ମାଲକାନଗିରି: ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର ଖଇରାଗଡ଼ ପୋଲିସକୁ ଏକ ବଡ଼ ସଫଳତା ମିଳିଛି। ୧୭ ଲକ୍ଷ ଟଙ୍କା ପୁରସ୍କାର ରାଶି ଥିବା ଜଣେ ମହିଳା ନକ୍ସଲ ପୋଲିସ ଅଧିକ୍ଷକଙ୍କ ନିକଟରେ ଆତ୍ମସମର୍ପଣ କରିଛନ୍ତି। କମଳା ସୋଡି ନାମକ ଏହି ମହିଳା ଜଣକ ୩୦ ବର୍ଷ ବୟସର ଏବଂ ଜଣେ ହାର୍ଡକୋର ନକ୍ସଲ ଭାବରେ ନକ୍ସଲ ସଂଗଠନରେ ସକ୍ରିୟ ଥିଲେ।
ଏହି ହାର୍ଡକୋର ମହିଳା ନକ୍ସଲବାଦୀ କମଳା ସୋଡି ଆଇଜି ଅଭିଷେକ ଏବଂ ପୋଲିସ ଅଧିକ୍ଷକ ଲକ୍ଷ୍ୟ ଶର୍ମାଙ୍କ ଉପସ୍ଥିତିରେ ଖଇରାଗଡ଼ର ପୋଲିସ ଅଧିକ୍ଷକ କାର୍ଯ୍ୟାଳୟରେ ଆତ୍ମସମର୍ପଣ କରିଛନ୍ତି।
ମହିଳା ନକ୍ସଲ ଜଣକ ୨୦୧୧ ମସିହାରୁ ମାଓ ସଂଗଠନରେ ସକ୍ରିୟ ଭାବରେ ସାମିଲ ଥିଲେ ଏବଂ ମଧ୍ୟପ୍ରଦେଶ, ମହାରାଷ୍ଟ୍ର, ଛତିଶଗଡ଼ର MMC ଜୋନରେ ସାଂଗଠନିକ ଏବଂ ହିଂସାତ୍ମକ କାର୍ଯ୍ୟକଳାପରେ ସାମିଲ ଥିଲେ।
ନକ୍ସଲବାଦୀଙ୍କ ଉପରେ ସୁରକ୍ଷା ବାହିନୀର ବର୍ଦ୍ଧିତ ଚାପ ଏବଂ ସରକାରଙ୍କ ନୀତି ଦ୍ୱାରା ପ୍ରଭାବିତ ହୋଇ ମହିଳା ନକ୍ସଲ ଆତ୍ମସମର୍ପଣ କରିଛନ୍ତି ।
ଆତ୍ମସମର୍ପଣ କରି ମୁଖ୍ୟସ୍ରୋତକୁ ଫେରିବା ପରେ ପୁରସ୍କୃତ ମହିଳା ନକ୍ସଲଙ୍କୁ ତୁରନ୍ତ ₹୫୦,୦୦୦ ପ୍ରୋତ୍ସାହନ ରାଶି ପ୍ରଦାନ କରାଯାଇଥିଲା। ସରକାରଙ୍କ ପୁନର୍ବାସ ନୀତି ୨୦୨୫ ଅନୁଯାୟୀ ସେ ଅନ୍ୟାନ୍ୟ ସୁବିଧା ମଧ୍ୟ ପାଇବେ। କମଳା ସୋଡି ମୂଳତଃ ସୁକମା ଜିଲ୍ଲାର ଆରାଲାମପାଲି କୋଣ୍ଟାର ବାସିନ୍ଦା।
Comments are closed.