ମାଲକାନଗିରି: ଶନିବାର ସକାଳେ ଏକ ନବଜାତ ଶିଶୁକନ୍ୟାକୁ ଅଳିଆ ଗଦାରୁ ଉଦ୍ଧାର କରାଯାଇଛି। ମିଳିଥିବା ସୂଚନା ଅନୁଯାୟୀ, ମାଲକାନଗିରି ସହରର ତଳସାହିରେ ଏକ ପରିବାର ଶନିବାର ଅପରାହ୍ନରେ ଶିଶୁଟିର କାନ୍ଦ ଶୁଣିବାକୁ ପାଇଥିଲେ। କାନ୍ଦ ପାଖ ଘରୁ ଆସୁଛି ବୋଲି ଧରିନେଇ ପ୍ରଥମେ ସେମାନେ ଏହାକୁ ଅଣଦେଖା କରିଥିଲେ।
ପାଖାପାଖି ଘଣ୍ଟାଏ କାଳ କାନ୍ଦ ଲାଗି ରହିଥିବାରୁ ସେମାନେ ଚିନ୍ତାରେ ପଡ଼ି ପଡ଼ୋଶୀଙ୍କୁ ପଚାରି ବୁଝିଥିଲେ। ଯେତେବେଳେ ପଡ଼ୋଶୀ ଜଣକ କହିଥିଲେ ଯେ ସେମାନଙ୍କର କୌଣସି ଛୁଆ ନାହିଁ। ଏହାପରେ ସେମାନେ କାନ୍ଦିବାର ଉତ୍ସ ଜାଣିବା ପାଇଁ ସେହି ଅଞ୍ଚଳରେ ଖୋଜାଖୋଜି କରିଥିଲେ। ସେମାନେ ଏକ ଅଳିଆ ଗଦାରେ ଏକ ଜରି ବସ୍ତା ଭିତରୁ ନବଜାତଟି କାନ୍ଦୁଥିବାର ଦେଖିବାକୁ ପାଇଥିଲେ। ଏହାପରେ ଜିଲ୍ଲାର ଚାଇଲ୍ଡ ଲାଇନକୁ ଖବର ଦେଇଥିଲେ।
ପରେ ଚାଇଲ୍ଡ ଲାଇନର କିଛି ସଦସ୍ୟ ଗାଁକୁ ଯାଇ ଶିଶୁକନ୍ୟାକୁ ନିଜ ହେପାଜତକୁ ନେଇଥିଲେ। ଏହା ସହ ସ୍ୱାସ୍ଥ୍ୟ ପରୀକ୍ଷା ପାଇଁ ସ୍ଥାନୀୟ ମେଡିକାଲକୁ ନେଇଥିଲେ। ଶିଶୁଟିର ଅବସ୍ଥା ସ୍ୱାଭାବିକ ଥିବା ଡାକ୍ତରଖାନା ସୂତ୍ରରୁ ଜଣାପଡ଼ିଛି।
Comments are closed.