହି ଖବରର ଖୁଲାସା ପରେ ଅରୁଣାଚଳପ୍ରଦେଶ ସରକାର ତୁରନ୍ତ ଏହି ଖବରକୁ ମିଥ୍ୟା ଦର୍ଶାଇ ଟୁଇଟ୍ ଜରିଆରେ ସଫେଇ ଦେଇଥିଲେ ରାଜ୍ୟରେ ଚାଉଳର ଅଭାବ ନାହିଁ । ତିନିମାସର ଖାଦ୍ୟ ମହଜୁଦ ଥିଲାବେଳେ ପ୍ରାୟ ୨୦ହଜାର ଲୋକଙ୍କୁ ମାଗଣା ରାସନ ମିଳିସାରିଛି ।
Dear @ndtv please don’t make stories without verification! I’m dead against hunting and killing of animals so is the State Govt. But to say that there’s no rice left for the people leading to killing of cobra is rubbish! No one hunts snakes for consumption in Arunachal Pradesh. https://t.co/s07bX1rbEq
— Kiren Rijiju (@KirenRijiju) April 20, 2020
ପରେ ଭାରତର ଯୁବ ବ୍ୟାପାର ଓ କ୍ରୀଡାମନ୍ତ୍ରୀ କିରନ୍ ରିଜ୍ଜୁ ବି ତୁରନ୍ତ ଏକ ଟୁଇଟ୍ ଜରିଆରେ ଏନଡିଟିଭିକୁ ବିନା ପ୍ରମାଣ ଥାଇ ଏଭଳି ମିଥ୍ୟା ଗୁଜବ ପ୍ରଚାର ନ କରିବା ପାଇଁ ଚେତାବନୀ ଦେଇଥିଲେ ।
ଏହି ସମସ୍ତ ଘଟଣା ସାମ୍ନାକୁ ଆସିବା ପରେ ଟିମ୍ ଭାଇରାଲ୍ ପୋଷ୍ଟମୋର୍ଟମ ଲାଗିପଡିଥିଲା ଖବରର ସତ୍ୟାସତ୍ୟ ବାହାର କରିବା ପାଇଁ । ସୋସିଆଲ୍ ମିଡିଆରେ ମିଳିଥିବା ଫଟୋକୁ ଗୁଗଲରେ ଅପଲୋଡ କରି ସର୍ଚ୍ଚ କରିବା ମାତ୍ରେ ସାମ୍ନାକୁ ଆସିଥିଲା ଏକାଧିକ ଫେସବୁକ ଆକାଉଣ୍ଟ ଓ ସେଥିରେ ଅପଲୋଡ ହୋଇଥିବା କିଛି ଭିଡିଓ ।
ଲିଟିଲ୍ ନାମକ ଏକ ଫେସବୁକ ପେଜ୍ ଓ ସଂଜୀବ ହଜାରିକା ନାମକ ଦୁଇଟି ଆକାଉଣ୍ଟରୁ ମିଳିଥିଲା ଦୁଇଦୁଇଟି ଭିଡିଓ । ଭିଡିଓକୁ ପ୍ଲେ କରି ଦେଖିବା ପରେ ଅନେକ କିଛି ଦ୍ୱନ୍ଦର ସମାଧାନ ହୋଇଥିଲା ।
ଏହି ଭିଡିଓଟି ଅରୁଣାଚଳପ୍ରଦେଶର ବୋଲି ସ୍ପଷ୍ଟ ହୋଇନଥିଲେ ବି ଏଥିରେ ସାପକୁ ଧରିଥିବା ଲୋକଟି ସ୍ପଷ୍ଟ ଭାବେ ଭୋକକୁ ଶାନ୍ତ କରିବା ପାଇଁ ଅହିରାଜକୁ ଖାଇବାକୁ ମନସ୍ତ କରିଥିବା ନେଇ ପ୍ରକାଶ କରିଛି ।
ସେହିଭଳି ଆଉ ଏକ ଭିଡିଓରେ ଏକାଧିକ ଲୋକ ସାପଟିକୁ ଧରିଥିଲାବଳେ ତାକୁ ଏକ କଦଳୀପତ୍ରରେ ରଖି ଖାଇବା ଉଦ୍ଦେଶ୍ୟରେ ପ୍ରସ୍ତୁତି ଆରମ୍ଭ କରିଥିବା ନେଇ ଦେଖିବାକୁ ମିଳିଥିଲା ।
ମିଳିଥିବା ତଥ୍ୟ ଓ ପ୍ରମାଣକୁ ଆଧାର କରି ଏହା ସ୍ପଷ୍ଟ ହୋଇଛି ଯେ, ସୋସିଆଲ ମିଡିଆରେ ପ୍ରଚାରିତ ବ୍ୟକ୍ତିମାନେ ହିଁ କରୋନାଭାଇରସ ଓ ଲକ୍-ଡାଉନରେ ଭୋକର ତାଡନା ସହିନପାରି ଏକ ଅହିରାଜ ସାପକୁ ଭକ୍ଷଣ ପାଇଁ ଜଙ୍ଗଲରୁ ଧରିଥିଲେ ।
ହେଲେ ସେମାନେ ଅରୁଣାଚଳପ୍ରଦେଶର ବାସିନ୍ଦା ଓ ସାପକୁ ପୋଡି ଖାଇଥିବା ନେଇ ଆମ ନିକଟରେ କୌଣସି ବଳିଷ୍ଠ ପ୍ରମାଣ ନାହିଁ । ତଥାପି ମାଟି ଉପରେ ପଡିଥିବା କିଛି ମାଂସ ଖଣ୍ଡ ଓ ପୋଡାଯାଇଥିବା ଅଂଶ ଅନେକ କିଛି ବୟାନ କରେ ।
