ଖୋର୍ଦ୍ଧା: ଆଗକୁ ଆସୁଛି ଆଲୋକର ପର୍ବ ଦୀପାବଳୀ । ଏନେଇ ଚାରିଆଡେ ଯୋରସୋରରେ ଚାଲିଛି ବାଣ ତିଆରି କାମ । ଆଉ ଏହି ବାଣ ତିଆରି ସମୟରେ ଅସାବଧାନତା ହେତୁ ଘଟୁଛି ଅନେକ ଦୁର୍ଘଟଣା । ଅକାରଣରେ ଚାଲି ଯାଉଛି ବହୁମୂଲ୍ୟ ଜୀବନ । ତେବେ ପୁଣି ଏଭଳି ଏକ ଘଟଣା ସାମ୍ନାକୁ ଆସିଛି ଖୋର୍ଦ୍ଧା ଜିଲ୍ଲା ବାଲିପାଟଣା ଥାନା ଜଇନାବାଦରେ । ବାଣ ବିସ୍ଫୋରଣ ଘଟି ଦୁଇ ଜଣ ଗୁରୁତର ହୋଇଛନ୍ତି ।
ଖବର ମୁତାବକ, ବାଲିପାଟଣା ଥାନା ଅନ୍ତର୍ଗତ ଜଇନାବାଦରେ ଥିବା ଏକ ବାଣ ଗୋଦାମରେ ୨ ଜଣ ବାଣ ଭିଡ଼ୁଥିଲେ । ଏହି ସମୟରେ କୌଣସି କାରଣରୁ ବାଣ ଗୋଦାମରେ ଅଗ୍ନିକାଣ୍ଡ ଘଟି ବିସ୍ଫୋରଣ ଘଟିଥିଲା । ପ୍ରଚଣ୍ଡ ଶବ୍ଦ ଶୁଣି ସ୍ଥାନୀୟ ଲୋକେ ଦୌଡି ଆସି ଗୁରୁତରଙ୍କୁ ଉଦ୍ଧାର କରିଥିଲେ । ଉଭୟଙ୍କୁ ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲ ସ୍ଥାନାନ୍ତର କରାଯାଇଛି ।
ଏଥିରେ ଲକ୍ଷାଧିକ ଟଙ୍କାର ବାଣ ପୋଡି ପାଉଁଶ ହୋଇଯାଇଥିବା କୁହାଯାଉଛି । ଖବରପାଇ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
Comments are closed.