ନ୍ୟୁୟର୍କରେ ଭାରତୀୟ କଳା ସଂସ୍କୃତିର ଝଲକ, ୪୨ତମ ବାର୍ଷିକ ଇଣ୍ଡିଆ ଡେ ପରେଡରେ ସୋନାକ୍ଷୀ ଓ ପଙ୍କଜ ତ୍ରିପାଠୀ ସାମିଲ

ନ୍ୟୁୟର୍କ: ଆମେରିକାର ନ୍ୟୁୟର୍କ ସହରରେ ଭାରତୀୟ କଳା ସଂସ୍କୃତିର ଝଲକ। ରାମ ମନ୍ଦିର ଢାଞ୍ଚାର ପ୍ରଜ୍ଞାପନ ମେଢ଼ ସହ ପାରମ୍ପରିକ ବାଦ୍ୟ ଗୀତରେ କମ୍ପିଲା ନ୍ୟୁୟର୍କ ସହର। ୪୨ ତମ ବାର୍ଷିକ ଇଣ୍ଡିଆ ଡେ ପରେଡରେ ଦେଖିବାକୁ ମିଳିଛି ଏଭଳି ଦୃଶ୍ୟ। ପରେଡରେ ବଲିଉଡ ଅଭିନେତ୍ରୀ ସୋନାକ୍ଷୀ ସିହ୍ନା, ପଙ୍କଜ ତ୍ରିପାଠୀ ଏବଂ ଜହିର ଇକବାଲ, ଭାରତୀୟ ଜନତା ପାର୍ଟି ସାଂସଦ ମନୋଜ ତିୱାରୀ ଅଂଶଗ୍ରହଣ କରିଥିଲେ। ମ୍ୟାଡିସନ୍ ଆଭେନ୍ୟୁରୁ ପୂର୍ବ ୩୮ତମ ଷ୍ଟ୍ରିଟ୍ ଠାରୁ ସହରର ପୂର୍ବ ୨୭ତମ ଷ୍ଟ୍ରିଟ୍ ପର୍ଯ୍ୟନ୍ତ ପ୍ୟାରେଡ୍ ହୋଇଥିଲା। ସୋନାକ୍ଷୀ ସିହ୍ନା ଗ୍ରାଣ୍ଡ ମାର୍ଶଲ ଥିଲେ ଏବଂ ଅତିଥି ଭାବେ ଅଭିନେତା ପଙ୍କଜ ତ୍ରିପାଠୀ ଏବଂ ସାଂସଦ ମନୋଜ ତିୱାରୀ ଯୋଗ ଦେଇଥିଲେ।

ଇଣ୍ଡିଆ ଡେ ପରେଡରେ ରାମ ମନ୍ଦିର ଢାଞ୍ଚାର ପ୍ରଜ୍ଞାପନ ମେଢ ଅନ୍ତର୍ଭୁକ୍ତ କରାଯାଇଛି। ତେବେ ଭାରତୀୟ ଆମେରିକୀୟ ମୁସଲିମ ପରିଷଦ ଏବଂ ଅନ୍ୟ ବିଶ୍ୱାସ ଭିତ୍ତିକ ଗୋଷ୍ଠୀମାନେ ପ୍ୟାରେଡ ଆୟୋଜକମାନଙ୍କୁ ରାମ ମନ୍ଦିର ଢାଞ୍ଚାର ପ୍ରଜ୍ଞାପନକୁ ହଟାଇବାକୁ ଆହ୍ୱାନ ଦେଇଥିଲେ। କିନ୍ତୁ ଆୟୋଜକମାନେ ଏହି ଦାବିକୁ ପ୍ରତ୍ୟାଖ୍ୟାନ କରିଥିଲେ।

ପ୍ୟାରେଡ୍ ଯୋଗୁଁ ନ୍ୟୁୟର୍କ ସହରର ଅନେକ ରାସ୍ତା ବନ୍ଦ ରହିଥିଲା ​। ଏଥିସହ, ଫେଡେରେସନ୍ ଅଫ୍ ଇଣ୍ଡିଆନ୍ ଆସୋସିଏସନ୍ ଅନୁଯାୟୀ ୪୦ରୁ ଅଧିକ ଢାଞ୍ଚା, ୫୦ରୁ ଅଧିକ ମାର୍ଚିଂ ଗ୍ରୁପ୍ ଏବଂ ୩୦ରୁ ଅଧିକ ମାର୍ଚିଂ ବ୍ୟାଣ୍ଡ ଏହି ପରେଡରେ ଅଂଶଗ୍ରହଣ କରିଥିଲେ। ଭାରତ ଦିବସ ପରେଡରେ ବହୁ ସଂଖ୍ୟାରେ ଲୋକ ଭାଗ ନେଇଥିଲେ। ଶତାଧିକ ପ୍ରବାସୀ ଭାରତୀୟ ତ୍ରିରଙ୍ଗା ପତାକା ଧରି ପରେଡରେ ସାମିଲ ହେବା ସହ ଢୋଲ ବଜାଇ ନାଚଗୀତରେ ମସଗୁଲ୍ ହୋଇଥିବା ଦେଖିବାକୁ ମିଳିଛି। ଯାହା ଭାରତର କଳା ସଂସ୍କୃତି ପ୍ରତି ପ୍ରବାସୀ ଭାରତୀୟଙ୍କ ଭଲପାଇବାକୁ ଦର୍ଶାଉଛି।

ପ୍ୟାରେଡ ସମୟରେ ଦେଶଭକ୍ତ ଗୀତ ଗାନ କରାଯାଇଥିଲା। ଲୋକମାନେ ଭାରତୀୟ ପତାକା ଉତ୍ତୋଳନ କରିଥିଲେ ଏବଂ ପରେଡରେ ଅଂଶଗ୍ରହଣ କରୁଥିବାବେଳେ ଡ୍ରମ ବଜାଇ ନାଚୁଥିବା ଦେଖାଯାଇଥିଲା। କାର୍ନିଭାଲ୍ ସମୟରେ ରାସ୍ତାରେ ମେଢ ଉପରେ ଧାର୍ମିକ ଗୀତ ବଜାଯାଇଥିଲା। ନ୍ୟୁୟର୍କରେ ଆୟୋଜିତ ହୋଇଥିବା ଏହି ଇଣ୍ଡିଆ ଡେ’ ପରେଡ୍‌ରେ ଅଯୋଧ୍ୟାର ରାମ ମନ୍ଦିର ସମେତ ୪୦ରୁ ଅଧିକ ପ୍ରଜ୍ଞାପନ ମେଢ଼ ସାମିଲ ହୋଇଥିଲା। ତେବେ ରାମ ମନ୍ଦିର ଢାଞ୍ଚାର ପ୍ରଜ୍ଞାପନ ମେଢ଼ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ୧୮ ଫୁଟ ଲମ୍ବା, ୯ ଫୁଟ୍‌ ଚଉଡ଼ା ଓ ୮ ଫୁଟ୍‌ ଉଚ୍ଚତାର ଏହି ପ୍ରଜ୍ଞାପନ ମେଢ଼କୁ ଭାରତରେ ତିଆରି କରାଯାଇଥିଲା।

ଫେଡେରେସନ୍ ଅଫ୍ ଇଣ୍ଡିଆନ୍ ଆସୋସିଏସନ୍ ଅନୁଯାୟୀ, ପ୍ୟାରେଡରେ ଅନେକ ବଲିଉଡ ସେଲିବ୍ରିଟିଙ୍କ ବ୍ୟତୀତ ୫୦ରୁ ଅଧିକ ମାର୍ଚିଂ ଗ୍ରୁପ୍ ଏବଂ ୩୦ରୁ ଅଧିକ ମାର୍ଚିଂ ବ୍ୟାଣ୍ଡ ମଧ୍ୟ ଅଂଶଗ୍ରହଣ କରିଥିଲେ। ଭାରତର ସ୍ୱାଧୀନତାକୁ ପାଳନ କରିବା ପାଇଁ ପ୍ରତିବର୍ଷ ନ୍ୟୁୟର୍କରେ ଇଣ୍ଡିଆ ଡେ’ ପ୍ୟାରେଡ୍ ଅନୁଷ୍ଠିତ ହୁଏ। ଏହି ପରମ୍ପରା ଚାରି ଦଶନ୍ଧିରୁ ଅଧିକ ସମୟ ଧରି ଚାଲିଆସୁଛି।