ନୂଆଦିଲ୍ଲୀ: ଉତ୍ତର-ପୂର୍ବାଞ୍ଚଳର ତିନିଟି ରାଜ୍ୟରେ ହୋଇଥିବା ନିର୍ବାଚନ ଫଳାଫଳ ସାମ୍ନାକୁ ଆସିଛି | ନାଗାଲାଣ୍ଡ ଓ ତ୍ରିପୁରାରେ ବିଜେପିକୁ ବହୁମତ ମିଳିଥିବାବେଳେ ମେଘାଳୟରେ ବିଜେପି ନ୍ୟାସନାଲ ପିପୁଲସ ପାର୍ଟିକୁ ସମର୍ଥନ ଦେଇଛି । ଉତ୍ତର-ପୂର୍ବାଞ୍ଚଳର ତିନିଟି ରାଜ୍ୟରେ କଂଗ୍ରେସର ଶୋଚନୀୟ ପରାଜୟ ପରେ ଏହାକୁ ନେଇ ମୁହଁ ଖୋଲିଛନ୍ତି କଂଗ୍ରେସ ନେତା ଜୟରାମ ରମେଶ । ସେ ଟ୍ୱିଟ କରି କହିଛନ୍ତି ଯେ ୩୩ ବର୍ଷ ପରେ କଂଗ୍ରେସ ମହାରାଷ୍ଟ୍ରର କସବାପୈଠ ଜିତିଛି, ୫୧ ବର୍ଷ ପରେ କଂଗ୍ରେସ ପଶ୍ଚିମବଙ୍ଗରେ ସାଗାରଦିଘି ଆସନ ଜିତିଛି, ତ୍ରିପୁରାରେ କଂଗ୍ରେସ ୦ ରୁ ୫ ଟି ଆସନ, ମେଘାଳୟର ୫ଟି ଆସନ (୨୧ଜଣ ବିଧାୟକଙ୍କୁ ଅପହରଣ କରିବା ପରେ ମଧ୍ୟ) ଜିତିଛି ।
ଆଉ ରମେଶଙ୍କ ଏହି ଟ୍ୱିଟର ଜବାବ ଦେଇଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା । ସେ ଲେଖିଛନ୍ତି, ତିନିଟି ରାଜ୍ୟରେ ହୋଇଥିବା ପରାଜୟକୁ ଏକ ଉପଲବ୍ଧି ଭାବେ ବର୍ଣ୍ଣନା କରି ଅନ୍ଧକାରରେ ବଞ୍ଚିବାର କ୍ଷମତାକୁ ପ୍ରଶଂସା କରାଯିବା ଆବଶ୍ୟକ! ଅନ୍ୟପଟେ ମେଘାଳୟରେ ଏନପିପି ଏବଂ ବିଜେପି ମଧ୍ୟରେ ହୋଇଥିବା ଗଠବନ୍ଧନକୁ ନେଇ ଜୟରାମ ରମେଶ ଆରୋପ ଲଗାଇଛନ୍ତି ଯେ ତିନି ଜଣ ‘ଏସ’ ଖେଳ କରିଦେଇଛନ୍ତି । ଏହି ତିନିଜଣ ‘ଏସ’ ହେଉଛନ୍ତି (ଅମିତ) ଶାହା, (ହିମନ୍ତ ବିଶ୍ୱ) ଶର୍ମା ଏବଂ (କୋନରାଡ) ସାଙ୍ଗମା । ରମେଶ ଟ୍ୱିଟରରେ ଲେଖିଛନ୍ତି ଯେ ଏହି ତିନିଜଣ ଏସ ଶାହା, ଶର୍ମା ଏବଂ ସାଙ୍ଗମାଙ୍କ ଦ୍ୱାରା ଏହା ଏକ ସୁଚିନ୍ତିତ ଖେଳ ଖେଳାଯାଇଛି ।