ଭୁବନେଶ୍ୱର: ବାଲିଅନ୍ତା ସୌମ୍ୟରଞ୍ଜନ ସ୍ୱାଇଁଙ୍କ ମୃତ୍ୟୁ ମାମଲାରେ ତଦନ୍ତ ଏବେ ଆଉ ଏକ ନୂଆ ମୋଡ଼ ନେଇଛି। କ୍ରାଇମବ୍ରାଞ୍ଚ ଆଗରେ ମାରାଥନ ଜେରା ପରେ ବାହାରକୁ ଆସିଛନ୍ତି ସୌମ୍ୟରଞ୍ଜନଙ୍କ ବନ୍ଧୁ ନିଶିକାନ୍ତ ମହାନ୍ତି। ତଦନ୍ତକାରୀ ସଂସ୍ଥାକୁ ସେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଓ କିଛି ଅକାଟ୍ୟ ପ୍ରମାଣ ଦେଇଥିବା ସୂଚନା ଦେଇଛନ୍ତି।
ନିଶିକାନ୍ତଙ୍କ କହିବା ଅନୁସାରେ, ସୌମ୍ୟରଞ୍ଜନ ଦୀର୍ଘ ଦିନ ଧରି ଚାକିରି ସମ୍ପର୍କିତ ଚାପ ଓ ମାନସିକ ଅବସାଦରେ ଥିଲେ। ମୃତ୍ୟୁ ପୂର୍ବରୁ ସୌମ୍ୟଙ୍କ ସହ ତାଙ୍କର ହୋଇଥିବା ହ୍ୱାଟ୍ସଆପ୍ ଚାଟିଂର ସ୍କ୍ରିନଶଟ୍ ମଧ୍ୟ ସେ କ୍ରାଇମବ୍ରାଞ୍ଚକୁ ହସ୍ତାନ୍ତର କରିଥିବା କଥା କହିଛନ୍ତି। ଏହି ଚାଟ୍ରୁ ସୌମ୍ୟଙ୍କ ମାନସିକ ସ୍ଥିତି ଓ କେତେକ ବ୍ୟକ୍ତିଗତ ସମସ୍ୟା ସମ୍ପର୍କରେ ସୁରାଗ ମିଳିପାରେ ବୋଲି ଅନୁମାନ କରାଯାଉଛି।
କ୍ରାଇମବ୍ରାଞ୍ଚ ଏବେ ଏହି ସ୍କ୍ରିନଶଟ୍, ଡାଏରୀ ଓ ଅନ୍ୟାନ୍ୟ ଡିଜିଟାଲ ପ୍ରମାଣର ଯାଞ୍ଚ କରୁଛି। ଜେରା ସମୟର ସମ୍ପୂର୍ଣ୍ଣ ଅଡିଓ ଓ ଭିଡିଓ ରେକର୍ଡିଂ ମଧ୍ୟ କରାଯାଇଥିବା ସୂଚନା ମିଳିଛି। ତଦନ୍ତକାରୀ ଅଧିକାରୀମାନେ ସୌମ୍ୟଙ୍କ ମୃତ୍ୟୁ ପୂର୍ବରୁ କଣ ଘଟିଥିଲା, କେଉଁମାନଙ୍କ ସହ ତାଙ୍କର କଥା ହୋଇଥିଲା ଓ ତାଙ୍କ ଉପରେ କୌଣସି ପ୍ରକାର ଚାପ ଥିଲା କି ନାହିଁ, ସେସବୁ ଦିଗରୁ ତଦନ୍ତ ଆଗକୁ ବଢ଼ାଉଛନ୍ତି।
ଅନ୍ୟପଟେ ଏହି ମାମଲାରେ ଜାତୀୟ ମାନବାଧିକାର ଆୟୋଗ, NHRC ମଧ୍ୟ ତଦନ୍ତକୁ ଗୁରୁତ୍ୱ ଦେଇଛି। ରିପୋର୍ଟ ଅନୁସାରେ, ବାଲିଅନ୍ତା ସୌମ୍ୟରଞ୍ଜନ ମୃତ୍ୟୁ ମାମଲାରେ ପୋଲିସ ADG ଦୟାଲ ଗଙ୍ଗୱାର NHRC ଆଗରେ ହାଜର ହୋଇଥିଲେ। ସୌମ୍ୟଙ୍କ ପରିବାର ପୂର୍ବରୁ ମାନସିକ ନିର୍ଯାତନା ଓ ହାରାସମେଣ୍ଟ ନେଇ ଗୁରୁତର ଅଭିଯୋଗ କରିଥିଲେ, ଯାହା ପରେ ନିରପେକ୍ଷ ତଦନ୍ତ ଦାବି ଜୋର ଧରିଥିଲା।
NHRC ପକ୍ଷରୁ ମଧ୍ୟ ଏହି ମାମଲାରେ ଅନେକ ଲୋକଙ୍କୁ ପଚରାଉଚରା କରାଯାଇଛି। ସୌମ୍ୟଙ୍କ ମହିଳା ବନ୍ଧୁ, ଅଭିଯୋଗକାରୀ, ଡାକ୍ତର ଓ ଡ୍ରାଇଭରଙ୍କ ସମେତ କେତେକ ବ୍ୟକ୍ତିଙ୍କ ବୟାନ ରେକର୍ଡ କରାଯାଇଥିବା ରିପୋର୍ଟରେ କୁହାଯାଇଛି। ଆୟୋଗ ଘଟଣା ପୂର୍ବରୁ ଓ ପରେ କଣ ଘଟିଲା, କୌଣସି ମାନବାଧିକାର ଉଲ୍ଲଂଘନ ବା ପ୍ରକ୍ରିୟାଗତ ତ୍ରୁଟି ହୋଇଛି କି ନାହିଁ, ସେଥିରେ ମଧ୍ୟ ଧ୍ୟାନ ଦେଉଛି।
ସୌମ୍ୟରଞ୍ଜନଙ୍କ ମୃତ୍ୟୁକୁ ନେଇ ପରିବାର ଓ ସ୍ଥାନୀୟ ଅଞ୍ଚଳରେ ଅନେକ ପ୍ରଶ୍ନ ଉଠିଛି। ଏହା ଆତ୍ମହତ୍ୟା, ନା ଏହା ପଛରେ ଅନ୍ୟ କୌଣସି ଚାପ କିମ୍ବା ଷଡ଼ଯନ୍ତ୍ର ରହିଛି, ତାହାର ସ୍ପଷ୍ଟ ଉତ୍ତର ଏପର୍ଯ୍ୟନ୍ତ ମିଳିନାହିଁ। କିନ୍ତୁ ବନ୍ଧୁଙ୍କ ବୟାନ, ହ୍ୱାଟ୍ସଆପ୍ ଚାଟ୍, ଡାଏରୀ ଓ ଡିଜିଟାଲ ପ୍ରମାଣ ଯାଞ୍ଚ ପରେ ତଦନ୍ତକୁ ଏକ ନୂଆ ଦିଗ ମିଳିବାର ସମ୍ଭାବନା ରହିଛି।
ଏବେ ସମସ୍ତଙ୍କ ନଜର କ୍ରାଇମବ୍ରାଞ୍ଚ ଓ NHRC ତଦନ୍ତ ଉପରେ ରହିଛି। ସତ କଣ, କିଏ ଦାୟୀ, ଏବଂ ସୌମ୍ୟରଞ୍ଜନଙ୍କ ପରିବାରକୁ କେବେ ନ୍ୟାୟ ମିଳିବ, ଏହି ପ୍ରଶ୍ନର ଉତ୍ତର ତଦନ୍ତ ରିପୋର୍ଟ ହିଁ ଦେବ।
