ମୟୂରଭଞ୍ଜ: ରାସ୍ତା ଉପରେ ଜଳିଗଲା ହାଇୱା। ଏଭଳି ବଡ ଅଘଟଣରେ ମୃତ୍ୟୁ ମୁଖରୁ ଅଳ୍ପକେ ବଞ୍ଚିଲେ ଡ୍ରାଇଭର ଓ ହେଲ୍ପର। ତେବେ କେଉଁ କାରଣରୁ ନିଆଁ ଲାଗିଲା, ତାହା ଜଣାପଡ଼ି ନାହିଁ। ଆଜି ଅପରାହ୍ନରେ ଏପରି ଦୁର୍ଘଟଣା ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷୀ-କଳାବାଡିଆ ରାସ୍ତାରେ ଘଟିଛି।
ସୂଚନା ଅନୁଯାୟୀ, ଆଜି ମଧ୍ୟାହ୍ନ ସମୟରେ ବାଙ୍ଗିରିପୋଷୀ-କଳାବାଡିଆ ରାସ୍ତା ଧଡାଙ୍ଗୀର ଛକରେ ଏକ ହାଇୱାରେ ନିଆଁ ଲାଗି ଯାଇଥିଲା। ହାଇୱାରେ ପିଚୁ ଲୋଡ ହୋଇଥିବାରୁ ଆଖି ପିଛୁଳାକେ ନିଆଁ ବ୍ୟାପୀ ଯାଇଥିଲା। ଏହା ଦେଖି ସ୍ଥାନୀୟ ଲୋକେ ଅଗ୍ନିଶମ ବାହିନୀକୁ ଖବର ଦେଇଥିଲେ। ଖବର ପାଇ ବାଙ୍ଗିରିପୋଷୀ ଅଗ୍ନିଶମ ବାହୀନି ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। ସେତେବେଳକୁ ହାଇୱାଟି ସମ୍ପୂର୍ଣ୍ଣ ପୋଡ଼ି ନଷ୍ଟ ହୋଇ ଯାଇଥିଲା। ଭୟଙ୍କର ଅଗ୍ନିକାଣ୍ଡ ହୋଇଥିଲେ ମଧ୍ୟ ଉଭୟ ଡ୍ରାଇଭର ଓ ହେଲ୍ପର ମୃତ୍ୟୁ ମୁଖରୁ ଅଳ୍ପକେ ବର୍ତ୍ତି ଯାଇଛନ୍ତି। ତେବେ କେଉଁ କାରଣରୁ ହାଇୱାରେ ନିଆଁ ଲାଗିଲା, ତାହା ଜଣାପଡ଼ି ନାହିଁ।
ରାସ୍ତା ମଝିରେ ହାଇୱାରେ ନିଆଁ ଲାଗିଥିବାରୁ ସେହି ରାସ୍ତାରେ ଯିବା ଆସିବା ଏକ ପ୍ରକାର ବନ୍ଦ ହୋଇଯାଇଥିଲା। ପ୍ରାୟ ଘଣ୍ଟାଏ ପରେ ନିଆଁ ଲିଭିବା ପରେ ଯାତାୟତ ସ୍ୱଭାବିକ ହୋଇଛି।