କର୍ଣ୍ଣାଟକ ହାଇକୋର୍ଟରୁ କେଏସସିଏକୁ ବଡ଼ ଆଶ୍ୱସ୍ତି, ଦଣ୍ଡମୂଳକ କାର୍ଯ୍ୟାନୁଷ୍ଠାନ ଉପରେ ସ୍ଥଗିତାଦେଶ

କର୍ଣ୍ଣାଟକ: ଶୁକ୍ରବାର କର୍ଣ୍ଣାଟକ ହାଇକୋର୍ଟ ଏକ ବଡ଼ ନିଷ୍ପତ୍ତି ନେଇଛନ୍ତି। ବେଙ୍ଗାଲୁରୁ ଷ୍ଟାଡିୟମ ଦଳାଚକଟା ମାମଲାରେ କର୍ଣ୍ଣାଟକ ରାଜ୍ୟ କ୍ରିକେଟ ଆସୋସିଏସନ ବିରୁଦ୍ଧରେ କୌଣସି ପ୍ରକାରର ଦଣ୍ଡାତ୍ମକ କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ କୋର୍ଟ କହିଛନ୍ତି। କିନ୍ତୁ କୋର୍ଟ କେଏସସିଏ ପରିଚାଳନା କମିଟିକୁ ତଦନ୍ତରେ ସହଯୋଗ କରିବାକୁ ଏବଂ ବିନା ଅନୁମତିରେ କୋର୍ଟର କ୍ଷେତ୍ରାଧିକାର ବାହାରକୁ ନଯିବାକୁ ନିର୍ଦ୍ଦେଶ ଦେଇଥିଲେ।

ଖବରମୁତାବକ, ଗୁରୁବାର ଦିନ କର୍ଣ୍ଣାଟକ ପୋଲିସ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର, ଇଭେଣ୍ଟ ମ୍ୟାନେଜମେଣ୍ଟ କମ୍ପାନୀ DNA ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡ୍ ଏବଂ କର୍ଣ୍ଣାଟକ ରାଜ୍ୟ କ୍ରିକେଟ ଆସୋସିଏସନ୍ (କେଏସସିଏ) ବିରୋଧରେ ଏଫଆଇଆର ରୁଜୁ କରିଥିଲା। ଏହା ପରେ କର୍ଣ୍ଣାଟକ ରାଜ୍ୟ କ୍ରିକେଟ ଆସୋସିଏସନ୍ (କେଏସସିଏ) ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଏହି ମାମଲାରେ, କୋର୍ଟ କହିଛନ୍ତି ଯେ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ କୌଣସି ଅଧିକାରୀଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ନୁହେଁ।

ମାମଲାର ଶୁଣାଣି କରିଥିବା ଜଷ୍ଟିସ୍ ଏସ୍ ଆର କୃଷ୍ଣ କୁମାର କେଏସସିଏ ଅଧିକାରୀମାନଙ୍କୁ ମଧ୍ୟବର୍ତ୍ତୀକାଳୀନ ଆଶ୍ୱସ୍ତି ପ୍ରଦାନ କରିଥିଲେ। ମାମଲାର ଶୁଣାଣି ଜୁନ୍ ୧୬ ପର୍ଯ୍ୟନ୍ତ ସ୍ଥଗିତ ରଖାଯାଇଛି।

କେଏସସିଏ ଆବେଦନରେ ଦାବି କରାଯାଇଛି ଯେ,ଘଟଣାଟି ହଠାତ୍ ଲୋକଙ୍କ ଭିଡ଼ ଯୋଗୁଁ ଘଟିଥିବା ଏକ ଦୁର୍ଘଟଣା ଥିଲା ଏବଂ KSCA ପରିଚାଳନା କମିଟିର କୌଣସି ଉଦ୍ଦେଶ୍ୟ ଦାୟୀ କରାଯାଇପାରିବ ନାହିଁ, କାରଣ ଷ୍ଟାଡିୟମ ଗେଟ୍ ଏବଂ ଭିଡ଼ ପରିଚାଳନା RCSPL ଦ୍ୱାରା କରାଯାଇଥିଲା, KSCA ଦ୍ୱାରା ନୁହେଁ, ଯାହା RCB ଇଭେଣ୍ଟ ପାଇଁ ଷ୍ଟାଡିୟମକୁ ଭଡା ଦେଇଥିଲା।

” ପୋଲିସ ଅଧିକାରୀମାନଙ୍କୁ ନିଲମ୍ବନ ଆଦେଶ ପୋଲିସ ବିଭାଗର ବିଫଳତାକୁ ସ୍ପଷ୍ଟ ଭାବରେ ଦର୍ଶାଉଛି, ପୋଲିସ ସେମାନଙ୍କୁ ହଇରାଣ କରିପାରିବ ନାହିଁ,” କେଏସସିଏ ଦାବି କରିଛି।