ଭୁବନେଶ୍ୱର: ୨୦୨୪ ନିର୍ବାଚନ ପୂର୍ବରୁ କଂଗ୍ରେସ ଦଳ ପାଣ୍ଠି ସଂଗ୍ରହ ପାଇଁ ସୋମବାର ‘ଡୋନେଟ୍ ଫର୍ ଦେଶ’ ନାମରେ ଏକ କ୍ରାଉଡଫଣ୍ଡିଂ ଅଭିଯାନ ଆରମ୍ଭ କରିଛି। ଆଉ ଏହି ଅଭିଯାନ ସେତେବେଳେ ଆରମ୍ଭ ହୋଇଛି ଯେତେବେଳେ କଂଗ୍ରେସ ସାଂସଦ ଧୀରଜ ସାହୁଙ୍କ ବିଭିନ୍ନ ଠିକଣାରୁ ୩୫୦ କୋଟି ଟଙ୍କା ଜବତ ହୋଇଛି। ଆଉ ବିଜେପି ଏହାକୁ ଏକ ମୁଦ୍ଦା କରି କଂଗ୍ରେସ ଏବଂ ଦୁର୍ନୀତି ଗୋଟିଏ ମୁଦ୍ରାର ଦୁଇଟି ପାର୍ଶ୍ବ କହି ସମାଲୋଚନା କରୁଛି।
ଦିଲ୍ଲୀରେ ଦଳ ସଭାପତି ମଲ୍ଲିକାର୍ଜୁନ ଖଡଗେ ପତାକା ଦେଖାଇ ଏହି ଅଭିଯାନର ଶୁଭାରମ୍ଭ କରିଛନ୍ତି। ସେହିପରି ଓଡ଼ିଶା ପ୍ରଦେଶ କଂଗ୍ରେସ କମିଟି (ପିସିସି) ମୁଖ୍ୟ ଶରତ ପଟ୍ଟନାୟକ ଏହି ଅଭିଯାନକୁ ସମର୍ଥନ କରିବାକୁ ଓଡ଼ିଶାବାସୀଙ୍କୁ ନିବେଦନ କରିଛନ୍ତି।
ଦଳର ୧୩୮ଙ୍କh ପ୍ରତିଷ୍ଠା ଦିବସ ପାଳନ ପାଇଁ ଡିସେମ୍ବର ୨୮ ତାରିଖ ପର୍ଯ୍ୟନ୍ତ ଏହି ଅଭିଯାନ ଚାଲିବ। ଏହି ମାଇଲଖୁଣ୍ଟକୁ ସ୍ମରଣୀୟ କରିବା ପାଇଁ ଦଳ ପକ୍ଷରୁ ୧୮ ବର୍ଷ ଓ ତା’ଠାରୁ ଅଧିକ ବୟସର ବ୍ୟକ୍ତିଙ୍କଠାରୁ ସର୍ବନିମ୍ନ ୧୩୮ ଟଙ୍କା କିମ୍ବା ୧୩୮୦ ଟଙ୍କା ବା ୧୩,୮୦୦ ଟଙ୍କା ଭଳି ଗୁଣିତକ ଓ ଅନ୍ୟାନ୍ୟ ଦାନ ମାଗାଯାଇଛି। ଦାନ କରିଥିବା ବ୍ୟକ୍ତିମାନେ କଂଗ୍ରେସ ଅଧ୍ୟକ୍ଷଙ୍କ ଦସ୍ତଖତ ଥିବା ଏକ ପ୍ରମାଣପତ୍ର ଗ୍ରହଣ କରିବେ।
ଡୋର୍ ଟୁ ଡୋର୍ କଲେକ୍ସନ ଅଭିଯାନ ସମେତ ପ୍ରଚାରର ଫିଜିକାଲ ମୋଡ୍ ଡିସେମ୍ବର ୨୮ରୁ ଆରମ୍ଭ ହେବ।
ସମସ୍ତ ରାଜ୍ୟ ୟୁନିଟ୍ ସାମ୍ବାଦିକ ସମ୍ମିଳନୀ ଓ ସୋସିଆଲ ମିଡିଆ ମାଧ୍ୟମରେ ସଚେତନତା ସୃଷ୍ଟି କରିବାକୁ କୁହାଯାଇଛି। ଦଳୀୟ କର୍ମୀ ଓ ସ୍ୱେଚ୍ଛାସେବୀଙ୍କୁ ୧୩୮ ଟଙ୍କା ଓ ତା’ଠାରୁ ଅଧିକ ଯୋଗଦାନ ବାବଦରେ ପ୍ରତି ବୁଥରେ ଅତିକମରେ ଦଶଟି ଘରେ ପହଞ୍ଚିବାକୁ ଲକ୍ଷ୍ୟ ଦିଆଯାଇଛି।
୧୯୨୦-୨୧ରେ ମହାତ୍ମା ଗାନ୍ଧୀଙ୍କ ତିଲକ ସ୍ୱରାଜ ପାଣ୍ଠିରୁ ଏହି ଅଭିଯାନ ଅନୁପ୍ରାଣିତ ହୋଇଛି ବୋଲି କୁହାଯାଉଛି।
କିଛି ଲୋକ ଏହି ଅଭିଯାନକୁ ନେଇ ଚିନ୍ତା ପ୍ରକଟ କରିଛନ୍ତି, କଂଗ୍ରେସ ସାଂସଦ ଧୀରଜ ସାହୁଙ୍କ ସହ ଜଡିତ ମଦ ପ୍ରସ୍ତୁତକାରୀ ସଂସ୍ଥାରୁ ୩୫୦ କୋଟି ଟଙ୍କା ଜବତ ହେବା ପରେ ଏହାକୁ ଇମେଜ୍ ମେକଓଭର ବା ଭାବମୂର୍ତ୍ତି ସଜାଡିବା ଅଭିଯାନ ବୋଲି କୁହାଯାଉଛି।
ଯେତେବେଳେ ପିସିସି ସଭାପତିଙ୍କୁ ଏହି ଅଭିଯୋଗର ସତ୍ୟତା ରହିଛି କି ବୋଲି ଗଣମାଧ୍ୟମ ପ୍ରତିନିଧି ପଚାରିଥିଲେ, ଜବାବରେ ଶରତ ପଟ୍ଟନାୟକ କହିଛନ୍ତି ଯେ, ଓଡ଼ିଶାରେ ଜବତ ହୋଇଥିବା ନଗଦ ଟଙ୍କା ଯେ କଳାଧନ ତାହା ଏବେ ବି ପ୍ରମାଣିତ ହୋଇନାହିଁ”।
Comments are closed.