‘ଅପରେସନ୍ ସିନ୍ଦୂର’କୁ ନେଇ ପୋଷ୍ଟ କରିଥିବା ପ୍ରଫେସରଙ୍କୁ ସୁପ୍ରିମକୋର୍ଟରୁ ମିଳିଲା ଜାମିନ, ତଦନ୍ତ ପାଇଁ SIT ଗଠନ

ନୂଆଦିଲ୍ଲୀ:ଆଜି ବୁଧବାର ସୁପ୍ରିମକୋର୍ଟ ଅଶୋକା ବିଶ୍ୱବିଦ୍ୟାଳୟର ପ୍ରଫେସର ଅଲି ଖାନ ମହମୁଦାବାଦଙ୍କୁ ଅନ୍ତରୀଣ ଜାମିନ ପ୍ରଦାନ କରି ତାଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି । ମାମଲାର ତଦନ୍ତ ପାଇଁ ୨୪ଘଣ୍ଟା ମଧ୍ୟରେ ଏକ SIT ଦଳ ଗଠନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।

ଜାମିନ ଆବେଦନର ଶୁଣାଣି ସମୟରେ ଖଣ୍ଡପୀଠ ପ୍ରଫେସରଙ୍କୁ କହିଛନ୍ତି ଯେ, ତଦନ୍ତ ସମାପ୍ତ ନହେବା ପର୍ଯ୍ୟନ୍ତ ସେ ପହଲଗାମ କିମ୍ବା ଅପରେସନ ସିନ୍ଦୂର ସମ୍ପର୍କରେ ସୋସିଆଲ ମିଡିଆରେ କିଛି ପୋଷ୍ଟ କରିବେ ନାହିଁ। ଯଦି ସେ ଏପରି କରନ୍ତି, ତେବେ ଏହାକୁ ଜାମିନ ସର୍ତ୍ତାବଳୀର ଉଲ୍ଲଂଘନ ବୋଲି ବିବେଚନା କରାଯିବ ଏବଂ ମଧ୍ୟବର୍ତ୍ତୀକାଳୀନ ଜାମିନ ମଧ୍ୟ ବାତିଲ କରାଯିବ। କୋର୍ଟ ଏହା ମଧ୍ୟ କହିଛନ୍ତି ଯେ ଏହି ପ୍ରସଙ୍ଗରେ କୌଣସି ଭାଷଣ ଦିଆଯିବ ନାହିଁ ।

ହରିୟାଣାର ଅଶୋକା ବିଶ୍ୱବିଦ୍ୟାଳୟର ପ୍ରଫେସର ଅଲି ଖାନ ମହମୁଦବାଦ ନିକଟରେ ‘ଅପରେସନ୍ ସିନ୍ଦୂର’ ବିଷୟରେ ଏକ ପୋଷ୍ଟ ପୋଷ୍ଟ କରିଥିଲେ, ଯାହା ଏକ ବଡ଼ ବିବାଦ ସୃଷ୍ଟି କରିଥିଲା।

ସୋସିଆଲ ମିଡିଆରେ ପ୍ରଫେସରଙ୍କୁ ସମାଲୋଚନାର ଶିକାର ହେବାକୁ ପଡିଲା । ପ୍ରଫେସର ଅଲି ଖାନଙ୍କ ବିରୁଦ୍ଧରେ ଭାରତୀୟ ସଶସ୍ତ୍ର ବାହିନୀ, ବିଶେଷକରି ମହିଳା ଅଧିକାରୀ କର୍ଣ୍ଣେଲ ସୋଫିଆ କୁରେଶୀ ଏବଂ ୱିଙ୍ଗ କମାଣ୍ଡର ବ୍ୟୋମିକା ସିଂହଙ୍କ ବିରୁଦ୍ଧରେ ଅପମାନଜନକ ମନ୍ତବ୍ୟ ପୋଷ୍ଟ କରିବାର ଅଭିଯୋଗ ଆସିଥିଲା ।

ନିର୍ଦ୍ଦେଶ ଅନୁଯାୟୀ,ପ୍ରଫେସର ମହମୁଦବାଦଙ୍କ ବିରୋଧରେ ମାମଲାର ତଦନ୍ତ ପାଇଁ ହରିୟାଣା ଡିଜିପିଙ୍କୁ ପୋଲିସ ମହାନିରୀକ୍ଷକ (ଆଇଜି) ସ୍ତରର ଅଧିକାରୀଙ୍କ ନେତୃତ୍ୱରେ ଏକ ତିନି ସଦସ୍ୟ ବିଶିଷ୍ଟ SIT ଗଠନ କରିବାକୁ ପଡିବ। ଏହି ଦଳରେ ଜଣେ ମହିଳା ଅଧିକାରୀଙ୍କୁ ମଧ୍ୟ ସାମିଲ କରାଯିବ।