ଭୁବନେଶ୍ୱର: ବାହାନଗା ଟ୍ରେନ ଦୁର୍ଘଟଣାରେ ମୃତକ ଏବଂ ଆହତଙ୍କ ପାଇଁ ଉଭୟ ରାଜ୍ୟ ସରକାର ଓ ରେଳବାଇ ପକ୍ଷରୁ ଘୋଷଣା କରାଯାଇଥିବା କ୍ଷତିପୂରଣ ଟଙ୍କା ପାଇବା ପାଇଁ ଏହି ଦୁର୍ଘଟଣାରେ ଜଣେ ମହିଳା ତାଙ୍କ ସ୍ୱାମୀଙ୍କ ମୃତ୍ୟୁ ହୋଇଥିବା ଦାବି କରି ମିଛ କହିବାକୁ ଉଦ୍ୟମ କରି କ୍ଷତିପୂରଣ ଟଙ୍କା ନେବାକୁ ଉଦ୍ୟମ କରିବା ଘଟଣାର ପର୍ଦ୍ଦାଫାସ ହୋଇଛି।
କଟକ ଜିଲ୍ଲା ମାଣିଆବନ୍ଧର ଗୀତାଞ୍ଜଳି ଦତ୍ତ ଗତ ୨ ତାରିଖରେ ଘଟିଥିବା ଦୁଃଖଦ ଘଟଣାରେ ତାଙ୍କ ସ୍ୱାମୀ ବିଜୟଙ୍କ ମୃତ୍ୟୁ ହୋଇଛି ବୋଲି ଦାବି କରିବା ସହ ଏକ ଶବକୁ ତାଙ୍କ ସ୍ୱାମୀଙ୍କ ଶବ ବୋଲି ଚିହ୍ନଟ କରିଥିଲେ। ତେବେ କାଗଜପତ୍ର ଯାଞ୍ଚ ପରେ ତାଙ୍କ ଦାବି ଭିତ୍ତିହୀନ ବୋଲି ଜଣାପଡ଼ିଥିଲା।
ପୁଲିସ ଚେତାବନୀ ଦେଇ ତାଙ୍କୁ ଛାଡ଼ି ଦେଇଥିବା ବେଳେ ଏବେ ସଂପୃକ୍ତ ମହିଳାଙ୍କ ସ୍ୱାମୀ ବିଜୟ ମାଣିଆବନ୍ଧ ଥାନାରେ ଅଭିଯୋଗ କରିଛନ୍ତି। ବର୍ତ୍ତମାନ ଗୀତାଞ୍ଜଳି ଗିରଫ ଭୟରେ ଆତ୍ମଗୋପନ କରିଛନ୍ତି।
୧୩ ବର୍ଷ ହେବ ଦୁହେଁ ଅଲଗା ରହୁଥିଲେ ବୋଲି ପୁଲିସ କହିଛି। ଗୀତାଞ୍ଜଳିଙ୍କ ବିରୋଧରେ ସରକାରୀ ଅର୍ଥକୁ ଜାଲିଆତି କରି ତାଙ୍କ ମୃତ୍ୟୁ ପାଇଁ ଷଡ଼ୟନ୍ତ୍ର କରିଥିବା ଅଭିଯୋଗ କରି ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିଜୟ। ମାଣିଆବନ୍ଧ ଥାନାର ଭାରପ୍ରାପ୍ତ ଅଧିକାରୀ ବସନ୍ତ କୁମାର ଶତପଥୀ କହିଛନ୍ତି ଯେ ସେମାନେ ଗୀତାଞ୍ଜଳିଙ୍କ ସ୍ୱାମୀଙ୍କୁ ବାଲେଶ୍ୱର ଜିଲ୍ଲାର ବାହାନଗା ଥାନାରେ ଅଭିଯୋଗ କରିବାକୁ ପରାମର୍ଶ ଦେଇଛନ୍ତି।
ଶବ ଉପରେ ମିଛ ଦାବି କରୁଥିବା ବ୍ୟକ୍ତିବିଶେଷଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୁଖ୍ୟ ଶାସନ ସଚିବ ପି. କେ. ଜେନା ରେଳବାଇ ଓ ଓଡ଼ିଶା ପୁଲିସକୁ ନିର୍ଦ୍ଦେଶ ଦେଇଛନ୍ତି।
Comments are closed.