ଭୁବନେଶ୍ୱର: ଆଗକୁ ଆସୁଛି ନୂଆବର୍ଷ । ଅନେକ ଭଲ ଓ ଖରାପ ସ୍ମୃତି ଦେଇଥିବା ୨୦୧୯ ଆଉକିଛି ଦିନ ପରେ ବିଦାୟ ନେବ । ପୁରୁଣା ସ୍ମୃତିକୁ ଛାତିରେ ଚାପି ଧରି ଆମେ ଆଉ ଏକ ନୂତନ ବର୍ଷରେ ପାଦ ରଖିବା ।
ନୂଆ ଉନ୍ମାଦନା ଓ ନୂଆ ଆଶା ନେଇ ପୁଣିଥରେ ଜୀବନରେ ରଙ୍ଗ ଭରିବାକୁ ଚେଷ୍ଟା କରିବା । ନୂଆବର୍ଷର ସବୁକିଛି ନୂଆ ନୂଆ ଲାଗିବ। ପୁରୁଣାକୁ ବିଦାୟକାଳୀନ ଦୁଃଖ ଓ ନୂଆକୁ ସ୍ୱାଗତ କରିବାର ଆନନ୍ଦରେ ମନ ଓ ହୃଦୟ ଖୋଜିବ କିଛି ନୂଆ ସମ୍ଭାଷଣ । ଆଉ ଏହାରି ଭିତରେ ପୁରୁଣାକୁ ଭୁଲି କିଛି ନୂଆ କରିବାର ଅଭିପ୍ରାୟ ବସାବାନ୍ଧିବ ମନରେ ।
ଲୋକେ ଅତୀତରେ ଘଟିଯାଇଥିବା ଖରାପ ଘଟଣାକୁ ଭୁଲି କିଛି ଭଲ କରିବାକୁ ସ୍ଥିର କରନ୍ତି ଏହି ନୂଆବର୍ଷରେ । ଏହାକୁ ‘ନିୟୁ ଇୟର ରିଜଲ୍ୟୁସନ’ ମଧ୍ୟ କୁହାଯାଏ ।
ନୂଆବର୍ଷ ସଂକଳ୍ପ ବା ନିୟୁ ଇୟର ରିଜଲ୍ୟୁସନ’ ମୁଖ୍ୟତଃ ପଶ୍ଚିମ ଦେଶମାନଙ୍କରେ ଏକ ପ୍ରସିଦ୍ଧ ପ୍ରଥା । କିନ୍ତୁ ବର୍ତ୍ତମାନ ଏହା ପୂରା ବିଶ୍ୱରେ ଦେଖାଯାଉଛିି । ନୂଆ ବର୍ଷରେ ପ୍ରତିଜ୍ଞା କରିବାର ପ୍ରଥା ପ୍ରଥମେ ବେବିଲୋନୀୟମାନେ ୪୦୦୦ ବର୍ଷ ପୂର୍ବରୁ ପ୍ରଚଳନ କରିଥିଲେ । ସେମାନେ ନୂଆବର୍ଷ ଆରମ୍ଭରେ ସେମାନଙ୍କ ଦେବତାମାନଙ୍କ ପାଖରେ ଭଲ କାମ କରିବାଲାଗି ପ୍ରତିଜ୍ଞା କରୁଥିଲେ ।
ଏହି ନିୟୁ ଇୟର ରିଜଲ୍ୟୁସନ’ ମାଧ୍ୟମରେ ନିଜ ଜୀବନକୁ ନୂଆକରି ଗଢିବାର ଯୋଜନା ତିଆରି ହୁଏ । ଆଧୁନିକ ଯୁଗର, ଯୁବଗୋଷ୍ଠୀ ଏଥିପାଇଁ ଗ୍ରହଣ କରିଥାନ୍ତି ନୂଆବର୍ଷ ସଂକଳ୍ପ । ଯାହାକୁ ସେମାନେ ଆଗାମୀ ବର୍ଷ ଯାଏଁ ପାଳନ କରିବାକୁ ଶପଥ ମଧ୍ୟ ନେଇଥାନ୍ତି । ଏହି ସଂକଳ୍ପ ସାଧାରଣତଃ ବ୍ୟବହାର ପରିବର୍ତ୍ତନ ଉପରେ ହୋଇଥାଏ । କିଛି ବ୍ୟକ୍ତି ଏହାକୁ ଦୃଢତାର ସହ ପାଳନ କରୁଥିବା ବେଳେ କିଛି ଲୋକ ଏହାକୁ ଭୁଲି ଯିବାର ନଜିର ମଧ୍ୟ ରହିଛି ।
Comments are closed.