ନୂଆଦିଲ୍ଲୀ: ଭାରତୀୟ କୋଷ୍ଟ୍ଗାର୍ଡର ୨୫ତମ ଡିରେକ୍ଟର ଜେନେରାଲ୍ ଭାବେ ଦାୟିତ୍ୱ ନେଲେ ବରିଷ୍ଠ ନୌସେନା ଅଧିକାରୀ ରାକେଶ ପାଲ୍। ରାକେଶ ପାଲ୍ ଇଣ୍ଡିଆ ନାଭାଲ୍ ଏକାଡେମୀରୁ ପାସ୍ ପରେ ୧୯୮୯ ରେ କୋଷ୍ଟ୍ଗାର୍ଡରେ ଯୋଗ ଦେଇଥିଲେ। ସେ ଇଣ୍ଡିଆନ୍ କୋଷ୍ଟ୍ଗାର୍ଡର ପ୍ରଥମ ଗନର୍ ଭାବେ ପରିଚୟ ଲାଭ କରିଥିଲେ।
ନୂଆଦିଲ୍ଲୀସ୍ଥିତ ୨୦୨୨ ଫେବୃଆରୀରେ ସେ ଆଡିସନାଲ୍ ଡିଜି ଭାବେ କୋଷ୍ଟ୍ଗାର୍ଡର ମୁଖ୍ୟାଳୟରେ ଅବସ୍ଥାପିତ ହୋଇଥିଲେ। ଫେବୃଆରୀ ୨୦୨୩ରୁ ଡିଜି ଭାବେ ଅତିରିକ୍ତ ଦାୟିତ୍ୱ ନେଇଥିଲେ। ତାଙ୍କ ଅବଦାନ ଲାଗି ତାଙ୍କୁ ୨୦୧୩ରେ ତଟ ରକ୍ଷକ ମେଡାଲ୍ ଓ ୨୦୧୮ରେ ରାଷ୍ଟ୍ରପତି ତଟ ରକ୍ଷକ ମେଡାଲ୍ ପ୍ରଦାନ କରାଯାଇଥିଲା।
ସେହିପରି ବରିଷ୍ଠ ଆଇପିଏସ୍ ଅଧିକାରୀ ଭାବେ ମନୋଜ ଯାଦବଙ୍କୁ ରେଳ ସୁରକ୍ଷା ବଳ (ଆରପିଏଫ୍) ର ମହାନିର୍ଦ୍ଦେଶକ ଭାବରେ ନିଯୁକ୍ତ କରାଯାଇଛି। କର୍ମଚାରୀ ମନ୍ତ୍ରଣାଳୟର ଏକ ନିର୍ଦ୍ଦେଶରେ ଏହି ସୂଚନା ଦିଆଯାଇଛି। ଯାଦବ, ହରିୟାଣା କ୍ୟାଡରର ୧୯୮୮ ବ୍ୟାଚ୍ ଆଇପିଏସ୍ ଅଧିକାରୀ। ଜୁଲାଇ ୩୧ ରେ ଅବସର ନେଇଥିବା ସଞ୍ଜୟ ଚାଣ୍ଡରଙ୍କ ସ୍ଥାନ ନେବେ।
ଏହି ନିର୍ଦ୍ଦେଶରେ କୁହାଯାଇଛି ଯେ କ୍ୟାବିନେଟର ନିଯୁକ୍ତି କମିଟି (ଏସିସି) ଯାଦବଙ୍କୁ ଆରପିଏଫ୍ର ମହାନିର୍ଦ୍ଦେଶକ ପଦରେ ନିଯୁକ୍ତିକୁ ଅନୁମୋଦନ କରିଛି। ଜୁଲାଇ ୩୧, ୨୦୨୫ ପର୍ଯ୍ୟନ୍ତ ସେ ଏହି ପଦବୀରେ ରହିବେ। ଅନ୍ୟ ଏକ ଆଦେଶ ଅନୁଯାୟୀ, ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (NDMA) ର ପରାମର୍ଶଦାତା ଭାବରେ ଇଣ୍ଟେଲିଜେନ୍ସ ବ୍ୟୁରୋ (ଆଇବି) ର ସ୍ୱତନ୍ତ୍ର ନିର୍ଦ୍ଦେଶକ ଶାଫି ଅହସାନ ରିଜଭିଙ୍କୁ ନିଯୁକ୍ତ କରାଯାଇଛି।
ଏଥିରେ କୁହାଯାଇଛି ଯେ ଡେପୁଟେସନ ଆଧାରରେ କେନ୍ଦ୍ରୀୟ ଯାଞ୍ଚ ବ୍ୟୁରୋ (ସିବିଆଇ) ରେ ଯୁଗ୍ମ ନିର୍ଦ୍ଦେଶକ ଭାବରେ ରାଜେଶ ପ୍ରଧାନଙ୍କ ନିଯୁକ୍ତିକୁ ଏସିସି ଅନୁମୋଦନ କରିଛି ଏବଂ ସେ କାର୍ଯ୍ୟଭାର ଗ୍ରହଣ ତାରିଖଠାରୁ ଜାନୁୟାରୀ ୩୦, ୨୦୨୭ ରେ ଅନୁମୋଦିତ ଡେପୁଟେସନ୍ କାର୍ଯ୍ୟକାଳ ପର୍ଯ୍ୟନ୍ତ ଏହି ପଦବୀରେ ରହିବେ। ମହାରାଷ୍ଟ୍ର କ୍ୟାଡରର ୨୦୦୩ ବ୍ୟାଚ୍ ଆଇପିଏସ୍ ଅଧିକାରୀ ପ୍ରଧାନ ବର୍ତ୍ତମାନ ସିବିଆଇରେ ଡେପୁଟି ଇନ୍ସପେକ୍ଟର ଜେନେରାଲ୍ ଅଛନ୍ତି।
Comments are closed.