ନୂଆଦିଲ୍ଲୀ: ୨୦୧୯ ଏପ୍ରିଲ ୧୨ରୁ ୨୦୨୪ ଜାନୁଆରି ୨୪ ମଧ୍ୟରେ ୬୦୬୦.୫ କୋଟି ଟଙ୍କା ସହ ଭାରତୀୟ ଜନତା ପାର୍ଟି (ବିଜେପି) ଇଲେକ୍ଟୋରାଲ ବଣ୍ଡ୍ ଜରିଆରେ ସର୍ବାଧିକ ଅନୁଦାନ ପାଇଥିବା ରାଜନୈତିକ ଦଳମାନଙ୍କ ତାଲିକାରେ ଶୀର୍ଷରେ ରହିଛି। ଏହି ସମୟ ମଧ୍ୟରେ ନଗଦ ହୋଇଥିବା ମୋଟ ବଣ୍ଡର ଏହା ୪୭.୫% ରୁ ଅଧିକ।
ବିଜେପି ପରେ ଅଖିଳ ଭାରତୀୟ ତୃଣମୂଳ କଂଗ୍ରେସ (ଏଆଇଟିସି) ଏବଂ କଂଗ୍ରେସ ଦଳ ଇଲେକ୍ଟୋରାଲ ବଣ୍ଡ ମାଧ୍ୟମରେ ଯଥାକ୍ରମେ ୧,୬୦୯.୫୦ କୋଟି ଟଙ୍କା (୧୨.୬%) ଏବଂ ୧,୪୨୧.୯ କୋଟି ଟଙ୍କା (୧୧.୧%) ପାଇଛନ୍ତି, ଯାହା ଏହି ତାଲିକାରେ ଦ୍ୱିତୀୟ ଏବଂ ତୃତୀୟ ରହିଛି।
ଭାରତ ରାଷ୍ଟ୍ର ସମିତି, ବିଜୁ ଜନତା ଦଳ ଏବଂ ଦ୍ରାବିଡ଼ ମୁନେତ୍ର କଜଗମ ବା ଡିଏମକେ ଭଳି ଅନ୍ୟ ଦଳ ମଧ୍ୟ ଏହି ସମୟ ମଧ୍ୟରେ ୫୦୦ କୋଟିରୁ ଅଧିକ ଟଙ୍କାର ନିର୍ବାଚନୀ ବଣ୍ଡ ଜରିଆରେ ଅନୁଦାନ ପାଇଛନ୍ତି।
ନିକଟରେ ଭାରତୀୟ ଷ୍ଟେଟ ବ୍ୟାଙ୍କ (ଏସବିଆଇ)ର ନିର୍ବାଚନ କମିଶନଙ୍କ ନିକଟରେ ନିର୍ବାଚନୀ ବଣ୍ଡର ସୂଚନା ପ୍ରଦାନ କରିଥିଲା। ଏହାପରେ ମାର୍ଚ୍ଚ ୧୫ ତାରିଖ ଅପରାହ୍ନ ୫ଟା ସୁଦ୍ଧା ଏହି ସୂଚନା ୱେବସାଇଟରେ ପ୍ରକାଶ କରିବାକୁ ସୁପ୍ରିମକୋର୍ଟ ନିର୍ବାଚନ କମିଶନଙ୍କୁ ନିର୍ଦ୍ଦେଶ ଦେଇଥିଲେ।
ଏସବିଆଇ ଦ୍ୱାରା ପ୍ରଦାନ କରାଯାଇଥିବା ଡାଟାକୁ ଦୁଇଟି ସେଟରେ ବିଭକ୍ତ କରାଯାଇଛି । ପ୍ରଥମ ସେଟରେ କ୍ରୟ ତାରିଖ, କ୍ରେତାଙ୍କ ନାମ ଏବଂ ପ୍ରତ୍ୟେକ ଇଲେକ୍ଟୋରାଲ ବଣ୍ଡର ମୂଲ୍ୟ ଅନ୍ତର୍ଭୁକ୍ତ। ତଥ୍ୟ ଅନୁଯାୟୀ, ୨୦୧୯ ଏପ୍ରିଲ ପହିଲାରୁ ୨୦୨୪ ଫେବ୍ରୁଆରି ୧୫ ମଧ୍ୟରେ ମୋଟ ୨୨,୨୧୭ଟି ବଣ୍ଡ୍ କିଣାଯାଇଥିବା ବେଳେ ୨୨,୦୩୦ଟି ବଣ୍ଡ୍ କୁ ରାଜନୈତିକ ଦଳମାନେ ନଗଦ କରିଛନ୍ତି।
Comments are closed.