ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ରାଉସ ଆଭେନ୍ୟୁ କୋର୍ଟରେ ଜାମିନ ଆବେଦନ କରିଛନ୍ତି। ଅପରାହ୍ନରେ ଏହା ଉପରେ ରାଉସ୍ ଆଭେନ୍ୟୁ କୋର୍ଟ ଶୁଣାଣି କରିବେ। ନିୟମିତ ଜାମିନ ପାଇଁ ଏହି ଆବେଦନପତ୍ର ଦାଖଲ ହୋଇଥିବାବେଳେ କେଜ୍ରିୱାଲ ବର୍ତ୍ତମାନ ଅନ୍ତରୀଣ ଜାମିନରେ ଅଛନ୍ତି ଏବଂ ତାଙ୍କୁ ଜୁନ୍ ୨ ରେ ଆତ୍ମସମର୍ପଣ କରିବାକୁ ପଡିବ।
ଦିଲ୍ଲୀର ମଦ ନୀତି ସହ ଜଡିତ ଦୁର୍ନୀତି ମାମଲାରେ ଅରବିନ୍ଦ କେଜ୍ରିୱାଲଙ୍କୁ ଜେଲ ପଠାଯାଇଛି। ମାର୍ଚ୍ଚ ୨୧ରେ ତାଙ୍କୁ ଇଡି ଗିରଫ କରିଥିଲା। କେଜ୍ରିୱାଲଙ୍କୁ ଅନେକ ଦିନ ଧରି ଇଡି ହେପାଜତରେ ପଚରାଉଚରା କରାଯାଇଥିଲା ଏବଂ ଏପ୍ରିଲ ୧ରେ ତାଙ୍କୁ ନ୍ୟାୟିକ ହେପାଜତରେ ତିହାଡ଼ ଜେଲକୁ ପଠାଯାଇଥିଲା। ପ୍ରାୟ ୪୯ଦିନ ଜେଲରେ ଥିବା କେଜ୍ରିୱାଲଙ୍କୁ ମେ ୧୦ରେ ସୁପ୍ରିମକୋର୍ଟ ଅନ୍ତରୀଣ ଜାମିନ ପ୍ରଦାନ କରିଥିଲେ। ଲୋକସଭା ନିର୍ବାଚନରେ ପ୍ରଚାର ପାଇଁ ଏହି ଜାମିନ ପ୍ରଦାନ କରାଯାଇଥିଲା। କେଜ୍ରିୱାଲଙ୍କୁ କିଛି ସର୍ତ୍ତ ଅନୁଯାୟୀ କୋର୍ଟ ଜାମିନ ପ୍ରଦାନ କରିଥିଲେ ଏବଂ ଜୁନ୍ ୨ରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଥିଲେ।
ଆତ୍ମସମର୍ପଣ ତାରିଖ ପାଖେଇ ଆସିବା ପୂର୍ବରୁ କେଜ୍ରିୱାଲ ସୁପ୍ରିମକୋର୍ଟଙ୍କ ନିକଟରେ ପହଞ୍ଚିଥିଲେ। କେଜ୍ରିୱାଲ ଅନ୍ତରୀଣ ଜାମିନକୁ ଏକ ସପ୍ତାହ ବୃଦ୍ଧି କରିବାକୁ କୋର୍ଟରେ ଆବେଦନ କରିଥିଲେ। କେଜ୍ରିୱାଲ ତାଙ୍କ ଅସୁସ୍ଥତା ବିଷୟରେ ଉଲ୍ଲେଖ କରିଥିଲେ ମଧ୍ୟ ସୁପ୍ରିମକୋର୍ଟ ତାଙ୍କ ଆବେଦନକୁ ଗ୍ରହଣ କରିନଥିଲେ ଏବଂ ଅନ୍ତରୀଣ ଜାମିନ ଆବେଦନକୁ ଖାରଜ କରିଦେଇଥିଲେ। ସୁପ୍ରିମକୋର୍ଟଙ୍କଠାରୁ ନିରାଶ ହେବା ପରେ କେଜ୍ରିୱାଲ ବର୍ତ୍ତମାନ ରାଉସ୍ ଆଭେନ୍ୟୁ କୋର୍ଟଙ୍କ ଦ୍ୱାରସ୍ତ ହୋଇଛନ୍ତି। କେଜ୍ରିୱାଲ ଏଠାରେ ନିୟମିତ ଜାମିନ ପାଇଁ ଆବେଦନ କରିଛନ୍ତି, ଯାହା ଆଜି ଅପରାହ୍ନରେ ଶୁଣାଣି ହେବ।
Comments are closed.