ନୂଆଦିଲ୍ଲୀ: ଦେଶର ଆଗାମୀ ରାଷ୍ଟ୍ରପତିକୁ ନେଇ ଚାଲିଛି ଚର୍ଚା । ଏନଡିଏ କି ୟୁପିଏ ପକ୍ଷରୁ ଏନେଇ କେହି ମୁହଁ ଖୋଲିନାହାଁନ୍ତି । ତେବେ ସୋସିଆଲ ମିଡିଆରେ ଅନେକଙ୍କ ନାମ ଆଲୋଚନା ହେଉଛି । ସବୁଠୁ ଅଧିକ ଆଲୋଚନା ହେଉଛି ଆରିଫ ମହମ୍ମଦ ଖାନଙ୍କୁ ନେଇ । ବିଭିନ୍ନ ସମୟରେ ଖୋଲା ମତ ଦେଉଥିବାରୁ ତାଙ୍କୁ ସମସ୍ତେ ଏହି ପଦପାଇଁ ବର୍ତ୍ତମାନ ସମୟରେ ଭଲ ପ୍ରାର୍ଥୀ ହେବେ ବୋଲି ମତ ରଖୁଛନ୍ତି । ବର୍ତମାନ ଚାଲିଥିବା ମହମ୍ମଦଙ୍କ ବିବାଦ ଉପରେ ଆରିଫ ଦେଇଥିବା ବୟାନକୁ ନେଇ ମଧ୍ୟ ଆଲୋଚନା ହେଉଛି ।
ବିଶେଷ କରି ଏହି ପ୍ରସଙ୍ଗରେ ଭାରତର କ୍ଷମା ପ୍ରାର୍ଥନା ପାଇଁ କତାରର ଦାବିକୁ ସେ ଗୁରୁତ୍ୱପୂର୍ଣ୍ଣ ନୁହେଁ ବୋଲି କହି ଖଣ୍ଡନ କରିଛନ୍ତି। ସେ କହିଛନ୍ତି ଯେ ଲୋକମାନେ ପ୍ରଧାନମନ୍ତ୍ରୀ ଏବଂ ଆରଏସଏସ ପ୍ରତି ଧ୍ୟାନ ଦେବା ଉଚିତ ଯେଉଁମାନେ ଭାରତର ସଂସ୍କୃତି ପରମ୍ପରାକୁ ଦୃଢ଼ କରିବାକୁ କାମ କରୁଛନ୍ତି ।
ପ୍ରଥମ କଥା ହେଉଛି ଗତ 8 ବର୍ଷର ମୋଦିଙ୍କ ଶାସନ ମଧ୍ୟରେ ବିଜେପି ସମର୍ଥିତ ନେତା ଏବଂ କାର୍ଯ୍ୟକର୍ତା ଯେଉଁଭଳି ଭାବରେ ମୁସଲମାନମାନଙ୍କୁ ଟାର୍ଗେଟ କରି ରାଜନୀତି କରୁଥିବା ଅଭିଯୋଗ ହୋଇଛି, ଏହାକୁ କାଟିବା ପାଇଁ ମୁସଲମାନ ଚେହେରାକୁ ବିଚାର କରାଯାଇପାରେ।
ଦ୍ବିତୀୟ କଥା ହେଉଛି ଆରିଫ ମହମ୍ମଦ ଖାନ ଜଣେ ଜ୍ଞାନି ଏବଂ ବିଶିଷ୍ଟ ପଣ୍ଡିତ ମଧ୍ୟ । ବିବାଦୀୟ କଥାକୁ ସେ ପ୍ରମାଣ ଏବଂ ତଥ୍ୟାତ୍ମକ ଯୁକ୍ତି ଦ୍ବାରା ଉପସ୍ଥାପନ କରିଥାନ୍ତି । ଯାହା ଦ୍ବାରା ତାଙ୍କ କଥାରେ ବ୍ୟତିକ୍ରମ ନଥାଏ ।
ତୃତୀୟ କଥା ହେଉଛି ସେ ମୁସଲମାନଙ୍କ ମଧ୍ୟରେ ମୋଦି ସରକାର ଆଣିବାକୁ ଚାହୁଁଥିବା ସଂସ୍କାର ପ୍ରକ୍ରିୟାକୁ ମଧ୍ୟ ସମର୍ଥନ କରନ୍ତି । ତିନି ତଲାକ ଦେଶରେ ରଦ୍ଦକୁ ସେ ମଧ୍ୟ ଦୃଢ଼ ଭାବେ ସମର୍ଥନ କରିଆସିଛନ୍ତି ।
ଚତୁର୍ଥ କଥା ହେଉଛି ବର୍ତମାନ କେରଳର ରାଜ୍ୟପାଳ ଥିବା ଆରିଫ ମହମ୍ମଦ ଖାନଙ୍କର ଦୀର୍ଘଦିନର ରାଜନୈତିକ ଅଭିଜ୍ଞତା ରହିଛି। ଆରିଫ ମହମ୍ମଦ ଖାନ ଶାହ ବାନୋ ମାମଲାରେ ସରକାରଙ୍କ କାର୍ଯ୍ୟରେ ସହମତ ନ ହେବା ପରେ 1986 ରେ ରାଜୀବ ଗାନ୍ଧୀ ସରକାରରେ ତାଙ୍କ ମନ୍ତ୍ରୀ ପଦରୁ ଇସ୍ତଫା ଦେବା ପରେ ମୁସଲମାନମାନଙ୍କ ମଧ୍ୟରେ ବିକାଶଶୀଳ ଚେହେରା ଭାବରେ ସୁନାମ ଅର୍ଜନ କରିଛନ୍ତି ।
5ମ କଥା ହେଲା ସେ ମୋଦିଙ୍କ ଜଣେ ବଡ଼ ସମର୍ଥକ ଏବଂ ଆରିଫ ମହମ୍ମଦ ମଧ୍ୟ ସବୁ ସମୟରେ ମୋଦୀ ସରକାରଙ୍କ ନୀତିକୁ ପ୍ରଶଂସା କରି ଆସୁଛନ୍ତି ।
ଷଷ୍ଟ କଥା ହେଉଛି ପୂର୍ବରୁ ମଧ୍ୟ ବିଜେପି ‘ଅବଦୁଲ କଲାମ’ଙ୍କୁ ରାଷ୍ଟ୍ରପତି କରିଛି । ତେଣୁ ମୁସଲମାନଙ୍କ ହୃଦୟ ଜିତିବା ପାଇଁ ବିଜେପି 2024 ନିର୍ବାଚନ ପୂର୍ବରୁ ରଣନୀତି କରିପାରେ ।
ସବୁଠୁ ବଡ଼ କଥା ହେଲା ବିଭିନ୍ନ ସୋସିଆଲ ମିଡିଆରେ ବିଶେଷ କରି ଟୁଇଟରରେ ଲୋକମାନେ ମୋଦୀ ସରକାରଙ୍କୁ ଆରିଫ ମହମ୍ମଦଙ୍କୁ ରାଷ୍ଟ୍ରପତି ଭାବରେ ନିଯୁକ୍ତ କରିବାକୁ ପରାମର୍ଶ ଦେଉଛନ୍ତି। ଲୋକମାନେ ପଚାରୁଛନ୍ତି ଯେ ଆରିଫ ମହମ୍ମଦ ଖାନ ପିଏମ ମୋଦୀଙ୍କ ଦ୍ୱିତୀୟ କଲାମ ହେବେ କି?
ଆପଣ ଜାଣନ୍ତି 2002 ମସିହାରେ ପ୍ରଧାନମନ୍ତ୍ରୀ ଥିବା ଅଟଳ ବିହାରୀ ବାଜପେୟୀ , ତାଙ୍କ ସରକାର ସମୟରେ ରାଷ୍ଟ୍ରପତିଙ୍କ ପାଇଁ ଡକ୍ଟର ଏପିଜେ ଅବଦୁଲ କଲାମଙ୍କ ନାମ ପ୍ରସ୍ତାବ ଦେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ।
ଏବେ କଳ୍ପନାଜଳ୍ପନା ଚାଲିଛି ଯେ ମୋଦୀ ସଦାବେଳେ ଲୋକଙ୍କୁ ଆଶ୍ଚର୍ଯ୍ୟ କଲାଭଳି ପୂର୍ବରୁ ନିଷ୍ପତ୍ତି ମାନ ନେଇଛନ୍ତି ଏବଂ ଏବେ ମୋଦି ସରକାର ମଧ୍ୟ ସମାନ ନିଷ୍ପତ୍ତି ନେଇପାରନ୍ତି। ଏହାର କାରଣ ହେଉଛି ବିଜେପି ସରକାର ଆରିଫ ମହମ୍ମଦଙ୍କୁ ଏକ ପ୍ରଗତିଶୀଳ ମୁସଲମାନ ଚେହେରା ବୋଲି ବିବେଚନା କରୁଛନ୍ତି। ତେଣୁ ଆଉ କିଛି ଦିନ ଅପେକ୍ଷା କଲେ ସ୍ପଷ୍ଟ ହୋଇପାରିବ ଦେଶର ରାଷ୍ଟ୍ରପତି କିଏ ହେଉଛନ୍ତି ।