ଭୁବନେଶ୍ୱର: ଟୋକିଓ ଅଲିମ୍ପିକ୍ସ ଆଉ ହାତ ଗଣତି କିଛି ଦିନ ପରେ ଆରମ୍ଭ ହେବ । ରେସଲିଂ ଅଲିମ୍ପିକ୍ସରେ ସର୍ବଦା ଆକର୍ଷଣର କେନ୍ଦ୍ର ସାଜିଛି । ସେଥିପାଇଁ ୧୯୦୦ ବ୍ୟତୀତ ଅନ୍ୟ ସମସ୍ତ ସଂସ୍କରଣରେ ଏହି ଇଭେଂଟ ସାମିଲ ହୋଇଛି । ଏଥର ଭାରତର ୮ ପହିଲୱାନ ଅଂଶଗ୍ରହଣ କରୁଛନ୍ତି । ସୁମିତ ମଲିକ ଡୋପ ଟେଷ୍ଟରେ ଧରାପଡିବା ପରେ ତାଙ୍କ ଖେଳିବା ସମ୍ଭାବନା କ୍ଷୀଣ ରହିଛି । ଆଧୁନିକ ଅଲିମ୍ପିକ୍ସର ପ୍ରଥମ ସଂସ୍କରଣ ୧୮୯୬ରେ ରେସଲିଂକୁ ସାମିଲ କରାଯାଇଥିଲା । ଗ୍ରୀକୋ ରୋମାନ ଓ ଫ୍ରିଷ୍ଟାଇଲ ବିଭାଗରେ ପ୍ରତିଯୋଗୀମାନେ ଅଂଶଗ୍ରହଣ କରିଥାନ୍ତି । ଏଥର ରେସଲିଂରେ ୧୮ ସ୍ୱର୍ଣ୍ଣପଦକ ହାତେଇବା ପାଇଁ ପହଲିମାନମାନେ ଉଦ୍ୟମ କରିବେ । ଭାରତ ପକ୍ଷରୁ ଟୋକିଓ ଅଲିମ୍ପିକ୍ସ ପୁରୁଷ ବିଭାଗରେ ରବି କୁମାର ଦାହିୟା ( ୫୭କିଗ୍ରା), ବଜରଙ୍ଗ ପୁନିଆ (୬୫କିଗ୍ରା), ଦୀପକ ପୁନିଆ (୮୬ କିଗ୍ରା), ସୁମିତ (୧୨୫ କିଗ୍ରା) ଏବଂ ମହିଳା ବିଭାଗରେ ସୀମା ବିସଲା (୫୦ କିଗ୍ରା), ଭିନେଶ ଫୋଗଟ (୫୫କିଗ୍ରା), ଅଂଶୁ ମଲିକ (୫୭କିଗ୍ରା) ଓ ସୋନମ ମଲିକ (୬୨ କିଗ୍ରା) ବିଭାଗରେ ଅଂଶ ଗ୍ରହଣ କରୁଛନ୍ତି ।
ଭାରତର ପଦକ ବିଜେତା ରେସଲର: ୧୯୫୨ରେ କେଡି ଯାଦବ ଭାରତ ପକ୍ଷରୁ ରେସଲିଂରେ ପ୍ରଥମ ପଦକ ଜିତିଥିଲେ । ଏ ପର୍ଯ୍ୟନ୍ତ ଭାରତୀୟ ରେସଲର ୫ଟି ବ୍ରୋଞ୍ଜ ପଦକ ଜିତିଛନ୍ତି । ସୁଶୀଲ କୁମାର (୨୦୦୮, ୨୦୧୨), ଯୋଗେଶ୍ୱର ଦତ (୨୦୧୨), ସାକ୍ଷୀ ମଲିକ (୨୦୧୬) ଏହି ସଫଳତା ହାସଲ କରିଛନ୍ତି । ସୁଶୀଲ ୨ଟି ପଦକ ଏବଂ ସାକ୍ଷୀ ପ୍ରଥମ ମହିଳା ଭାବେ ଅଲିମ୍ପିକ୍ସରେ ଏହି ଗୌରବ ଅର୍ଜନ କରିଛନ୍ତି । ସୋଭିଏଟ ୟୁନିୟନ ରେସଲିଂରେ ସର୍ବାଧିକ ୬୨ ସ୍ୱର୍ଣ୍ଣ ଜିତିଥିବା ବେଳେ ଆମେରିକା ଓଭରାଲ ୧୩୩ ପଦକ ଜିତିଛି ।
Comments are closed.