ପାକିସ୍ତାନ ଓ ଚୀନ୍‌ଠାରୁ ବିପଦ: ଶ୍ରୀନଗର ବିମାନ ବନ୍ଦରରେ ନିୟୋଜିତ ହେଲା ମିଗ୍-୨୯ ଯୁଦ୍ଧ ବିମାନ ସ୍କ୍ୱାଡ୍ରନ୍

ଶ୍ରୀନଗର: ଭାରତର ଦୁଇ ପାର୍ଶ୍ୱରେ ରହିଛି ପାକିସ୍ତାନ ଏବଂ ଚୀନ। ଉଭୟ ଦେଶ ଭାରତର ଶତ୍ରୁ। ଏହି ଦୁଇ ଦେଶ ଦ୍ୱାରା ସୃଷ୍ଟି ହୋଇଥିବା ବିପଦକୁ ଦୃଷ୍ଟିରେ ରଖି ଭାରତୀୟ ସେନାଙ୍କୁ ବର୍ଷ ତମାମ ଅତ୍ୟଧିକ ସତର୍କ ରହିବାକୁ ପଡେ। ଜମ୍ମୁ-କାଶ୍ମୀର, ଲଦାଖରେ ପଡ଼ୋଶୀ ପାକିସ୍ତାନ ଏବଂ ଚୀନ୍ ଠାରୁ ଭାରତ ସବୁଠାରୁ ବଡ ବିପଦର ସମ୍ମୁଖୀନ ହୋଇଛି। ବର୍ତ୍ତମାନ ଏହାକୁ ଦୃଷ୍ଟିରେ ରଖି ଭାରତୀୟ ବାୟୁସେନା ଏହାର ରଣନୀତିରେ ଏକ ବଡ଼ ପରିବର୍ତ୍ତନ କରିଛି। ଉଭୟ ପାକିସ୍ତାନ ଏବଂ ଚୀନ୍ ସହ ମୁକାବିଲା କରିବା ପାଇଁ ଆଇଏଏଫ୍ ଶ୍ରୀନଗର ବିମାନ ବନ୍ଦରରେ ଉନ୍ନତ ମିଗ୍-୨୯ ଯୁଦ୍ଧ ବିମାନର ଏକ ସ୍କ୍ୱାଡ୍ରନ୍ ନିୟୋଜିତ କରିଛି।

ଖବର ଅନୁଯାୟୀ, ଟ୍ରାଇଡେଣ୍ଟସ୍ ସ୍କ୍ୱାଡ୍ରନ୍, ‘ଉତ୍ତରର ରକ୍ଷକ’ ଭାବରେ ଜଣାଶୁଣା। ଭାରତୀୟ ବାୟୁସେନା ପାଇଲଟ୍ ସ୍କ୍ୱାଡ୍ରନ୍ ନେତା ବିପୁଲ ଶର୍ମା କହିଛନ୍ତି, “ଶ୍ରୀନଗର କାଶ୍ମୀର ଉପତ୍ୟକାର ମଧ୍ୟ ଭାଗରେ ଅବସ୍ଥିତ ଏବଂ ଏହାର ଉଚ୍ଚତା ସମତଳଠାରୁ ଅଧିକ। ସୀମାର ନିକଟତର ପରିସର ଥିବାରୁ ଏଠାରେ ରଣନୈତିକ ଦୃଷ୍ଟିରୁ ଏକ ସ୍ୱଳ୍ପ ପ୍ରତିକ୍ରିୟା ସମୟ ନେଉଥିବା ବିମାନ ରଖିବା ଭଲ। ଉନ୍ନତ ଆଭିଏନିକ୍ସ ଏବଂ ଦୀର୍ଘ ଦୂରଗାମୀ କ୍ଷେପଣାସ୍ତ୍ର ସହିତ ଏହା ଭଲ କାମ କରିବ। ମିଗ୍-୨୯ ଏହି ସମସ୍ତ ମାନଦଣ୍ଡକୁ ପୂରଣ କରିବ। ଯେଉଁଥିପାଇଁ ଆମେ ଉଭୟ ଦିଗରେ ଶତ୍ରୁ ସହ ମୁକାବିଲା କରିବା ପାଇଁ ସକ୍ଷମ ହେବୁ।”

ପ୍ରାପ୍ତ ସୂଚନା ଅନୁଯାୟୀ, ମିଗ୍-୨୯ ମଧ୍ୟ ବହୁତ ଦୂରଗାମୀ ଏୟାର-ଟୁ-ଏୟାର ମିସାଇଲ୍ ଏବଂ ବାୟୁରୁ ଭୂପୃଷ୍ଠ ଅସ୍ତ୍ରଶସ୍ତ୍ର ସହିତ ସଜ୍ଜିତ ହୋଇଛି। ସଶସ୍ତ୍ର ବାହିନୀକୁ ଦିଆଯାଇଥିବା ଜରୁରୀକାଳୀନ କ୍ଷମତା ବ୍ୟବହାର କରି ଘାତକ ଅସ୍ତ୍ରଶସ୍ତ୍ରକୁ ବ୍ୟବହାର କରିପାରିବେ। ଅଧିକାରୀମାନେ କହିଛନ୍ତି ଯେ ସଶନ୍ତ୍ର ବାହିନୀକୁ ଯୁଦ୍ଧ ସମୟରେ ଶତ୍ରୁ ବିମାନର କ୍ଷମତାକୁ ଅଟକାଇବାର କ୍ଷମତା ଦିଆଯାଇଛି।