ହକିରେ ଭାରତ ହାରିଲା: ମେରୀ କମ୍‌, ମନିକାଙ୍କ କମାଲ

ଟୋକିଓ: ଟୋକିଓ ଅଲିମ୍ପିକ୍ସରେ ଏ ପର୍ଯ୍ୟନ୍ତ ପ୍ରଦର୍ଶନ ବିଚାରକୁ ନେଲେ ମହିଳା ଖେଳାଳିମାନେ ସମ୍ମାନ ରଖିଛନ୍ତି । ହକିରେ ଭାରତୀୟ ପୁରୁଷ ଦଳ ଶୋଚନୀୟ ଭାବେ ଅଷ୍ଟ୍ରେଲିଆ ନିକଟରୁ ୧-୭ରେ ପରାଜିତ ହୋଇଛି । ଟିମ ବ୍ରାଣ୍ଡ, ଜୋଶୁଆ ବେଲ୍ଟଜ, ଡାନିଏଲ ଜେମ୍ସ, ଫ୍ଲାୟନ ଆଣ୍ଡ୍ର‌୍ୟୁ, ଜେରେମି ଥମାସ, ବ୍ଲାକ ଗୋଭର୍ସ ଅଷ୍ଟ୍ରେଲିଆ ପକ୍ଷରୁ ଗୋଲ ସ୍କୋର କରିଥିବା ବେଳେ ଭାରତ ତରଫରୁ ଦିଲପ୍ରୀତ ସିଂ ଏକମାତ୍ର ଗୋଲଟି ଦେଇଥିଲେ ।ମେରୀ କମ୍ ଜିତିଲେ: ମହିଳା ବକ୍ସିଂରେ ଭାରତର ମେରୀ କମ୍ ରାଉଣ୍ଡ ଅଫ ୩୨ରେ ଡୋମିନିକ ରିପବ୍ଲିକର ମିଗୁଏଲିନା ହେର୍ଣ୍ଣାଣ୍ଡିଜ ଗ୍ରାସିଆଙ୍କୁ ୪-୧ରେ ହରାଇ ଦେଇଛନ୍ତି । ତେବେ ପୁରୁଷ ବକ୍ସିଂରେ ୬୩ କିଗ୍ରା କାଟାଗୋରୀରେ ମନୀଷ କୌଶିକ ବ୍ରିଟେନର ଲ୍ୟୁକ ମ୍ୟାକକର୍ମିକଙ୍କଠାରୁ ପରାଜିତ ହୋଇଛନ୍ତି ।
ମନିକା କମାଲ: ଟେବୁଲ ଟେନିସ ଦ୍ୱିତୀୟ ରାଉଣ୍ଡରେ ଭାରତର ମନିକା ବାତ୍ରା ୟୁକ୍ରେନର ମାର୍ଗେଟା ପେସୋତ୍ସକାଙ୍କୁ ପରାଜିତ କରିଛନ୍ତି । ଆରମ୍ଭରୁ ୨ଟି ସେଟ ପଛରେ ଥିଲେ ମଧ୍ୟ ମନିକା ଚମତ୍କାର ପ୍ରତ୍ୟାବର୍ତନ କରିବା ସହ ମ୍ୟାଚ ଜିତି ନେଇଥିଲେ । ପୁରୁଷ ସିଙ୍ଗଲ୍ସରେ ସାଥିୟାନ ଗନାସେକରନ ହଂକଂର ସିୟୁ ଲାମଙ୍କଠାରୁ ପରାଜିତ ହୋଇଛନ୍ତି ।
ଶୁଟିଂ, ଜିମ୍ନାଷ୍ଟିକ୍ସରେ ନିରାଶ: ପୁରୁଷ ଶୁଟିଂ ସ୍କିଟ ଇଭେଂଟ କ୍ୱାଲିଫିକେଶନ ରାଉଣ୍ଡରେ ଅଗନ୍ଦ ବୀର ସିଂ ବାଜୱା ୧୧ତମ ଓ ମୌରାଜ ଅହମ୍ମଦ ଖାଁ ୨୫ତମ ସ୍ଥାନରେ ରହିଛନ୍ତି । ସୋମବାର ଏହାର ଦ୍ୱିତୀୟ କ୍ୱାଲିଫିକେଶନ ରାଉଣ୍ଡ ହେବ । ସେହିପରି ଆର୍ଟିଷ୍ଟିକ୍ସ ଜିମ୍ନାଷ୍ଟିକ୍ସରେ ପରିଣତି ନାୟକ ଫାଇନାଲରେ ପଂହଚିବାରେ ବିଫଳ ହୋଇଛନ୍ତି ।