ନୂଆଦିଲ୍ଲୀ: ବିଶ୍ବ ସ୍ବାସ୍ଥ୍ୟ ସଂଗଠନ ଚେତାବନୀ ଦେଇଛି ଯେ ସମଗ୍ର ବିଶ୍ୱରେ ଓମିକ୍ରନ୍ ବୃଦ୍ଧି ମାମଲା କରୋନାର ଆଉ ଏକ ନୂତନ ଏବଂ ଅଧିକ ମାରାତ୍ମକ ରୂପକୁ ଜନ୍ମ ଦେଇପାରେ। ‘ହୁ’ର କହିବା ମୁତାବକ ଓମିକ୍ରନ୍ ସମଗ୍ର ବିଶ୍ୱରେ ନିଆଁ ପରି ବ୍ୟାପିଚାଲିଛି। ଏହା ପୂର୍ବରୁ ଓମିକ୍ରନ୍ ଏତେଟା ଘାତକ ନୁହେଁ ବୋଲି ବିବେଚନା କରାଯାଉଥିଲା। କିନ୍ତୁ ‘ହୁ’ ର ଜଣେ ବରିଷ୍ଠ ଅଧିକାରୀ ଚେତାବନୀ ଦେଇଛନ୍ତି ଯେ ଯଦି ସତର୍କତା ଅବଲମ୍ବନ ନକରାଯାଏ ତେବେ ସଂକ୍ରମଣ ହାର ବୃଦ୍ଧି ପାଇବା ସହିତ ବିଶ୍ବରେ ଏହାର ପ୍ରତିକୂଳ ପ୍ରଭାବ ପକାଇପାରେ।
ସେ କହିଛନ୍ତି ଯେ ଓମିକ୍ରନ୍ ଯେଉଁ ବେଗରେ ବଢୁଛି, ସେତେ ଅଧିକ ବେଗରେ ବ୍ୟାପୁଛି। ତେଣୁ ଏହା ଆଶଙ୍କା କରାଯାଉଛି ଯେ ଏହା କରୋନାର ଆଉ ଏକ ରୂପ ସୃଷ୍ଟି କରିପାରେ। ତଥ୍ୟ ଅନୁଯାୟୀ ଓମିକ୍ରନ୍ ଡେଲ୍ଟା ଭାରିଆଣ୍ଟ ଅପେକ୍ଷା କମ୍ ବିପଜ୍ଜନକ ବୋଲି ଜଣାପଡ଼ିଛି। କିନ୍ତୁ ପରବର୍ତ୍ତୀ ସମୟରେ ଏହା ଅଧିକ ମାରାତ୍ମକ ହୋଇପାରେ ଏହାକୁ ଏଡାଇ ଦିଆଯାଇପାରିବ ନାହିଁ।
