ନୂଆଦିଲ୍ଲୀ: ଦିଲ୍ଲୀ ପୂର୍ବତନ ମୁଖ୍ୟମନ୍ତ୍ରୀ ଓ ଆପ ନେତା ଅରବିନ୍ଦ କେଜ୍ରିୱାଲ ବିଜେପିକୁ କରିଛନ୍ତି ଚ୍ୟାଲେଞ୍ଜ। ମୋଦିଜୀ ବିଜେପି ଶାସିତ ୨୨ ରାଜ୍ୟରେ ବିଜୁଳି ବିଲ୍ ମାଗଣା କଲେ , ସେ ବିଜେପି ସମର୍ଥନରେ ପ୍ରଚାର କରିବେ ବୋଲି କହିଛନ୍ତି। ସାହସ ଅଛି ତ ଦିଲ୍ଲୀରେ ବିଧାନସଭା ନିର୍ବାଚନ କରନ୍ତୁ। ମୁଁ ନିର୍ବାଚନ ଲଢିବାକୁ ପ୍ରସ୍ତୁତ ଅଛି। ଦିଲ୍ଲୀ ଜନତାଙ୍କ ଭଲପାଇବା, ସମର୍ଥନ ଓ ବିଶ୍ଵାସ ମୋ ସଚ୍ଚୋଟତାର ପ୍ରମାଣ ହେବ ବୋଲି ଦିଲ୍ଲୀ ଛାତ୍ରସାଲ ଷ୍ଟାଡିଅମରେ ଆୟୋଜିତ “ଜନତା କି ଆନ୍ଦୋଳନ” କାର୍ଯ୍ୟକ୍ରମରେ କେଜ୍ରିୱାଲ ଏପରି କହିଛନ୍ତି।
ସେ ଆହୁରି କହିଛନ୍ତି, ଡବଲ ଇଞ୍ଜିନ ସରକାର ମାନେ ଦରଦାମ ବୃଦ୍ଧି, ଭ୍ରଷ୍ଟାଚାର ଓ ବେରୋଜଗାର। ହରିୟଣା ଓ ଜାମ୍ମୁ-କାଶ୍ମୀରରେ ଖୁବଶୀଘ୍ର ବିଜେପିର ଅନ୍ତ ହେବ। ମଣିପୁର ୭ ବର୍ଷ ବିଜେପି ସରକାର ଅଧୀନରେ ଥିଲେ ମଧ୍ୟ ସେଠାରେ ହିଂସା ଜାରିରହିଛି । ୨୨ ରାଜ୍ୟରେ ବିଜେପି ସରକାର ଥିଲେ ମଧ୍ୟ କୌଣସି ରାଜ୍ୟରେ କିଛି କାମ ହୋଇନାହିଁ ବୋଲି ସେ କହିଛନ୍ତି। ଯଦି ମୋଦିଜୀ ବିଜେପି ଶାସିତ ୨୨ ରାଜ୍ୟରେ ବିଜୁଳି ବିଲ୍ ମାଗଣା କରିଦେବେ, ମୁଁ ତାଙ୍କ ପାଇଁ ପ୍ରଚାର କରିବି ବୋଲି କହିଛନ୍ତି।