ଭୁବନେଶ୍ବର: ଆଜି ଉଦଯାପିତ ହୋଇଛି ଆନ୍ତଃ ମହାବିଦ୍ୟାଳୟ ପୁରୁଷ ଫୁଟବଲ ଟୁର୍ଣ୍ଣାମେଣ୍ଟ । ଉତ୍କଳ ବିଶ୍ବବିଦ୍ୟାଳୟ ବିଜୁ ପଟ୍ଟନାୟକ କ୍ରୀଡା ପ୍ରାଙ୍ଗଣରେ ୨ ଦିନ ଧରି ଚାଲିଥିଲା ଏହି ଟୁର୍ଣ୍ଣାମେଣ୍ଟ । ଆଜିର ଏହି ଫାଇନାଲ ମ୍ୟାଚ୍ ରେ ପୁରୀର ଏସସିଏସ କଲେଜ ଭୁବନେଶ୍ୱରର ଦେବରାୟ କଲେଜକୁ ୨-୦ ଗୋଲରେ ପରାସ୍ତ କରି ଜୋନ୍ ଚାମ୍ପିଅନ ହୋଇଛି । ଏହାସହ ଉଭୟ ଦଳ ଆସନ୍ତା ୨୦ ତାରିଖରେ ହେବାକୁ ଥିବା ଆନ୍ତଃ ଜୋନ ପ୍ରତିଯୋଗିତାରେ ଭାଗ ନେବାପାଇଁ ଯୋଗ୍ୟ ବିବେଚିତ ହୋଇଛନ୍ତି।
ପ୍ରଥମ ସେମିଫାଇନାଲରେ ପୁରୀର ଏସସିଏସ କଲେଜ, ଖଣ୍ଡପଡ଼ା କଲେଜକୁ ୨-୦ ଗୋଲ୍ ରେ ଓ ଦେବରାୟ କଲେଜ, ବାରଙ୍ଗ କୁଞ୍ଜବିହାରୀ କଲେଜକୁ ୨-୦ ଗୋଲ୍ ରେ ପରାସ୍ତ କରି ଫାଇନାଲ ଖେଳିବାର ଯୋଗ୍ୟତା ଅର୍ଜନ କରିଥିଲା। ଏହି ଟୁର୍ଣ୍ଣାମେଣ୍ଟକୁ ଉତ୍କଳ ବିଶ୍ଵବିଦ୍ୟାଳୟର କୁଳପତି ପ୍ରଫେସର ସବିତା ଆଚାର୍ଯ୍ୟ ଉଦଘାଟନ କରିଥିବା ବେଳେ, ଉଦଯାପନୀ ଉତ୍ସବରେ କ୍ରୀଡା ପରିଷଦ ନିର୍ଦ୍ଦେଶକ ଡକ୍ଟର ବିଜୟ କୁମାର ସୁନ୍ଦରାୟ ଓ ଉପସଭାପତି ଡକ୍ଟର କୀର୍ତ୍ତି ରଞ୍ଜନ ମଲ୍ଲିକ ଉଭୟ ଦଳକୁ ଟ୍ରଫି ପ୍ରଦାନ କରିଥିଲେ। ଏହି ଟୁର୍ଣ୍ଣାମେଣ୍ଟକୁ ପରିଚାଳନା କରିଥିଲେ ଡକ୍ଟର ବେଣୁଧର ଦାସ, ଚତୁର୍ଭୁଜ ଜେନା, ଡକ୍ଟର ପ୍ରବୀର୍ ମହାନ୍ତି ଓ ପ୍ରଶାନ୍ତ ମହାନ୍ତି।
Comments are closed.