ଭୁବନେଶ୍ୱର: ଦୁଇ ରାଜ୍ୟର ସୀମା ବିବାଦ ଏବେ ଆହୁରି ବଢିବାରେ ଲାଗିଛି। କୋରାପୁଟରେ ଆନ୍ଧ୍ରର ହସ୍ତକ୍ଷେପର ଆଉ ଏକ ଉଦାହରଣ ଦେଖିବାକୁ ମିଳିଛି। ପଡ଼ୋଶୀ ରାଜ୍ୟର କିଛି ଅଧିକାରୀ ଜିଲ୍ଲାର ଏକ ଜଳ ପ୍ରକଳ୍ପର ଫଳକକୁ ହଟାଇ ଦେଇଛନ୍ତି।
ମିଳିଥିବା ସୂଚନା ଅନୁଯାୟୀ, ଆନ୍ଧ୍ରପ୍ରଦେଶର ମୁଚିମପୁଟ ବ୍ଲକର ବିଡିଓ ଓ ସ୍ଥାନୀୟ ନେତା ମିଶି ଜଲାପୁଟସ୍ଥିତ ମାଛକୁଣ୍ଡ ଜଳ ବିଦ୍ୟୁତ୍ ପ୍ରକଳ୍ପର ସୁରକ୍ଷା ପାଇଁ କୋରାପୁଟ ଜିଲ୍ଲା ପ୍ରଶାସନର ନୋଟିସ୍ ବୋର୍ଡ ବା ଫଳକୁ ଫିଙ୍ଗି ଦେଇଛନ୍ତି। ଦୁଇ ରାଜ୍ୟର ସୀମାରେ ପ୍ରଶାସନ ପକ୍ଷରୁ ଲଗାଯାଇଥିବା ଏକ ସ୍ୱାଗତ ଫଳକକୁ ମଧ୍ୟ ସେମାନେ ହଟାଇ ଦେଇଛନ୍ତି।
2-3 ଦିନ ତଳେ ଘଟିଥିବା ଏହି ଘଟଣା ପରେ ନନ୍ଦପୁର ତହସିଲଦାର ଓ ବିଡିଓଙ୍କ ସମେତ ଅନ୍ୟ ଅଧିକାରୀମାନେ ରବିବାର ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିଥିଲେ।
ଇତିମଧ୍ୟରେ ସ୍ଥାନୀୟ ବିଜେପି କର୍ମୀଙ୍କ ଏକ ଟିମ୍ ଗୌତମ ସାମନ୍ତରାୟଙ୍କ ନେତୃତ୍ୱରେ ଉକ୍ତ ସ୍ଥାନକୁ ଯାଇ ସମ୍ପୃକ୍ତ ସ୍ଥାନରେ ସାଇନ୍ ବୋର୍ଡ ଲଗାଇଛନ୍ତି। ଜଲାପୁଟ ସ୍ଥିତ ଜଳଭଣ୍ଡାର ଦୁଇ ରାଜ୍ୟର ମିଳିତ ପ୍ରକଳ୍ପ ହୋଇଥିଲେ ମଧ୍ୟ ଆନ୍ଧ୍ର ଏହାକୁ ନିଜର ବୋଲି ଦାବି କରିବାକୁ ଚେଷ୍ଟା କରୁଛି। କିନ୍ତୁ ସ୍ଥାନୀୟ ଅଧିକାରୀମାନେ ପଡ଼ୋଶୀ ରାଜ୍ୟର ହସ୍ତକ୍ଷେପରେ ସନ୍ତୁଷ୍ଟ ଥିଲେ।
ସୂଚନାଯୋଗ୍ୟ, ଜିଲ୍ଲାର କୋଟିଆ ପଞ୍ଚାୟତରେ ଆନ୍ଧ୍ର ବିଭିନ୍ନ ଜନକଲ୍ୟାଣକାରୀ ଯୋଜନା କରି ଗ୍ରାମବାସୀଙ୍କୁ ନିଜ ଆଡକୁ ଟାଣିବା ପାଇଁ ଉଦ୍ୟମ କରିଆସୁଛି। ଏପରିକି ରାଜ୍ୟର ଉପମୁଖ୍ୟମନ୍ତ୍ରୀ ରାଜନ୍ନା ଦୋରା ଏହି ଅଞ୍ଚଳ ଗସ୍ତ କରି ଲୋକଙ୍କ ପାଇଁ ଅନେକ ଜନକଲ୍ୟାଣକାରୀ ଯୋଜନା ଘୋଷଣା କରିଛନ୍ତି। ତେବେ ରାଜ୍ୟଗୁଡ଼ିକ ମଧ୍ୟରେ ସୀମା ବିବାଦ ଏବେ ସୁପ୍ରିମକୋର୍ଟରେ ବିଚାରାଧୀନ ରହିଛି।
Comments are closed.