ପଶ୍ଚିମବଙ୍ଗରେ ଜୁଲାଇ ୩୧ ଯାଏ ବଢ଼ିଲା ଲକଡାଉନ୍

ପଶ୍ଚିମବଙ୍ଗରେ କରୋନା କାୟା ବିସ୍ତାର କରୁଛି । ପ୍ରତିଦିନ ସଂକ୍ରମିତଙ୍କ ସଂଖ୍ୟା ବଢୁଛି । ଏଭଳି ସ୍ଥିତିରେ କରୋନା ଚେନ୍ ଭାଙ୍ଗିବା ପାଇଁ ପୁଣି ଥରେ ଲକଡାଉନ୍ ଅବଧିକୁ ମାସେ ବଢ଼ାଇବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଆସନ୍ତା ଜୁଲାଇ ୩୧ ଯାଏ ରାଜ୍ୟରେ ତାଲାବନ୍ଦ ଅବଧି ବୃଦ୍ଧି ହୋଇଛି ।
ଗତକାଲି ସର୍ବଦଳୀୟ ବୈଠକରେ ଆଲୋଚନା ପରେ ଅବଧି ବଢାଇଛନ୍ତି ମମତା ବାନାର୍ଜୀ । ସର୍ବଦଳୀୟ ବୈଠକ ପରେ ମମତା କହିଥିଲେ, ସବୁ ଦଳର ନେତା ଭିନ୍ନ ଭିନ୍ନ ମତ ରଖିଥିଲେ। କିନ୍ତୁ ଶେଷରେ ଲକଡାଉନ୍ ବଢ଼ାଇବାକୁ ନିଷ୍ପତ୍ତି ହୋଇଥିଲା । ତେବେ କଟକଣାରେ କିଛିଟା କୋହଳ କରାଯିବ ।
ପଶ୍ଚିମବଙ୍ଗରେ ଜୁନ୍ ୩୦ ତାରିଖରେ ଲକଡାଉନ୍ ଅବଧି ଶେଷ ହେଉଥିଲା । ବର୍ତ୍ତମାନ ରାଜ୍ୟରେ ୧୪ ହଜାର ୭୨୮ ଜଣ କରୋନାରେ ସଂକ୍ରମିତ ହୋଇଥିବା ବେଳେ ଆକ୍ଟିଭ୍ କେସ୍ ରହିଛି ୪ ହଜାର ୯୩୦। ସୁସ୍ଥ ହୋଇ ଘରକୁ ଫେରିଛନ୍ତି ୯ ହଜାର ୨୧୮ । ୫୮୦ ଲୋକଙ୍କ ଜୀବନ ନେଇଛି କରୋନା।