ନୂଆଦିଲ୍ଲୀ: ଇଣ୍ଟରନେଟ ସୁବିଧା ନମିଳିଲେ ହ୍ଵାଟସଆପ କାମ କରିବା ବନ୍ଦ ହୋଇଯାଏ । ଏପରି ପରିସ୍ଥିତିରେ, ଅନେକ ଥର ଆପଣ ଗୁରୁତ୍ୱପୂର୍ଣ୍ଣ ଫାଇଲ୍, ଫଟୋ ଏବଂ ଭିଡିଓ ପଠାଇ ପାରନ୍ତି ନାହିଁ । ଏହାକୁ ଦୃଷ୍ଟିରେ ରଖି ହ୍ଵାଟସଆପ୍ ଖୁବ୍ ଶୀଘ୍ର ଏକ ନୂତନ ଫିଚର ଆଣିବାକୁ ଯାଉଛି । ଏହା ସାହାଯ୍ୟରେ ଉପଭୋକ୍ତାମାନେ ବିନା ଇଣ୍ଟରନେଟରେ ଫଟୋ ଏବଂ ଭିଡିଓ ସେୟାର କରିପାରିବେ । ଏହି ସ୍ୱତନ୍ତ୍ର ଫିଚରରେ ଉପଭୋକ୍ତାମାନଙ୍କୁ ସ୍ଥାନୀୟ ନେଟୱାର୍କ ସାହାଯ୍ୟରେ ଫାଇଲ୍, ଫଟୋ ଏବଂ ଭିଡିଓ ସେୟାର କରିବାର ବିକଳ୍ପ ମିଳିବ । ଏଥିରେ ଇଣ୍ଟରନେଟର ବାଇପାସ୍ କରାଯାଏ ।
WABetaInfoର ରିପୋର୍ଟ ଅନୁଯାୟୀ, ହ୍ଵାଟସଆପ୍ ଖୁବ୍ ଶୀଘ୍ର ଲୋକାଲ ଫାଇଲ୍ ସେୟାରିଂ ଫିଚର ଆଣିପାରେ । ଯାହା ସାହାଯ୍ୟରେ ଉପଭୋକ୍ତାମାନେ ଫଟୋ, ଭିଡିଓ ଏବଂ ଡକ୍ୟୁମେଣ୍ଟ୍ ସେୟାର କରିପାରିବେ । ଏଥିପାଇଁ ଉପଭୋକ୍ତାମାନେ ‘ନିଅରବାଏ’ ଫିଚରର ଆବଶ୍ୟକ ପଡିବ । ‘ନିଅରବାଏ’ ଅପସନ ଅନ୍ କରିବା ପରେ, ଉପଭୋକ୍ତାମାନେ ସେମାନଙ୍କର ଫାଇଲ୍ ସେୟାର କରିପାରିବେ । ହ୍ଵଟସଆପ୍ ବ୍ୟବହାରକାରୀଙ୍କୁ ପ୍ରଥମେ ସେଟିଂକୁ ଯାଇ ବ୍ଲୁଟୁଥ୍ ଅନ କରିବାକୁ ପଡିବ । ଏହା ପରେ ସେ ଏହି ଫାଇଲଗୁଡ଼ିକୁ ଅନ୍ୟ ଜଣଙ୍କୁ ପଠାଇ ପାରିବେ ।
ରିପୋର୍ଟ ଅନୁଯାୟୀ, ଏହି ଫିଚରକୁ କାମ କରିବା ପାଇଁ ଆପକୁ ଆଣ୍ଡ୍ରଏଡର ଅନୁମତି ନେବାକୁ ପଡିବ । ଅଫଲାଇନ୍ ଫାଇଲଗୁଡିକ ସେୟାର କରିବାକୁ ଏହା ଆବଶ୍ୟକ ଯେ, ଯେଉଁ ଡିଭାଇସ୍ ସହିତ ଆପଣ ଫାଇଲ୍ ସେୟାର କରୁଛନ୍ତି ସେଥିରେ ଅଫଲାଇନ୍ ଫାଇଲ୍ ସେୟାରିଂ ଫିଚର ମଧ୍ୟ ଉପଲବ୍ଧ ଥିବା ଆବଶ୍ୟକ । ରିପୋର୍ଟ ଅନୁଯାୟୀ, ନିକଟସ୍ଥ ଡିଭାଇସକୁ ଚିହ୍ନଟ କରିବା, କନେକ୍ସନ କରିବା ଏବଂ ତା’ର ସ୍ଥିତି ବିଷୟରେ ଜାଣିବା ପାଇଁ ଅନୁମତି ଆବଶ୍ୟକ ହେବ । ଏପରି ପରିସ୍ଥିତିରେ, ଉପଭୋକ୍ତାମାନେ ଯେତେବେଳେ ଚାହିଁବେ ଏହି ଅନୁମତିକୁ ବନ୍ଦ କରିପାରିବେ । ସମ୍ପ୍ରତି, ଏହି ଫିଚର ଉପରେ କାର୍ଯ୍ୟ ଚାଲିଛି ଏବଂ ଖୁବଶିଘ୍ର ଏହା ସମସ୍ତ ଉପଭୋକ୍ତାଙ୍କ ଫୋନରେ ଉପଲବ୍ଧ ହେବ ।