Nepal floods: ୯ ଦିନ ପରେ ସୁଡ଼ଙ୍ଗ ଭିତରୁ ଜୀବନ୍ତ ଉଦ୍ଧାର ୨ ଜଣ! ନେପାଳ ବନ୍ୟାରେ ମୃତ୍ୟୁସଂଖ୍ୟା ୧୨୮୨, ଏବେ ବି ୫ ହଜାର ନିଖୋଜ…
କାଠମାଣ୍ଡୁ: ନେପାଳରେ ଅଗଷ୍ଟ ୨୬ରେ ଆସିଥିବା ଭୟଙ୍କର ବନ୍ୟା ପରେ ଚାଲିଥିବା ଉଦ୍ଧାର ଅଭିଯାନ ମଧ୍ୟରେ ଆସିଛି ଏକ ଆଶ୍ୱସ୍ତିକର ଖବର। ଭୟଙ୍କର ବନ୍ୟାର ୯ ଦିନ ପରେ ତ୍ରିଶୁଳୀ-୩ ‘ଏ’ ଜଳବିଦ୍ୟୁତ ପ୍ରକଳ୍ପର ସୁଡ଼ଙ୍ଗ ଭିତରୁ ଦୁଇ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଛି। ନେପାଳୀ ସେନା ପକ୍ଷରୁ ଏହି ସୂଚନା ଦିଆଯାଇଛି।
ଶୁକ୍ରବାର ସକାଳେ ଖୋଜାଖୋଜି ଓ ଉଦ୍ଧାର କାର୍ଯ୍ୟ ଚାଲିଥିବା ସମୟରେ ସୁଡ଼ଙ୍ଗ ଭିତରୁ ଜଣେ ବ୍ୟକ୍ତିଙ୍କ ସ୍ୱର ଶୁଣାଯାଇଥିବା ସଙ୍କେତ ମିଳିଥିଲା। ଏହାପରେ ଉଦ୍ଧାରକାରୀ ଦଳ ଅଭିଯାନକୁ ଜୋରଦାର କରିଥିଲେ। ଶେଷରେ ଦୁଇ ଜଣଙ୍କୁ ସୁରକ୍ଷିତ ଭାବେ ବାହାରକୁ ଅଣାଯାଇଛି। ଉଦ୍ଧାର ହୋଇଥିବା ବ୍ୟକ୍ତିଙ୍କ ମଧ୍ୟରେ ସପ୍ତରୀ ଜିଲ୍ଲାର ସଞ୍ଜୟ ସାହ ଅଛନ୍ତି। ସେ ତ୍ରିଶୁଳୀ ହାଇଡ୍ରୋପାୱାର ପ୍ରକଳ୍ପରେ ମେକାନିକାଲ ଇଞ୍ଜିନିୟର ଭାବେ କାମ କରୁଥିଲେ। ଅନ୍ୟ ଜଣଙ୍କ ନାମ କବୀର ମହର୍ଜନ ଏବଂ ସେ ଏହି ପ୍ରକଳ୍ପରେ ସୁପରଭାଇଜର ଭାବେ କାର୍ଯ୍ୟରତ ଥିଲେ।
ନେପାଳରେ ବନ୍ୟା ଓ ଏହା ପରବର୍ତ୍ତୀ ବିପର୍ଯ୍ୟୟରେ ମୃତ୍ୟୁସଂଖ୍ୟା ୧୨୮୨ରେ ପହଞ୍ଚିଛି। ଉଦ୍ଧାରକାରୀ ଦଳ ପ୍ରଭାବିତ ଅଞ୍ଚଳରୁ ଅଧିକ ମୃତଦେହ ଉଦ୍ଧାର କରିବା ପରେ ଏହି ସଂଖ୍ୟା ବଢ଼ିଛି। ଜରୁରୀକାଳୀନ ଦଳ ଏପର୍ଯ୍ୟନ୍ତ ୧୨ ହଜାରରୁ ଅଧିକ ଲୋକଙ୍କୁ ଉଦ୍ଧାର କରିସାରିଛନ୍ତି। ତଥାପି ପ୍ରାୟ ୫ ହଜାର ଲୋକ ଏବେ ବି ନିଖୋଜ ଥିବା ଅଧିକାରୀମାନେ କହିଛନ୍ତି। ଉଦ୍ଧାର ଓ ଖୋଜାଖୋଜି ଅଭିଯାନ ଏବେ ବି ଜାରି ରହିଛି। ଅନେକ ପ୍ରଭାବିତ ଅଞ୍ଚଳରେ ପରିସ୍ଥିତି ଚ୍ୟାଲେଞ୍ଜିଂ ରହିଥିବାରୁ ଉଦ୍ଧାରକାରୀମାନେ ସତର୍କତାର ସହ କାମ କରୁଛନ୍ତି।
ଏହି ଦୁର୍ଘଟଣାରେ ମୃତକଙ୍କ ପରିଚୟ ନିଶ୍ଚିତ କରିବାରେ ଭାରତ ସହାୟତାର ହାତ ବଢ଼ାଇଛି। ଭାରତର ବିଦେଶ ମନ୍ତ୍ରଣାଳୟ (MEA) କହିଛି ଯେ, ନେପାଳରେ ମିଳୁଥିବା ଅଜଣା ମୃତଦେହଗୁଡ଼ିକର ପରିଚୟ ପାଇଁ ଭାରତରେ ରହୁଥିବା ନିକଟ ସମ୍ପର୍କୀୟଙ୍କ DNA ପ୍ରୋଫାଇଲିଂ କରାଯାଇପାରିବ।
ଏଥିପାଇଁ ବାପା, ମା’, ପୁଅ, ଝିଅ କିମ୍ବା ଭାଇ-ଭଉଣୀଙ୍କ ଭଳି ନିକଟ ରକ୍ତ ସମ୍ପର୍କୀୟମାନେ କେନ୍ଦ୍ରୀୟ ଫରେନସିକ୍ ସାଇନ୍ସ ଲାବୋରେଟୋରୀ (CFSL), ରାଜ୍ୟ ଫରେନସିକ୍ ସାଇନ୍ସ ଲାବୋରେଟୋରୀ (SFSL), ନ୍ୟାସନାଲ ଫରେନସିକ୍ ସାଇନ୍ସେସ୍ ୟୁନିଭର୍ସିଟି (NFSU) କିମ୍ବା DNA ପ୍ରୋଫାଇଲିଂ ସୁବିଧା ଥିବା NABL-ମାନ୍ୟତାପ୍ରାପ୍ତ ଲାବରେ ନିଜର ଜୈବିକ ନମୁନା ଦେଇପାରିବେ।
ନେପାଳ ପୋଲିସର ପରାମର୍ଶ ଅନୁଯାୟୀ, ମୃତକଙ୍କ ପରିଚୟ ପାଇଁ ଅଟୋସୋମାଲ STR DNA ପ୍ରୋଫାଇଲିଂ ବ୍ୟବହାର କରାଯାଇପାରିବ। DNA ପ୍ରୋଫାଇଲ୍ ପ୍ରସ୍ତୁତ ହେବା ପରେ ନେପାଳ କର୍ତ୍ତୃପକ୍ଷଙ୍କ ଆବଶ୍ୟକ ତଥ୍ୟ ସହ ତାହା ପଠାଯାଇପାରିବ, ଯାହାକୁ ଅଜଣା ମୃତଦେହର DNA ପ୍ରୋଫାଇଲ୍ ସହ ମେଳ କରାଯିବ।
ସହାୟତା ଓ ସମନ୍ୱୟ ପାଇଁ ଭାରତୀୟ ଦୂତାବାସ, କାଠମାଣ୍ଡୁ ମଧ୍ୟ ସହଯୋଗ କରୁଛି। ନେପାଳରେ ଚାଲିଥିବା ଏହି ବିଶାଳ ଉଦ୍ଧାର ଅଭିଯାନ ମଧ୍ୟରେ ଦୁଇ ଜଣଙ୍କ ୯ ଦିନ ପରେ ଜୀବନ୍ତ ଉଦ୍ଧାର ଆଶାର ଏକ ବଡ଼ କିରଣ ସୃଷ୍ଟି କରିଛି।