ସାମ୍ବାଦିକାଙ୍କ ଉପରକୁ କୁକୁର ଛାଡ଼ିବା ଘଟଣା, ତେଜିଲା ପୂର୍ବତନ ମନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି

ଭୁବନେଶ୍ୱର: ମହିଳା ସାମ୍ବାଦିକଙ୍କ ଉପରକୁ ପୂର୍ବତନ ମନ୍ତ୍ରୀ ରଘୁନନ୍ଦନ ଦାସ କୁକୁର ଛାଡିବା ଅଭିଯୋଗରେ କାର୍ଯ୍ୟାନୁଷ୍ଠାନ ଦାବି। ବରିଷ୍ଠ ସାମ୍ବାଦିକମାନେ ଗୁରୁବାର ଭୁବନେଶ୍ୱରରେ ବିକ୍ଷୋଭ ପ୍ରଦର୍ଶନ କରିଛନ୍ତି। ପୂର୍ବତନ ସୂଚନା ଓ ଲୋକସମ୍ପର୍କ ମନ୍ତ୍ରୀ ତଥା ବିଜେଡି ନେତା ରଘୁନନ୍ଦନ ଦାସଙ୍କ ବିରୋଧରେ ଗତ ୨୫ ତାରିଖରେ ଏ ନେଇ କ୍ୟାପିଟାଲ ଥାନାରେ ଏତଲା ହୋଇଛି।

ବରିଷ୍ଠ ସାମ୍ବାଦିକ ରାଜାରାମ ଶତପଥୀ କହିଛନ୍ତି ଯେ, ଏହି ଘଟଣା ଘଟିବା ବେଳେ ମହିଳା ସାମ୍ବାଦିକ ଜଣଙ୍କ ତାଙ୍କ କର୍ତ୍ତବ୍ୟ କରୁଥିଲେ। ପଡ଼ୋଶୀ କ୍ୟାମ୍ପସର ଭିଜୁଆଲ ନେବା ପାଇଁ ସୁରକ୍ଷା କର୍ମୀଙ୍କ ଅନୁମତି ନେଇଥିଲେ। ଏହାପରେ ବିଜେଡି ନେତାଙ୍କ କ୍ବାର୍ଟସ ପରିସରରେ ପ୍ରବେଶ କରିଥିଲେ।

ବରିଷ୍ଠ ସାମ୍ବାଦିକ ପ୍ରସନ୍ନ ମହାନ୍ତି କହିଛନ୍ତି, ବିଜେଡିର ଏହି ନେତଙ୍କ ବିରୋଧରେ ତୁରନ୍ତ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବା ଆବଶ୍ୟକ। ଏହା ଏକ ବର୍ବର କାଣ୍ଡ ଥିଲା। ଆଶ୍ଚର୍ଯ୍ୟର କଥା ଯେ ସେ କିମ୍ବା ତାଙ୍କ ଦଳର କେହି ଏହି ଘଟଣାକୁ ନେଇ କୌଣସି ଦୁଃଖ ପ୍ରକାଶ କରିନାହାଁନ୍ତି । ବିଜେପି ସରକାର ମଧ୍ୟ କୌଣସି ବିବୃତ୍ତି ଜାରି କରିନାହାନ୍ତି। ପୁଲିସର କାର୍ଯ୍ୟାନୁଷ୍ଠାନରେ ଆମେ ସନ୍ତୁଷ୍ଟ ନୁହଁ।

ବରିଷ୍ଠ ସାମ୍ବାଦିକ ରବି ଦାସ ଏହାକୁ ଲଜ୍ଜାଜନକ କାର୍ଯ୍ୟ ବୋଲି କହିବା ସହ ବିଜେଡି ନେତା କ୍ଷମା ପ୍ରାର୍ଥନା କରିବାକୁ ଦାବି କରିଛନ୍ତି। ସେ ସୂଚନା ଓ ପ୍ରସାରଣ ମନ୍ତ୍ରୀ ଥିଲେ ଏବଂ ସାମ୍ବାଦିକଙ୍କ ଦାୟିତ୍ୱ ବିଷୟରେ ଭଲ ଭାବରେ ଅବଗତ ଥିବେ। ଏହା ସତ୍ତ୍ୱେ ତାଙ୍କ ସରକାରୀ କ୍ୱାର୍ଟର୍ସରେ ଏହି ଘଟଣା ଘଟିଛି। ସାରା ରାଜ୍ୟରେ ସାମ୍ବାଦିକଙ୍କ ସୁରକ୍ଷା ପାଇଁ ସ୍ବତନ୍ତ୍ର ଆଇନ ପ୍ରଣୟନ କରିବାକୁ ସାମ୍ବାଦିକମାନେ ଦାବି କରିଛନ୍ତି।

ଉଲ୍ଲେଖଯୋଗ୍ୟ, ପୂର୍ବତନ ମନ୍ତ୍ରୀ ଗଣମାଧ୍ୟମକୁ କହିଥିଲେ ଯେ ସେ ତାଙ୍କ ପୋଷା କୁକୁରକୁ ଛାଡି ନାହାନ୍ତି ବରଂ ବିନା ଅନୁମତିରେ ସାମ୍ବାଦିକ ଜଣକ ତାଙ୍କ ପରିସରରେ ପ୍ରବେଶ କରିଥିବାରୁ ଏପରି କରିବାକୁ ଧମକ ଦେଇଛନ୍ତି। ଏହି ମାମଲାରେ ସେ କାଉଣ୍ଟର ଏଫଆଇଆର ଦାଖଲ କରିବେ ବୋଲି କହିଛନ୍ତି।