ଭୁବନେଶ୍ୱର: ଚଳିତ ଆର୍ଥିକ ବର୍ଷରେ କେନ୍ଦ୍ରୀୟ ସଡ଼କ ଏବଂ ଭିତ୍ତିଭୂମି ପାଣ୍ଠି (CRIF) ପକ୍ଷରୁ ପାଣ୍ଠି ପ୍ରଦାନରେ ବିଳମ୍ବ କାରଣରୁ ଓଡ଼ିଶାରେ ୪୨ଟି ପ୍ରମୁଖ ରାସ୍ତା ଏବଂ ସେତୁଗୁଡିକର କାମ ବନ୍ଦ ହୋଇ ପଡିରହିଛି।
ସୂଚନା ଅନୁଯାୟୀ, ଗତ ୬ ମାସ ମଧ୍ୟରେ କେନ୍ଦ୍ର ତରଫରୁ କୌଣସି ପାଣ୍ଠି ପ୍ରଦାନ କରାଯାଇ ନ ଥିବାରୁ ୪୨ଟି ପ୍ରମୁଖ ପ୍ରକଳ୍ପରେ କାମ ବନ୍ଦ ହୋଇଯାଇଛି। ସେହିପରି ନିର୍ମାଣକାରୀ ଠିକାଦାର ବା ଠିକା ସଂସ୍ଥାମାନଙ୍କୁ ସେମାନଙ୍କର ପ୍ରାପ୍ୟ ମଧ୍ୟ ଦିଆଯାଉନାହିଁ। ସେମାନଙ୍କୁ ପାଣ୍ଠି ପ୍ରଦାନରେ ବିଳମ୍ବ ହେଉଥିବାରୁ ସେମାନେ ଚିଠି ମାଧ୍ୟମରେ ପୂର୍ତ୍ତ ବିଭାଗର ବରିଷ୍ଠ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ସେମାନଙ୍କ ପ୍ରାପ୍ୟ ପାଇ ପରିନାହାନ୍ତି। ଡିସେମ୍ବର ୨୬ରେ କେନ୍ଦ୍ର ସରକାର ରାଜ୍ୟ ସରକାରଙ୍କୁ ୧୬୫.୬୬କୋଟି ଟଙ୍କା ରାଜ୍ୟ ସରକାରଙ୍କୁ ପ୍ରଦାନ କରିଥିଲେ। ରାଜ୍ୟ ସରକାରଙ୍କୁ ଟଙ୍କା ଦେବା ସତ୍ତ୍ବେ ମଧ୍ୟ ନିର୍ମାଣକାରୀ ସଂସ୍ଥାଙ୍କୁ କୌଣସି ବକେୟା ଟଙ୍କା ଦିଆଯାଇ ନାହିଁ। ଏଭଳି ଅବ୍ୟବସ୍ଥାକୁ ନେଇ ନିର୍ମାଣକାରୀ ସଂସ୍ଥାମାନେ ନିଜର ଅସନ୍ତୋଷ ପ୍ରକାଶ କରିବା ସହ ତୁରନ୍ତ ବକେୟା ପ୍ରାପ୍ୟ ଦେବାକୁ ଦାବି କରିଛନ୍ତି। ଠିକାଦାରମାନଙ୍କ ବକେୟା ପ୍ରାପ୍ୟ ବିଳମ୍ବକୁ ନେଇ ଅସନ୍ତୋଷକୁ ଦୃଷ୍ଟିରେ ରଖି, ଇଞ୍ଜିନିୟର-ଇନ୍-ଚିଫ୍ (ସିଭିଲ୍)-କମ୍-ରୋଡ୍ସ ଅକ୍ଟୋବର ୨୦୨୪ ରେ ୨୦୨୪ -୨୫ ମଧ୍ୟରେ CRIF ଅଧୀନରେ ପାଣ୍ଠି ପ୍ରଦାନ କରିବାକୁ ପୂର୍ତ୍ତ ବିଭାଗ ପ୍ରମୁଖ ସଚିବଙ୍କୁ ଚିଠି ଲେଖିଥିଲେ।
ଏହାପରେ ସେପ୍ଟେମ୍ବର ୩୦, ୨୦୨୪ ସୁଦ୍ଧା ୨୫୦ ରାସ୍ତା ଏବଂ ୫୬ ସେତୁ ସମେତ ମୋଟ ୩୦୬ ପ୍ରକଳ୍ପ ପାଇଁ ୫୨୯୧ .୪୧ କୋଟି ଟଙ୍କା ମଞ୍ଜୁର କରାଯାଇଥିଲା । କେନ୍ଦ୍ର ସରକାରଙ୍କ ଦ୍ୱାରା ପ୍ରଦାନ କରାଯାଇଥିବା ମୋଟ ପାଣ୍ଠି ୩୬୧୦. ୦୪ କୋଟି ଟଙ୍କା ଥିବା ବେଳେ, ୨୧୬ ରାସ୍ତା ଏବଂ ୪୪ ସେତୁ ସମେତ ୨୬୦ ପ୍ରକଳ୍ପ ସମ୍ପୂର୍ଣ୍ଣ ହୋଇଛି ବୋଲି ଚିଠିରେ ଉଲ୍ଲେଖ ରହିଛି। ବର୍ତ୍ତମାନ ନିର୍ମାଣଧୀନ ଅବସ୍ଥାରେ ଥିବା ପ୍ରକଳ୍ପ ସଂଖ୍ୟା ୪୨ ଥିବା ବେଳେ ଏଥିରେ ୩୩ ରାସ୍ତା ଏବଂ ୯ ସେତୁ ଅନ୍ତର୍ଭୁକ୍ତ ରହିଛି। କେନ୍ଦ୍ର ସୂଚନା ଅନୁସାରେ, ଚାଲୁଥିବା ପ୍ରକଳ୍ପଗୁଡ଼ିକର ମୋଟ ବକେୟା ରାଶି ୧୩୨୮.୫୦ କୋଟି ଟଙ୍କାରୁ ୨୦୨୪-୨୫ ମଧ୍ୟରେ ୧୧୩.୩୫ କୋଟି ଟଙ୍କା ପ୍ରଦାନ କରାଯାଇଛି।
ସମୟ ଅବଧି ମଧ୍ୟରେ ସାରିବା ଏବଂ ଚୁକ୍ତିଭିତ୍ତିକ ମାମଲା ଏଡାଇବା ପାଇଁ, ୨୦୨୪-୨୫ ମଧ୍ୟରେ CRIF ଅଧୀନରେ ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ କିମ୍ବା ସଡ଼କ ପରିବହନ ଏବଂ ରାଜପଥ ଦ୍ୱାରା ଅତି କମରେ ୬୦୦ କୋଟି ଟଙ୍କା ମଞ୍ଜୁର କରାଯିବା ଆବଶ୍ୟକ ରହିଛି । ଆବଶ୍ୟକୀୟ ଅନୁଦାନ ଯଥା ଶୀଘ୍ର ଯୋଗାଇ ଦିଆଯିବା ନେଇ ସୂଚନା ମିଳିଛି।