ନୟାଗଡ: ନୟାଗଡ଼ ଜିଲ୍ଲା ଖଣ୍ଡପଡା ବ୍ଳକ ଅଧୀନ କୁମ୍ଭାରପଡା ଗ୍ରାମରେ ବୋମାପାଡ । ପୂର୍ବଶତୃତାକୁ କେନ୍ଦ୍ର କରି ଗ୍ରାମରେ ଥିବା ହରିଜନ ସାହିରେ ଏହି ବୋମା ମାଡ ହୋଇଥିବା ସୂଚନା ମିଳିଛି । ଏଥିରେ ୮ ଜଣ ଆହତ ହୋଇଛନ୍ତି ସେଥିମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି । ଗଣିଆ ଡାକ୍ତରଖାନାରେ ୮ ଜଣ ଚିକିତ୍ସିତ ହେଉଥିବା ବେଳେ ୨ ଜଣ ଗୁରୁତରଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ପଠାଯାଇଛି ।
ଖବର ମୁତାବକ, କୁମ୍ଭାରପଡା ଗ୍ରାମର ଦୁଇ ହରିଜନ ଗୋଷ୍ଠୀ ଙ୍କ ମଧ୍ୟରେ ଦୀର୍ଘଦିନ ଧରି ରାଜନୈତିକ ଏବଂ ପାରିବାରିକ ବିଶୃଙ୍ଖଳା ଲାଗି ରହିଥିଲା । ଗତକାଲି ରାତିରେ ମଦ୍ୟପାନ କରି ଉଭୟ ଗୋଷ୍ଠୀ ପକ୍ଷରୁ କମେଣ୍ଟ ମରାକୁ ନେଇ ଗଣ୍ଡଗୋଳର ସୂତ୍ରପାତ ହୋଇଥିଲା । ଯାହାଫଳରେ ପ୍ରଥମେ ଉଭୟଙ୍କ ମଧ୍ୟରେ ଠେଙ୍ଗା ଦ୍ୱାରା ପିଟାପିଟି ହୋଇଥିଲେ । ଏହାପରେ ଗୋଟିଏ ଗୋଷ୍ଠୀ ପକ୍ଷରୁ ୨ ଟି ବୋମା ମାଡ କରାଯାଇଥିଲା । ଫଳରେ ଅନେକ ମହିଳା ଓ ପୁରୁଷ ଗୁରୁତର ହୋଇଥିବା ଜଣାପଡିଛି ।
ଘଟଣା ସମ୍ପର୍କରେ ଖବରପାଇ ଖଣ୍ଡପଡା ଥାନା ଅଧିକାରୀ ଜ୍ୟୋତି ପ୍ରକାଶ ସ୍ୱାଇଁ ଓ ତାଙ୍କ ଟିମ ସେଠାରେ ପହଞ୍ଚିବା ପରେ ପରିସ୍ଥିତି କୁ ନିୟନ୍ତ୍ରଣ କରିବା ସହ ଆହତ ବ୍ୟକ୍ତିଙ୍କୁ ଆମ୍ବୁଲାନ୍ସ ଯୋଗେ ମେଡ଼ିକାଲକୁ ପଠାଯାଇଛି । ବର୍ତ୍ତମାନ ସୁଦ୍ଧା ଉଭୟ ପକ୍ଷରୁ ପୋଲିସ ନିକଟରେ କୌଣସି ଲିଖିତ ଅଭିଯୋଗ ହୋଇନଥିବା ଥାନା ଅଧିକାରୀ ଜ୍ୟୋତି ପ୍ରକାଶ ସ୍ୱାଇଁ କହିଛନ୍ତି ।
Comments are closed.