ଡେରାଡୁନ୍: ବଦ୍ରିନାଥରେ ବଡ ଧରଣର ହିମସ୍ଖଳନ । ଫସିଛନ୍ତି ୪୦ରୁ ଅଧିକ ଶ୍ରମିକ । ମିଳିଥିବା ସୂଚନା ମୁତାବକ, ଆଜି ଉତ୍ତରାଖଣ୍ଡର ବଦ୍ରିନାଥ ଏବଂ ଏହାର ଆଖପାଖ ଅଞ୍ଚଳରେ ହିମସ୍ଖଳନ ହେବାରୁ ୪୭ ଜଣ ଏବେ ବି ଫସି ରହିଛନ୍ତି । ଅନୂନ୍ୟ ୧୦ ଜଣ ଶ୍ରମିକ ଉଦ୍ଧାର କରାଯାଇଛି । ଫସି ରହିଥିବା ଶ୍ରମିକମାନେ ଏକ ଘରୋଇ ସଂସ୍ଥାରେ କାମ କରୁଥିବା ଜଣେ ଠିକାଦାରଙ୍କ ଦ୍ୱାରା ନିୟୋଜିତ ହୋଇଥିବା ସୂଚନା ମିଳିଛି ।
ପ୍ରବଳ ତୁଷାରପାତ ପରେ, ବଦ୍ରିନାଥ ବାହାରେ ମାନା ଗ୍ରାମ ନିକଟରେ ଏକ ହିମସ୍ଖଳନ ଘଟିଥିଲା । ୫୭ ଜଣ ଶ୍ରମିକ ଘଟଣାସ୍ଥଳରେ ଉପସ୍ଥିତ ରହିଥିବା ବେଳେ ଏପର୍ଯ୍ୟନ୍ତ ୧୦ ଜଣଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଛି । ଏହାକୁ ନେଇ ଜିଲ୍ଲା ମାଜିଷ୍ଟ୍ରେଟ୍ ସନ୍ଦୀପ ତିୱାରୀ କହିଛନ୍ତି, ମାନା ଗ୍ରାମ ଏବଂ ମାନା ପାସ୍ ମଧ୍ୟରେ ଥିବା ବିଆରଓ ସ୍ଥାନ ନିକଟରେ ହିମସ୍ଖଳନ ଘଟିଥିଲା, ଯେଉଁଠାରେ ଶ୍ରମିକମାନେ ସେନା ଗତିବିଧିକୁ ସହଜ କରିବା ପାଇଁ ରାସ୍ତାରୁ ବରଫ ସଫା କରିବାରେ ନିୟୋଜିତ ରହିଥିଲେ । ହିମସ୍ଖଳନ ବେଳେ ୧୦ ଜଣ ଖସି ଆସିବାରେ ସମର୍ଥ ହୋଇଥିବା ବେଳେ ଏବେବି ୪୭ ଜଣ ଫସିରହିଛନ୍ତି । ତେବେ ଏପର୍ଯ୍ୟନ୍ତ କୌଣସି କ୍ଷୟକ୍ଷତିର ରିପୋର୍ଟ ମିଳିନାହିଁ ।
ଶ୍ରମିକ ମାନଙ୍କ ଉଦ୍ଧାର ପାଇଁ ପ୍ରଶାସନ ଏବଂ ବିଆରଓ ଦଳ ସହିତ ଉଦ୍ଧାର କାର୍ଯ୍ୟ ଜାରି ରହିଛି । ଆଇଟିବିପି ଏବଂ ଗରୱାଲ ସ୍କାଉଟ୍ ସ୍ଥାନୀୟ ଲୋକଙ୍କ ସହିତ ଉଦ୍ଧାର କାର୍ଯ୍ୟରେ ସକ୍ରିୟ ଭାବରେ ସାମିଲ ରହିଛନ୍ତି । ଏଥିସହିତ ରାଜ୍ୟ ବିପର୍ଯ୍ୟୟ ସହାୟତା ବାହିନୀ ମୁଖ୍ୟଙ୍କ ନିର୍ଦ୍ଦେଶ ଅନୁଯାୟୀ ଦ୍ରୁତ ଗତିରେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଜୋଶୀମଠର ନିକଟତମ ପୋଷ୍ଟରୁ ଏକ ଉଦ୍ଧାର ଦଳକୁ ଘଟଣାସ୍ଥଳକୁ ପଠାଯାଇଛି । ଏହା ସହିତ, ଡେରାଡୁନର ଗୌଚର ଏବଂ ସହସ୍ତ୍ରଧାରାରେ ଉଚ୍ଚ-ଉଚ୍ଚତା ଉଦ୍ଧାର ଦଳକୁ ମଧ୍ୟ ପ୍ରସ୍ତୁତ ରଖାଯାଇଛି ।
ଅନ୍ୟପଟେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ, ଘଟଣା ଜାଣିବା ପରେ ଦୁଃଖ ପ୍ରକାଶ କରିବା ସହ ଶ୍ରମିକଙ୍କ ଶୀଘ୍ର ଉଦ୍ଧାର ପାଇଁ ପାର୍ଥନା କରିଛନ୍ତି ।
Comments are closed.