ପାରଳାଖେମୁଣ୍ଡି: ଲାଞ୍ଚ ଓ ଅପହରଣ ଅଭିଯୋଗରେ ଜଣେ ମହିଳା ସବ୍-ଇନ୍ସପେକ୍ଟର (ଏସ୍ଆଇ) ନିଲମ୍ବିତ ହୋଇଛନ୍ତି। ନିଲମ୍ବିତ ଏସ୍ଆଇ ଜ୍ୟୋତ୍ସ୍ନା ରାୟ ଆଠ ମାସ ତଳେ ମୋହନା ଥାନାରେ କାର୍ଯ୍ୟରତ ଥିବା ବେଳେ ନୁଦ୍ରୁଜ ଗ୍ରାମର ପ୍ରିତି ମାଝୀଙ୍କ ଠାରୁ ୨୦ ହଜାର ଟଙ୍କା ଲାଞ୍ଚ ନେଇଥିବା ଅଭିଯୋଗ ହୋଇଥିଲା। ଗଞ୍ଜେଇ ଚାଲାଣ ପାଇଁ ଜବତ ହୋଇଥିବା ପ୍ରିତିଙ୍କ ଅଟୋରିକ୍ସାକୁ ସୁରକ୍ଷିତ ରଖିବା ପାଇଁ ଏହି ଲାଞ୍ଚ ଦିଆଯାଇଥିବା ଅନୁମାନ କରାଯାଉଛି।
ଲାଞ୍ଚ ନେବା ସତ୍ତ୍ୱେ ଜ୍ୟୋତ୍ସ୍ନା ପ୍ରତିଶୃତି ମୁତାବକ ଗାଡି ଛାଡିବାରେ ବିଫଳ ହେବାରୁ ମାର୍ଚ୍ଚ ୨୫ ତାରିଖରେ ତାଙ୍କ ବିରୋଧରେ ଥାନାରେ ଏତଲା ଦେଇଥିଲେ। ଅଭିଯୋଗ ପରେ ତତ୍କାଳୀନ ଥାନା ଇନ୍ସପେକ୍ଟର ଇନଚାର୍ଜ (ଆଇଆଇସି)ଙ୍କ ପକ୍ଷରୁ ମଧ୍ୟସ୍ଥତା ଉଦ୍ୟମ କରାଯାଇଥିଲା, ଫଳରେ ଜ୍ୟୋତ୍ସ୍ନା ପ୍ରିତିଙ୍କୁ ଟଙ୍କା ଫେରସ୍ତ କରିଥିଲେ ଏବଂ ପରବର୍ତ୍ତୀ ସମୟରେ ତାଙ୍କ ଅଟୋରିକ୍ସାକୁ ଛାଡ଼ି ଦେଇଥିଲେ। ଏହି ଘଟଣା ଜଣାପଡ଼ିବା ପରେ ଗଜପତି ଜିଲ୍ଲା ଏସପି ଜ୍ୟୋତ୍ସ୍ନାଙ୍କୁ ପାରଳାଖେମୁଣ୍ଡି ଜିଲ୍ଲା ମୁଖ୍ୟାଳୟକୁ ବଦଳି କରିଛନ୍ତି।
ତେବେ ଗତ ଏପ୍ରିଲ ୨୬ ତାରିଖରେ ଜ୍ୟୋତ୍ସ୍ନା ଅନ୍ୟ ଏକ ମାମଲାରେ ମୋହନା ଗସ୍ତ ସମୟରେ ତିନି ଜଣ ସହଯୋଗୀଙ୍କ ସହ ମିଶି ପ୍ରିତିଙ୍କୁ ଅପହରଣ କରିନେଇଥିବା ଅଭିଯୋଗ ହୋଇଥିଲା। ଜ୍ୟୋତ୍ସ୍ନା କୌଣସି ଲାଞ୍ଚ ମାଗି ନଥିବା ଦର୍ଶାଇ ସେମାନେ ବାଧ୍ୟ ହୋଇ ଏକ ଅଣ୍ଡରଟେକିଂ ଲେଖିଥିବା ଜଣାପଡ଼ିଛି। ସୌଭାଗ୍ୟବଶତଃ ପ୍ରିତି ସେଠାରୁ ଖସି ପଳାଇବାରେ ସକ୍ଷମ ହୋଇଥିଲେ ଏବଂ ତୁରନ୍ତ ମୋହନା ଥାନାରେ ତାଙ୍କ ଅପହରଣ ସମ୍ପର୍କରେ ଏସ୍ଆଇଙ୍କ ନିକଟରେ ଅଭିଯୋଗ କରିଥିଲେ।
ଏ ସମ୍ପର୍କରେ ଖବର ପାଇ ଗଜପତି ଏସପି ଏସ୍ ସ୍ୱାତୀ କୁମାର ସୋମବାର ଜ୍ୟୋତ୍ସ୍ନାଙ୍କୁ ଚାକିରିରୁ ନିଲମ୍ବନ କରିବା ସହ ବିଭାଗୀୟ ତଦନ୍ତ ନିର୍ଦ୍ଦେଶ ଦେବା ସହ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।
Comments are closed.