ନୂଆଦିଲ୍ଲୀ: ଆଇପିଏଲ୍ର ୧୬ ତମ ସଂସ୍କରଣରେ ସନ୍ରାଇଜର ହାଇଦ୍ରାବାଦକୁ ଶକ୍ତ ଝଟ୍କା। ଆହତ କାରଣରୁ ଆଇପିଏଲ୍ର ବାକି ସମସ୍ତ ମ୍ୟାଚ୍ରୁ ବାଦ ପଡ଼ିଲେ ଅଲ୍ରାଉଣ୍ଡ ୱାଶିଂଟନ ସୁନ୍ଦର। ଚଳିତ ସଂସ୍କରଣରେ ଦଳ ପାଇଁ ସେ ଗୋଟିଏ ବି ମ୍ୟାଚ୍ ଖେଳିପାରିବେ ନାହିଁ। ମାଂସପେଶୀରେ ଆହତ (ହାମଷ୍ଟ୍ରିଙ୍ଗ ଇଞ୍ଜୋରୀ) ଲାଗିବାରୁ ତାଙ୍କୁ ଚଳିତ ସଂସ୍କରଣର ବାକି ମ୍ୟାଚ୍ରୁ ବାଦ ଦିଆଯାଇଛି। ଏନେଇ ହାଇଦ୍ରାବାଦ ପକ୍ଷରୁ ଟ୍ୱିଟ୍ କରି ସୂଚନା ଦିଆଯାଇଛି। ତେବେ ସୁନ୍ଦରଙ୍କ ବଦଳରେ କିଏ ଖେଳିବେ ସେ ନେଇ ଦଳ ପକ୍ଷରୁ କୌଣସି ସୂଚନା ଦିଆଯାଇ ନାହିଁ।
ଜବରଦସ୍ତ ଅଲ୍ରାଉଣ୍ଡର ୱାଶିଂଟନ ସୁନ୍ଦର ଚଳିତ ସଂସ୍କରଣରେ କିନ୍ତୁ ଭଲ ପ୍ରଦର୍ଶନ କରିପାରୁ ନଥିଲେ। ଏପର୍ଯ୍ୟନ୍ତ ଖେଳାଯାଇଥିବା ୭ଟି ମ୍ୟାଚ୍ରେ ସୁନ୍ଦର ୫ଟିରେ ବ୍ୟାଟିଂ କରି ୧୫ ରନ୍ ହାର ଓ ୧୦୦ ଷ୍ଟ୍ରାଇକ୍ ରେଟ୍ ସହ ମାତ୍ର ୬୦ ରନ୍ କରିପାରିଛନ୍ତି। ଚଳିତ ସଂସ୍କରଣରେ ସୁନ୍ଦରଙ୍କ ସର୍ବାଧିକ ସ୍କୋର ୨୪ ରହିଛି।
ସେହିପରି ବୋଲିଂରେ ମଧ୍ୟ ସୁନ୍ଦର ନିରାଶାଜନକ ପ୍ରଦର୍ଶନ କରିଛନ୍ତି। ସେ ୭ଟି ମ୍ୟାଚ୍ରେ ୧୭୪ ଓଭର ବୋଲିଂ କରିଥିବା ବେଳେ ମାତ୍ର ୩ ୱିକେଟ୍ ନେଇଛନ୍ତି। ଗୁରୁତ୍ୱପୂର୍ଣ୍ଣ କଥା ହେଲା ସୁନ୍ଦରଙ୍କୁ ଗୋଟିଏ ମ୍ୟାଚ୍ରେ ୩ଟି ୱିକେଟ୍ ମିଳିଥିବାବା ବେଳେ ବାକି ୬ ମ୍ୟାଚ୍ରେ ସେ ଗୋଟିଏ ବି ୱିକେଟ୍ ନେଇପାରି ନାହାନ୍ତି।
ଚଳିତ ସଂସ୍କରଣରେ ସନ୍ରାଇଜର ହାଇଦ୍ରାବାଦର ପ୍ରଦର୍ଶନ ନିରାଶାଜନକ ରହିଛି। ଦଳ ୭ ମ୍ୟାଚ୍ରେ ମାତ୍ର ଦୁଇଟି ଜିତିପାରିଛି। ପଏଣ୍ଟ ଟେବଲୁରେ ଦଳ ୪ ପଏଣ୍ଟ ସହ ନବମ ସ୍ଥାନରେ ରହିଛି।
Comments are closed.