ନୂଆଦିଲ୍ଲୀ: ଆଜିକାଲି ନିଦ୍ରାହୀନତା ଏକ ସାଧାରଣ ସମସ୍ୟା ହେବାକୁ ଲାଗିଛି। ଅନେକ ଲୋକ ରାତିରେ ଭଲ ନିଦ ନପାଇ ଅନୁଭବ କରୁଛନ୍ତି ଅସୁସ୍ଥତା, ମାନସିକ ଅବସାଦ ଏବଂ ଦୁର୍ବଳତା। ଏହାର ମୁଖ୍ୟ କାରଣ ମଧ୍ୟରୁ ଗୋଟିଏ ହେଉଛି ରାତିରେ ଶୋଇବା ପୂର୍ବରୁ ଖାଦ୍ୟରେ ଅନିୟମିତତା। ଆସନ୍ତୁ ଜାଣିବା କେଉଁ ଖାଦ୍ୟଗୁଡିକୁ ରାତିରେ ଖାଇବା ଉଚିତ ନୁହେଁ ଯାହା ଆପଣଙ୍କ ନିଦକୁ ବାଧା ଦେଇପାରେ।
ଫାଇବରଯୁକ୍ତ ଖାଦ୍ୟରୁ ଦୂରେଇ ରୁହନ୍ତୁ
ଡ୍ରାଏ ଫ୍ରୁଟସ୍, ବିନ୍ସ, ବ୍ରୋକୋଲି ଏବଂ ଫୁଲକୋବି ଭଳି ଖାଦ୍ୟ ଶରୀର ପାଇଁ ଉପକାରୀ ହେଲେ ମଧ୍ୟ ଏଗୁଡିକରେ ଫାଇବରର ମାତ୍ରା ଅଧିକ ଥାଏ। ରାତିରେ ଏହା ଖାଇବା ଦ୍ୱାରା ପାଚନ ପ୍ରକ୍ରିୟା ଧୀମା ହୁଏ ଏବଂ ନିଦ୍ରାରେ ବାଧା ସୃଷ୍ଟି ହୋଇପାରେ। ତେଣୁ ଏହି ଖାଦ୍ୟଗୁଡିକୁ ଦିନ ସମୟରେ ଖାଇବା ଅଭ୍ୟାସ କରନ୍ତୁ।
ଅମ୍ଳଯୁକ୍ତ ଖାଦ୍ୟ ଏବଂ ହାର୍ଟବର୍ନ
ସାଇଟ୍ରସ୍ ରସ (ଯେପରିକି କମଳା କିମ୍ବା ଲେମ୍ବୁ ରସ), କଞ୍ଚା ପିଆଜ, ଟମାଟୋ ସସ୍ ଏବଂ ହ୍ବାଇଟ୍ ଓ୍ବାଇନ୍ ଭଳି ଅମ୍ଳଯୁକ୍ତ ଖାଦ୍ୟ ରାତିରେ ଖାଇବା ଦ୍ୱାରା ହାର୍ଟବର୍ନ ହୋଇପାରେ। ଏହା ପେଟରେ ଅସୁବିଧା ସୃଷ୍ଟି କରି ଆପଣଙ୍କୁ ରାତି ସାରା ଜାଗ୍ରତ ରଖିପାରେ। ଏହା ଏଡାଇବା ପାଇଁ ରାତିରେ ହାଲୁକା ଏବଂ ଅମ୍ଳମୁକ୍ତ ଖାଦ୍ୟ ଗ୍ରହଣ କରନ୍ତୁ।
ଚିନି ଓ କ୍ୟାଫିନ୍: ନିଦ୍ରାର ଶତ୍ରୁ
ଅଧିକ ଚିନିଯୁକ୍ତ ଖାଦ୍ୟ ଯେପରିକି ଚକୋଲେଟ୍, ଆଇସକ୍ରିମ୍ କିମ୍ବା ମିଠା ଖାଦ୍ୟ ରାତିରେ ଖାଇବା ଦ୍ୱାରା ରକ୍ତରେ ସୁଗାର ଲେବୁଲ୍ ବୃଦ୍ଧି ପାଇଥାଏ, ଯାହା ନିଦକୁ ବାଧା ଦେଇପାରେ। ଏହା ସହିତ କଫି, ଚା, ସୋଡା କିମ୍ବା କ୍ୟାଫିନ୍ଯୁକ୍ତ ଖାଦ୍ୟ ମସ୍ତିଷ୍କକୁ ଉତ୍ତେଜିତ କରି ନିଦ୍ରାହୀନତା ସୃଷ୍ଟି କରେ। ରାତି ୮ଟା ପରେ ଏହି ଖାଦ୍ୟ ଏବଂ ପାନୀୟରୁ ଦୂରେଇ ରହିବା ଉଚିତ।
ମଦ୍ୟପାନରୁ ରୁହନ୍ତୁ ଦୂର
ଅନେକେ ମନେ କରନ୍ତି ଯେ ମଦ୍ୟପାନ ନିଦକୁ ସହଜ କରେ, କିନ୍ତୁ ଏହା ଭୁଲ। ମଦ୍ୟପାନ ନିଦ୍ରାର ଗୁଣବତ୍ତାକୁ ହ୍ରାସ କରେ ଏବଂ ରାତିରେ ବାରମ୍ବାର ଜାଗ୍ରତ ହେବାର କାରଣ ହୋଇପାରେ। ଏହା ସ୍ୱାସ୍ଥ୍ୟ ଉପରେ ମଧ୍ୟ ନକାରାତ୍ମକ ପ୍ରଭାବ ପକାଇଥାଏ।
ମସଲାଯୁକ୍ତ ଖାଦ୍ୟରୁ ସତର୍କ ରୁହନ୍ତୁ
ଅଧିକ ମସଲାଯୁକ୍ତ ଖାଦ୍ୟ ରାତିରେ ଖାଇବା ଦ୍ୱାରା ଶରୀରର ତାପମାତ୍ରା ବୃଦ୍ଧି ପାଇଥାଏ, ଯାହା ନିଦ୍ରାରେ ବାଧା ସୃଷ୍ଟି କରେ। ଏହା ପରିବର୍ତ୍ତେ ରାତିରେ ହାଲୁକା ଏବଂ ସହଜରେ ପଚୁଥିବା ଖାଦ୍ୟ ଗ୍ରହଣ କରନ୍ତୁ। ମସଲାଯୁକ୍ତ ଖାଦ୍ୟକୁ ମଧ୍ୟାହ୍ନ ଭୋଜନରେ ଖାଇବା ଅଭ୍ୟାସ କରନ୍ତୁ।
ନିଦ୍ରାହୀନତାର ଦୂରୀକରଣ ପାଇଁ କ’ଣ କରିବେ?
• ନିୟମିତ ଖାଦ୍ୟସୂଚୀ: ରାତିରେ ହାଲୁକା ଖାଦ୍ୟ ଖାଆନ୍ତୁ ଏବଂ ଶୋଇବାର ଅତିକମରେ ୨-୩ ଘଣ୍ଟା ପୂର୍ବରୁ ଖାଦ୍ୟ ଗ୍ରହଣ କରନ୍ତୁ।
• ମୋବାଇଲରୁ ଦୂରେଇ ରୁହନ୍ତୁ: ରାତିରେ ଅଧିକ ସମୟ ମୋବାଇଲ ବ୍ୟବହାର ନିଦ୍ରାକୁ ବାଧା ଦେଇପାରେ।
• ଶାନ୍ତ ପରିବେଶ: ଶୋଇବା ପୂର୍ବରୁ ଧ୍ୟାନ କିମ୍ବା ହାଲୁକା ପାଠ କରି ମନକୁ ଶାନ୍ତ ରଖନ୍ତୁ।
Comments are closed.