ଛତିଶଗଡ଼ : ଆଜିକାଲି ୟୁଟ୍ୟୁବ ଲକ୍ଷ ଲକ୍ଷ ଲୋକଙ୍କ ପାଇଁ ଆୟର ଉତ୍ସ ପାଲଟିଛି । ଛତିଶଗଡର ଏପରି ଏକ ଗାଁ ରହିଛି, ଯେଉଁଠି ଶହେ କି ପାଞ୍ଚ ଶହ ନୁହେଁ, ଅଛନ୍ତି ୧୧୦୦ରୁ ଅଧିକ ୟୁଟ୍ୟୁବର । ଏହି ଗାଁ ଏବେ ୟୁଟ୍ୟୁବରଙ୍କ ଗାଁ ଭାବେ ବେଶ୍ ପରିଚିତ ।
ଛତିଶଗଡର ରାଜଧାନୀ ରାୟପୁରଠାରୁ ୪୫ କିଲୋମିଟର ଦୂରରେ ରହିଛି ତୁଳସୀ ନାମକ ଏହି ଗାଁ । ଏଠାରେ ଜନସଂଖ୍ୟା ୬ ହଜାର । ଏହି ଗାଁର ୟୁଟ୍ୟୁବରର ଖ୍ୟାତି ଦେଖି ରାୟପୁର ଜିଲା ପ୍ରଶାସନ ତୁଳସୀ ଗ୍ରାମରେ ଆଧୁନିକ ଉପକରଣ ସହିତ ସଜ୍ଜିତ ଏକ ଷ୍ଟୁଡିଓ ସ୍ଥାପନ କରିଛନ୍ତି । ଯାହାର ନାମ ‘ହମାରା ଫ୍ଲିକ୍ସ’ ରଖାଯାଇଛି ।
ରାୟପୁର କଲେକ୍ଟର ସର୍ଭେଶ୍ୱର ନରେନ୍ଦ୍ର ଭୁରେଙ୍କ କହିଛନ୍ତି ଯେ, ତୁଳସୀ ଗ୍ରାମରେ ବହୁ ସଂଖ୍ୟକ ୟୁଟ୍ୟୁବର ବାସ କରୁଛନ୍ତି । ସେମାନେ ସୋସିଆଲ ମିଡିଆ ପ୍ଲାଟଫର୍ମରେ ବହୁତ ସକ୍ରିୟ । ଅନେକ ବିଷୟବସ୍ତୁ ସୃଷ୍ଟିକର୍ତ୍ତାଙ୍କର ଏକ ଉଲ୍ଲେଖନୀୟ ଆଧାର । ଯେତେବେଳେ ମୁଁ ଉକ୍ତ ଗାଁ ପରିଦର୍ଶନ କରିଥିଲି ସେଠାରେ ଆଧୁନିକ ସୁବିଧାର ଅଭାବ ଦେଖିବାକୁ ପାଇଥିଲି । ଏହାକୁ ଦୃଷ୍ଟିରେ ରଖି ସେଠାରେ ଆଧୁନିକ ଉପକରଣ ସହିତ ଏକ ଷ୍ଟୁଡିଓ ପ୍ରତିଷ୍ଠା କରିବାକୁ ନିଷ୍ପତ୍ତି ନିଆଯାଇଥିଲା । ଯାହାର ନାମ ହମାରା ଫ୍ଲିକ୍ସ ରଖାଯାଇଛି । ଏହି ଷ୍ଟୁଡିଓ ଏବେ ୟୁଟ୍ୟୁବର୍ସଙ୍କୁ ବହୁତ ଲାଭ ଦେଉଛି । ଭିଡିଓ ଏଡିଟ ଓ ଅପଲୋଡ କରିବା ସମୟରେ ନିର୍ମାତାମାନେ ସମ୍ମୁଖୀନ ହେଉଥିବା ସମସ୍ୟାର ସମାଧାନ ମଧ୍ୟ କରୁଛନ୍ତି । ଗାଁରେ ୫ ବର୍ଷରୁ ଆରମ୍ଭ କରି ୮୫ ବର୍ଷ ବୟସ୍କ ୟୁଟ୍ୟୁବର ଅଛନ୍ତି ।
୨୦୧୬ ମସିହାରେ ଗ୍ରାମର ଜୟ ବର୍ମା ଏବଂ ଜ୍ଞାନେନ୍ଦ୍ର ନାମକ ଦୁଇ ଜଣ ଯୁବକ ପ୍ରଥମେ ୟୁଟ୍ୟୁବ ଚ୍ୟାନେଲ ଆରମ୍ଭ କରିଥିଲେ । ଏହାପୂର୍ବରୁ ଜୟ ଏକ କୋଚିଂ ସେଣ୍ଟର ଚଳାଉଥିଲେ । ଯେଉଁଠାରେ ସେ ଏକାଦଶରୁ ସ୍ନାତକ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କୁ କୋଚିଂ ଦେଉଥିଲେ । ସେ ପିଲାଦିନରୁ ଚଳଚ୍ଚିତ୍ରକୁ ଭଲ ପାଉଥିଲେ । ଏହି ହବି ଯୋଗୁଁ ସେ ପଡୋଶୀ ଜ୍ଞାନେନ୍ଦ୍ରଙ୍କ ସହ ୟୁଟ୍ୟୁବରେ କମେଡି ଭିଡିଓ ତିଆରି କରିବା ଆରମ୍ଭ କରିଥିଲେ । ପରେ ଗାଁର ଅନେକ ଲୋକ ୟୁଟ୍ୟୁବ ଚ୍ୟାନେଲ ଖୋଲିଲେ । ଏହି ସଂଖ୍ୟା ଏକ ହଜାର ଅତିକ୍ରମ କଲା । ଏଥିରୁ ଲୋକମାନେ ବହୁତ ଟଙ୍କା ରୋଜଗାର କରିଥାନ୍ତି ।
Comments are closed.