ବରମୁଣ୍ଡା ବସ୍ ଷ୍ଟାଣ୍ଡ ପରିଦର୍ଶନ କଲେ ୫-ଟି ଅଧ୍ୟକ୍ଷ, ଡିସେମ୍ବର ଶେଷ ସୁଦ୍ଧା କାମ ସାରିବାକୁ ନିର୍ଦ୍ଦେଶ
ଭୁବନେଶ୍ବର: ଆଜି (ଶୁକ୍ରବାର) ବରମୁଣ୍ଡା ଠାରେ ଆନ୍ତଃ ରାଜ୍ୟ ବସ୍ ଟର୍ମିନାଲ୍ (ଆଇଏସବିଟି) ବସ୍ ଷ୍ଟାଣ୍ଡ ପରିଦର୍ଶନ କରିଛନ୍ତି ନବୀନ ଓଡ଼ିଶା ଅଧ୍ୟକ୍ଷ ୫-ଟି ଅଧ୍ୟକ୍ଷ ଭିକେ ପାଣ୍ଡିଆନ୍ । ବରମୁଣ୍ଡା ବସଷ୍ଟାଣ୍ଡରେ ଚାଲିଥିବା ନିର୍ମାଣ କାର୍ଯ୍ୟର ସମୀକ୍ଷା କରିବା ସହ ଏଥିରେ ନିୟୋଜିତ ଅଧିକାରୀମାନଙ୍କୁ ଡିସେମ୍ବର ଶେଷ ସୁଦ୍ଧା କାମ ସାରିବାକୁ ନିର୍ଦ୍ଦେଶ ଦେଇଛନ୍ତି ।
ଆଜି ଅପରାହ୍ନରେ ବରମୁଣ୍ଡା ବସଷ୍ଟାଣ୍ଡ ପରିଦର୍ଶନ କରିବା ସମୟରେ ପାଣ୍ଡିଆନ୍ ଏହି ପ୍ରକଳ୍ପର କାର୍ଯ୍ୟଗୁଡିକର ସମୀକ୍ଷା କରିଥିଲେ, ଯାହା କେବଳ ଓଡିଶା ନୁହେଁ ଅନ୍ୟ ରାଜ୍ୟମାନଙ୍କ ପାଇଁ ସହରରେ ଏକ ଗୁରୁତ୍ୱପୂର୍ଣ୍ଣ ଗମନାଗମନ ଭିତ୍ତିଭୂମି ହେବ । ଯାତ୍ରୀମାନଙ୍କ ସୁବିଧା ଯେପରିକି ବିଶ୍ରାମାଗାର, ବସ୍ ଷ୍ଟାଣ୍ଡର ସ୍ବଚ୍ଛତା, ବସ୍ ରହିବା ପାଇଁ ପର୍ଯ୍ୟାପ୍ତ ସ୍ଥାନ, ଆହାର କେନ୍ଦ୍ର, ଆଲୋକୀକରଣ, ଶୌଚାଳୟ ଏବଂ ଅନ୍ୟାନ୍ୟ ସୁବିଧା ବିଷୟରେ ସେ ପଚାରି ବୁଝିଥିଲେ ।
ଏହା ସହ ସ୍ମାର୍ଟ ଆଇଟି ଚାଳିତ ଭିତ୍ତିଭୂମି ଗ୍ରହଣ କରିବା, ସ୍ଥାନୀୟ କଳା ବ୍ୟବହାର କରି ଯାତ୍ରୀମାନଙ୍କ ପାଇଁ ସୃଜନଶୀଳ ଓ ରୋଚକ ପରିବେଶ ବିକାଶ କରିବା, ବସ୍ ଡ୍ରାଇଭରମାନଙ୍କ ପାଇଁ ରହିବା ସ୍ଥାନ, ଅଟୋ ରିକ୍ସା, ଟ୍ୟାକ୍ସି ଏବଂ ଦୁଇ ଚକିଆ ଯାନ ପାଇଁ ପର୍ଯ୍ୟାପ୍ତ ପାର୍କିଂ ସ୍ଥାନ ନିଶ୍ଚିତ କରିବାକୁ ପାଣ୍ଡିଆନ୍ ଏଜେନ୍ସିମାନଙ୍କୁ ପରାମର୍ଶ ଦେଇଛନ୍ତି । ଏହି ପ୍ରକଳ୍ପରେ ଟ୍ୟାକ୍ସି ଆସୋସିଏସନ୍, ବସ୍ ମାଲିକ ସଂଘ ଏବଂ ଓଏସଆରଟିସି ପରି ସମସ୍ତ ଅଧିକାରୀଙ୍କୁ ଏଥିରେ ସାମିଲ ହେବାକୁ ସେ କହିଥିଲେ ।
ଏହି ବସ୍ ଷ୍ଟାଣ୍ଡ ପରିଦର୍ଶନ ସମୟରେ ୫-ଟି ଅଧ୍ୟକ୍ଷଙ୍କ ସହ ବିଡିଏ ଉପାଧ୍ୟକ୍ଷ ବଲବନ୍ତ ସିଂ, ବିଏମସି ଅଧିକାରୀ, ବିଡିଏ ଅଧିକାରୀ ଉପସ୍ଥିତ ରହିଥିଲେ । ୧୫.୫ ଏକର ଜାଗାରେ ବରମୁଣ୍ଡା ବସ୍ ଟର୍ମିନାଲ ନିର୍ମାଣାଧୀନ ରହିଛି ।