ଓଡ଼ିଶା ସମ୍ବାଦ ବ୍ୟୁରୋ: ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ମୁଖ୍ୟ ବୈଜ୍ଞାନିକ ସୌମ୍ୟ ସ୍ୱାମୀନାଥନଙ୍କ ଟୁଇଟ ଏବେ ପୁଣିଥରେ ସତର୍କ କରାଇଛି।କରୋନା ଭାଇରସର ନୂଆ ଭାରିଆଣ୍ଟ ବାହାରିବା, ହସ୍ପିଟାଲରେ ଧୀରେ ଧୀରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧିହେବାକୁ ନେଇ କରୋନାର ନୂଆ ଲହର ପାଇଁ ପ୍ରସ୍ତୁତ ହେବାକୁ ଚେତାବନୀ ଦେଇଛନ୍ତି ସ୍ୱାମୀନାଥନ । ଓମିକ୍ରନର ସବ ଭାରିଆଣ୍ଟ ବିଏ.୪ ଏବଂ ବିଏ.୫ ଟିକା ନେଇଥିବା ଲୋକଙ୍କୁ ମଧ୍ୟ ସଂକ୍ରମିତ କରୁଛି ବୋଲି ସୂଚନା ରହିଛି।
ସ୍ୱାମୀନାଥନ ଗୁରୁବାର ଟ୍ୱିଟ୍ କରି କହିଛନ୍ତି, କରୋନାର ନୂଆ ଲହର ପାଇଁ ଆମେ ପ୍ରସ୍ତୁତ ରହିବା ଜରୁରୀ। ଭାଇରସର ବିଭିନ୍ନ ଭାରିଆଣ୍ଟ ରୋଗ ପ୍ରତିରୋଧକ ଶକ୍ତିକୁ ଭେଦ କରିପାରିବାର କ୍ଷମତା ରଖିଛି। ତେଣୁ ଅଧିକ ଲୋକ ସଂକ୍ରମିତ ହେବାର ଆଶଙ୍କା ରହିଛି । ଅଧିକ ରୋଗୀ ଡାକ୍ତରଖାନାରେ ଭର୍ତ୍ତି ହେବାର ସମ୍ଭାବନାକୁ ଆଖି ଆଗରେ ରଖି ଆଗୁଆ ପ୍ରସ୍ତୁତ ହେବାକୁ ପରାମର୍ଶ ଦେଇଛନ୍ତି ସ୍ୱାମୀନାଥନ।
‘ବିଶ୍ୱ ବ୍ୟାଙ୍କ ଗ୍ରୁପ୍’ର ବରିଷ୍ଠ ପରାମର୍ଶଦାତା ଫିଲିପ୍ ଶୋଲେଙ୍କସଏକ ଟୁଇଟର ଜବାବରେ ସ୍ୱାମୀନାଥନ ଏହା କହିଛନ୍ତି। ଫିଲିପ କହିଛନ୍ତି, ‘ଆମେ କୋଭିଡ -୧୯ ର ମୃତ୍ୟୁ ହାରରେ ବିଶ୍ୱ ପରିବର୍ତ୍ତନ ଦେଖୁଛୁ। ମାସ ମାସ ଧରି ମୃତ୍ୟୁ ହାର କମିବା ପରେ ଏହା ପୁଣି ବଢ଼ିବାରେ ଲାଗିଛି। ସେ କହିଛନ୍ତି ଯେ ଏହା ଆଶ୍ଚର୍ଯ୍ୟଜନକ ନୁହେଁ କାରଣ ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ବିଶ୍ୱସ୍ତରରେ ଟୀକାକରଣ କାର୍ଯ୍ୟକ୍ରମ ମଧ୍ୟ ଧିମା ଚାଲିଛି।
ସେ ଆହୁରି କହିଛନ୍ତି ଯେ ଅଧିକ ରୋଜଗାର କରୁଥିବା ଦେଶ ଏବଂ ମଧ୍ୟବିତ୍ତ ଦେଶରେ ମଧ୍ୟ ଏହି କରୋନା ମହାମାରୀ ବ୍ୟାପିବାରେ ଲାଗିଛି। ସେ ଉଲ୍ଲେଖ କରିଛନ୍ତି ଯେ ଅଧିକ ରୋଜଗାର କରୁଥିବା ଦେଶମାନଙ୍କ ମଧ୍ୟରେ ଆମେରିକା, ଫ୍ରାନ୍ସ, ଇଟାଲୀ, ଜର୍ମାନୀ ଏବଂ ଜାପାନ ଏହି ମହାମାରୀର ବାହକ ପାଲଟିଥିବା ବେଳେ ମଧ୍ୟମ ଆୟ ଦେଶ ମଧ୍ୟରେ ବ୍ରାଜିଲ ଆଗରେ ରହିଛି। ଏଠାରେ ମୃତ୍ୟୁ ହାର ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି ବୋଲି ସେ କହିଛନ୍ତି। ଫିଲିପ କହିଛନ୍ତି ଯେ ବିଶ୍ୱ ମୃତ୍ୟୁ ହାରରେ ଆମେରିକା ଏବଂ ବ୍ରାଜିଲ ଆଗରେ ରହିଛନ୍ତି।
ବିଶ୍ୱ ସ୍ୱାସ୍ଥ୍ୟ ସଂଗଠନର ମହାନିର୍ଦ୍ଦେଶକ ଡକ୍ଟର ଟେଡ୍ରୋସ୍ ଆଡାନୋମ୍ ନିକଟରେ କହିଥିଲେ ଯେ କରୋନା ସଂକ୍ରମଣ ବୃଦ୍ଧି ସ୍ୱାସ୍ଥ୍ୟ ବ୍ୟବସ୍ଥା ଏବଂ ସ୍ୱାସ୍ଥ୍ୟ ସେବାରେ ନିୟୋଜିତ ଥିବା କର୍ମଚାରୀଙ୍କ ଉପରେ ଅଧିକ ଚାପ ପକାଉଛି । ଏହାକୁ ନେଇ ସେ ଚିନ୍ତିତ ବୋଲି କହିଥିଲେ। ସେ କହିଛନ୍ତି, ମୃତ୍ୟୁ ସଂଖ୍ୟା ବଢୁଥିବା ନେଇ ମଧ୍ୟ ଚିନ୍ତିତ। ହୁ’ କହିଛି ଯେ ଜୁଲାଇ ୪ ରୁ ଜୁଲାଇ ୧୦ ସପ୍ତାହ ମଧ୍ୟରେ ୯୮୦୦ ରୁ ଅଧିକ ଲୋକ ସଂକ୍ରମଣରେ ମୃତ୍ୟୁ ବରଣ କରିଛନ୍ତି।
Comments are closed.