ରାଉରକେଲା: ସୁନ୍ଦରଗଡ଼ ଜିଲ୍ଲା ରାଉରକେଲା ସହରରେ ୪ ଦିନ ତଳେ ସ୍ୱାମୀଙ୍କ ଦ୍ବାରା ହତ୍ୟାର ଶିକାର ପରେ ପୋତି ଦିଆଯାଇଥିବା ଜଣେ ମହିଳାଙ୍କ ମୃତଦେହକୁ ପୁଲିସ ଉଦ୍ଧାର କରିଛି।
ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବେଦବ୍ୟାସ ନାଡିଟୋଲାର ଫୁଲମଣି କେରକେଟା ନାମକ ଏହି ମହିଳାଙ୍କ ବିବାହ ୫ ବର୍ଷ ତଳେ ହୋଇଥିଲା। ବ୍ରାହ୍ମଣୀତରଙ୍ଗ ଥାନା ଅନ୍ତର୍ଗତ ଲାଠିକଟା ମୁସାପଲ୍ଲୀର ଅଶୋକ କେରକେଟାଙ୍କୁ ସେ ବିବାହ କରିଥିଲେ।
ଦିନ ମଜୁରିଆ ଭାବେ କାମ କରନ୍ତି ଅଶୋକ। ଗତ କିଛି ମାସ ହେବ ଫୁଲମଣିଙ୍କ ସହ ଛୋଟ ଛୋଟ କଥାକୁ ନେଇ ବାରମ୍ବାର ଝଗଡ଼ା ହେଉଥିଲା। ଗତ ୧୧ ତାରିଖରେ ଦମ୍ପତିଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା ଏବଂ ରାଗରେ ଅଶୋକ ଫୁଲମଣୀଙ୍କୁ ଗଳା କାଟି ହତ୍ୟା କରିଥିବା ଅଭିଯୋଗ ରହିଛି।
ପରେ ଅଶୋକ ତାଙ୍କ ପଡ଼ୋଶୀଙ୍କ ସହାୟତାରେ ଫୁଲମଣିଙ୍କ ମୃତଦେହକୁ ଘର ପଛପଟରେ ପୋତି ଦେଇଥିଲେ। ଫୁଲମଣିଙ୍କ ଭାଇ ସନ୍ଦେହଜନକ ଅବସ୍ଥାରେ ତାଙ୍କ ମୃତ୍ୟୁ ବିଷୟରେ ଜାଣିବା ପରେ ଅଶୋକଙ୍କ ସହ ମୁହାଁମୁହିଁ ହୋଇଥିଲେ।
ଅଶୋକ କେବଳ ଫୁଲମଣିଙ୍କୁ ହତ୍ୟା କରିଥିବା ତାଙ୍କ ଭିଣୋଇଙ୍କ ଅଭିଯୋଗକୁ ଦୃଢ଼ ଭାବେ ଖଣ୍ଡନ କରିନାହାନ୍ତି ବରଂ କାହାକୁ ଜଣାଇଲେ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲେ। ତେବେ ଏନେଇ ଫୁଲମଣିଙ୍କ ଭାଇ ଶନିବାର ବ୍ରାହ୍ମଣୀତରଙ୍ଗ ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ଗାଁରେ ପଚରାଉଚରା ପରେ ପୁଲିସ ଅଶୋକଙ୍କ ଘର ପଛପଟ ଖୋଳି ଫୁଲମଣିଙ୍କ ମୃତଦେହ ଉଦ୍ଧାର କରିଥିଲା। ପୁଲିସ ଅଶୋକ ଓ ତାଙ୍କ ପଡ଼ୋଶୀଙ୍କୁ ଅଟକ ରଖି ପଚରାଉଚରା କରୁଛି। ଅଧିକ ତଦନ୍ତ ଜାରି ରହିଛି।
Comments are closed.