ମାର୍ଚ୍ଚ ୧ରୁ ୫୦ରୁ ଉର୍ଦ୍ଧ୍ୱ ବୟସ୍କ ବ୍ୟକ୍ତିଙ୍କୁ କରୋନା ଟିକା ଦେବାକୁ ପ୍ରସ୍ତୁତ ହେଉଛନ୍ତି କେନ୍ଦ୍ର ସରକାର

ନୂଆଦିଲ୍ଲୀ: ସ୍ୱାସ୍ଥ୍ୟକର୍ମୀ ଏବଂ ଆଗଧାଡ଼ିର ଯୋଦ୍ଧାଙ୍କୁ କରୋନା ଟିକା ପରେ ଏବେ ବୟସ୍କ ବ୍ୟକ୍ତିଙ୍କୁ ଟିକା ଦେବାକୁ କେନ୍ଦ୍ର ସରକାର ପ୍ରସ୍ତୁତ ହେଉଛନ୍ତି । ୫୦ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କୁ ଏହି ଟିକା ଦିଆଯିବ । ଏନେଇ କେନ୍ଦ୍ରୀୟ ସ୍ୱାସ୍ଥ୍ୟ ସଚିବ ରାଜେଶ୍‌ ଭୂଷଣ ପ୍ରତି ରାଜ୍ୟର ମୁଖ୍ୟ ସାଶନ ସଚିବଙ୍କ ନିକଟକୁ ପତ୍ର ଲେଖିଛନ୍ତି ।

ସବୁ ପ୍ରକାରର ସ୍ୱାସ୍ଥ୍ୟ କେନ୍ଦ୍ରଗୁଡ଼ିକରେ ବ୍ୟାପକ ପ୍ରସ୍ତୁତି କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଏହାସହିତ ମାର୍ଚ୍ଚର ପ୍ରଥମ ସପ୍ତାହରୁ ବୟସ୍କ ବ୍ୟକ୍ତି ଏବଂ ରୋଗିଣା ବ୍ୟକ୍ତିଙ୍କୁ କରୋନା ଟିକା ଦିଆଯିବା ନେଇ ପ୍ରସ୍ତୁତ ରହିବାକୁ ଉଲ୍ଲେଖ କରିଛନ୍ତି ।

ଏହି ପତ୍ରରେ ବ୍ୟାପକ ଟିକାକରଣର ଆରମ୍ଭ କରିବା ପାଇଁ କେନ୍ଦ୍ର ସରକାର ନିଷ୍ପତ୍ତି ନେଇଥିବା ବେଳେ ଏଥିରେ ହସ୍ପିଟାଲ୍‌, ମେଡିକାଲ୍‌ କଲେଜ୍‌, ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ସହିତ ଉପକେନ୍ଦ୍ର ପର୍ଯ୍ୟନ୍ତ ସବୁ ସ୍ୱାସ୍ଥ୍ୟକେନ୍ଦ୍ର ଗୁଡ଼ିକରେ ସୁବ୍ୟବସ୍ଥା କରିବାକୁ କୁହାଯାଇଛି । ଟିକାକରଣ ପାଇଁ ଏହି କେନ୍ଦ୍ର ଗୁଡ଼ିକରେ କୋଲ୍ଡଚେନ୍‌ର ପ୍ରସ୍ତୁତ କରିବା ଲାଗି ନିର୍ଦ୍ଦେଶ ଦିଆଯାଇଛି ।

ରାଜ୍ୟଗୁଡ଼ିକର ମୁଖ୍ୟ ସଚିବଙ୍କୁ ଏହା କୁହାଯାଇଛି, ସେମାନେ ସପ୍ତାହରେ ଅତିକମ୍‌ରେ ଚାରିଦିନ ଟିକାକରଣ କାର୍ଯ୍ୟକ୍ରମ କରିବା ପାଇଁ ସୁନିଶ୍ଟିତ କରାନ୍ତୁ । ଏହା ମାର୍ଚ୍ଚ ମାସ ୧ ତାରିଖରୁ ଆରମ୍ଭ କରାଯାଉ । ସମସ୍ତ ସଚିବ ସେମାନଙ୍କ ରାଜ୍ୟର ସ୍ୱାସ୍ଥ୍ୟ ବିଭାଗକୁ ଏନେଇ ନିର୍ଦ୍ଦେଶନାମା ଜିରି କରିବାକୁ ଏଥିରେ କୁହାଯାଇଛି । ଏଥିରେ ପାଖାପାଖି ୨୭ କୋଟି ଲୋକଙ୍କୁ ଟିକାକରଣ କରାଯିବା ନେଇ ନିଷ୍ପତ୍ତି ହୋଇଥିବା ଜଣାପଡ଼ିଛି ।