ଢେଙ୍କାନାଳ: ଏକ ବିବାହ ଶୋଭାଯାତ୍ରା ସମୟରେ ଅଘଟଣ ଘଟିଯାଇଛି। ଢେଙ୍କାନାଳ ଜିଲ୍ଲାର ଏକ ଗାଁରେ ଡିଜେ ମ୍ୟୁଜିକ୍ ସିଷ୍ଟମ୍ ଥିବା ଏକ ଗାଡ଼ି ଉପରେ ଥିବା ବିଦ୍ୟୁତ୍ ତାରକୁ ସ୍ପର୍ଶ କରିବାରୁ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ଏହାବ୍ୟତୀତ ଅନ୍ୟ ପାଞ୍ଚ ଜଣ ଗୁରୁତର ଆହତ ହୋଇଛନ୍ତି।
ସୂଚନା ଅନୁଯାୟୀ, ଶନିବାର ରାତିରେ ତୁମୁସିଂହା ଥାନା ଅଧୀନସ୍ଥ କୁଆଁଗସାହିରେ ଏହି ଘଟଣା ଘଟିଛି। ସ୍ଥାନୀୟ ଲୋକଙ୍କ କହିବାନୁଯାୟୀ ବରଯାତ୍ରୀମାନେ ଡିଜେ ସଙ୍ଗୀତର ତାଳେତାଳେ ନାଚୁଥିଲାବେଳେ ସାଉଣ୍ଡ ସିଷ୍ଟମ୍ ବହନ କରୁଥିବା ଗାଡ଼ିଟି ଉପରେ ଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲା। ଯାହାଫଳରେ ଅତି କମରେ ଛଅ ଜଣ ବ୍ୟକ୍ତି ତୁରନ୍ତ ବିଦ୍ୟୁତ୍ ଆଘାତର ଶିକାର ହୋଇଥିଲେ। ସେମାନଙ୍କ ମଧ୍ୟରୁ କେତେକ ଘଟଣାସ୍ଥଳରେ ହିଁ ପଡ଼ିଯାଇଥିଲେ।
ସେମାନଙ୍କୁ ପ୍ରଥମେ ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ସେମାନଙ୍କ ମଧ୍ୟରୁ ଜଣଙ୍କୁ ପରେ ଢେଙ୍କାନାଳର ଜିଲ୍ଲା ମୁଖ୍ୟାଳୟ ଡାକ୍ତରଖାନା (ଡିଏଚଏଚ୍)କୁ ସ୍ଥାନାନ୍ତର କରାଯାଇଥିଲା।ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟ ପାଞ୍ଚ ଜଣଙ୍କ ଅବସ୍ଥା ଗୁରୁତର ବୋଲି କୁହାଯାଇଛି। ତେବେ ଘଟଣାର ତଦନ୍ତ ଆରମ୍ଭ ହୋଇଥିବା ଜଣାପଡିଛି।
Comments are closed.