ନୂଆଦିଲ୍ଲୀ: କେନ୍ଦ୍ର ସରକାରଙ୍କ ବିରୋଧରେ ଆନ୍ଦୋଳନ କରିବେ ଚାଷୀ। ହରିଆଣା ଓ କେନ୍ଦ୍ର ସରକାରଙ୍କ ବିରୋଧରେ ଚାଷୀମାନେ ପୁଣି ରାସ୍ତାକୁ ଓହ୍ଲାଇବେ ବୋଲି ଘୋଷଣା କରିଛନ୍ତି। ସଂଯୁକ୍ତ କିଷାନ ମୋର୍ଚ୍ଚା ଓ କିଷାନ ମଜଦୁର ମୋର୍ଚ୍ଚା ପକ୍ଷରୁ ମିଳିତ ଭାବେ ଅନୁଷ୍ଠିତ ବୈଠକରେ ଏହି ନିଷ୍ପତ୍ତି ନିଆଯାଇଛି।
ଅଗଷ୍ଟ ୧ ତାରଖରେ କିଷାନ ଆନ୍ଦୋଳନ-୨ ଜାରି କରିବାକୁ ଘୋଷଣା କରାଯାଇଛି। ରବିବାର ଦିନ ଦିଲ୍ଲୀର ସମ୍ବିଧାନ କ୍ଲବରେ ଅନୁଷ୍ଠିତ ୟୁନାଇଟେଡ୍ କିଷାନ୍ ମୋର୍ଚ୍ଚା ଏବଂ କିଷାନ୍ ମଜଦୁର ମୋର୍ଚ୍ଚାର କିଷାନ୍ ମଜଦୁର ଜାତୀୟ ସମ୍ମିଳନୀରେ କୃଷକଙ୍କ ସମସ୍ୟା ଏବଂ ଦାବି ଉପରେ ଆଲୋଚନା କରାଯାଇଥିଲା।
ଚାଷୀ ପ୍ରସଙ୍ଗରେ କେନ୍ଦ୍ର ସରକାରଙ୍କ ବିରୋଧରେ କିଷାନ ମଜଦୁର ମୋର୍ଚ୍ଚାର ନେତା ସୌରଭ ସିଂ ପନ୍ଦେର ଅଗଷ୍ଟ ୧ରୁ ସେପ୍ଟେମ୍ବର ୧୫ ପର୍ଯ୍ୟନ୍ତ କାଷାନ ଆନ୍ଦୋଳନ-୨ କୁ ଆହ୍ୱାନ କରିଛନ୍ତି। ଗତ ଫେବୃଆରୀ ୧୩ରେ ଆନ୍ଦୋଳନ ବେଳେ ମାଡ଼ ମାରିଥିବା ପୋଲିସ ଅଫିସରମାନଙ୍କୁ ସମ୍ମାନିତ କରିବା ଲାଗି ହରିଆଣା ସରକାର ନେଇଥିବା ନିଷ୍ପତ୍ତିକୁ ବିରୋଧ କରି ଅଗଷ୍ଟ ୧ ରେ ଆନ୍ଦୋଳନ କରାଯିବ ବୋଲି ଚାଷୀ ନେତାମାନେ କହିଛନ୍ତି।
ସେହିଭଳି ୩ ନୂଆ ଅପରାଧ ଆଇନକୁ ବିରୋଧ କରି ଚାଷୀମାନେ ଅଗଷ୍ଟ ୧୫ ତାରିଖରେ ଟ୍ରାକ୍ଟର ରାଲି କରିବେ। ଏହି ସମୟରେ ସେମାନେ ନୂଆ ଅପରାଧ ଆଇନର କପିକୁ ପୋଡିବେ। ଅଗଷ୍ଟ ୩୧ ଚାଷୀ ଆନ୍ଦୋଳନକୁ ୨୦୦ ଦିନ ପୂରୁଥିବାରୁ ସେହିଦିନ ପ୍ରତିବାଦ ସଭା କରାଯିବ। ସେପ୍ଟେମ୍ବର ୧ରେ ଉତ୍ତରପ୍ରଦେଶର ସମ୍ଭଲରେ, ସେପ୍ଟେମ୍ବର ୧୫ରେ ହରିଆଣାର ଜିନ୍ଦରେ ଚାଷୀମାନେ ଆନ୍ଦୋଳନ କରିବେ।
Comments are closed.